ԱՄՆ նախագահ Դոնալդ Թրամփը Truth Social սոցիալական ցանցում շնորհակալություն է հայտնել ԱՄՆ Գաղտնի ծառայությանը Սպիտակ տան մոտ հրաձգությանն արձագանքելու համար։
«Շնորհակալություն եմ հայտնում մեր հրաշալի Գաղտնի ծառայությանը և իրավապահ մարմիններին այս երեկո Սպիտակ տան մոտ գտնվող զինված անձի դեմ ձեռնարկված արագ և պրոֆեսիոնալ գործողությունների համար, որը հակված էր բռնության և, հնարավոր է, տարված էր մեր երկրի ամենապատվարժան կառույցով։ Կրակողը սպանվել է Սպիտակ տան դարպասների մոտ Գաղտնի ծառայության գործակալների հետ փոխհրաձգության ընթացքում։ Այս դեպքը տեղի ունեցավ Սպիտակ տան թղթակիցների ընթրիքից մեկ ամիս անց և կոչված է ցույց տալու, թե որքան կարևոր է բոլոր ապագա նախագահների համար Վաշինգտոնում, Կոլումբիայի շրջանում, կառուցել երբևէ եղած այս տեսակի ամենաանվտանգ վայրը։ Դա է պահանջում մեր երկրի ազգային անվտանգությունը»։ – գրել է ԱՄՆ նախագահը։
Ավելի վաղ Սպիտակ տան մոտ սպանվել էր զինված մի տղամարդ, որը կրակ էր բացել Գաղտնի ծառայության անցակետի ուղղությամբ։
Գաղտնի ծառայության աշխատակիցները պատասխան կրակ են բացել՝ վիրավորելով կասկածյալին, որը հետագայում մահացել է հիվանդանոցում։ Վիրավորվել է նաև պատահական մի անցորդ, սակայն Գաղտնի ծառայության գործակալներից ոչ ոք չի տուժել։
Միջադեպի պահին Թրամփը գտնվել է Սպիտակ տանը, սակայն չի տուժել, հայտնել է Գաղտնի ծառայության ներկայացուցիչը։
Կասկածյալը 21-ամյա Նասիր Բեսթն է եղել։ Աղբյուրի համաձայն, Բեսթը արդեն բախում էր ունեցել Գաղտնի ծառայության հետ 2025 թվականի հուլիսին, երբ փորձել էր ներթափանցել Սպիտակ տուն, ձերբակալվել էր և հոգեկան առողջության խնդիրների պատճառով տեղափոխվել հոգեբուժական բաժանմունք։