Իրանական պաշտոնական Fars գործակալությունը հաղորդում է, որ Պակիստանից դեպի Ուզբեկստան առաջին առևտրային բեռի առաքմամբ պաշտոնապես մեկնարկել է Իրանի տարածքով անցնող նոր տրանսպորտային միջանցքի գործառնական փուլը։ Այս նոր երթուղին սկիզբ է առնում Պակիստանի հարավում գտնվող Գվադար նավահանգստից և Իրանի տարածքով ձգվում դեպի Կենտրոնական Ասիայի երկրներ, մասնավորապես՝ Ուզբեկստան։
Նախագծի հիմնական նպատակն է Հարավային Ասիան ուղիղ կապով միացնել Կենտրոնական Ասիայի շուրջ 70 միլիոնանոց շուկային՝ զգալիորեն խթանելով տարածաշրջանային առևտուրը։ Համեմատած ավանդական ուղիների հետ՝ այս միջանցքը թույլ է տալիս էապես կրճատել բեռնափոխադրումների ժամանակն ու ծախսերը, ինչն այն դարձնում է տնտեսապես ավելի շահավետ և մրցունակ։
Պակիստանցի պաշտոնյաները նշել են, որ առաջին բեռնափոխադրումը կրում է փորձնական բնույթ և հիմք է հանդիսանալու միջանցքի հետագա լիարժեք շահագործման համար։ Ծրագիրը նպատակ ունի ստեղծել կայուն և բազմաֆունկցիոնալ տարանցիկ ուղի, որը կնպաստի տարածաշրջանային տնտեսական ինտեգրմանը և բեռնաշրջանառության ծավալների աճին։