3-րդ բանակային կորպուսի հրամանատար, գնդապետ Սիմոն Նազարյանն ու 5-րդ բանակային կորպուսի հրամանատար, գնդապետ Գագիկ Պողոսյանը, որ Արցախի Հանրապետության «Արիության համար» մեդիալ ունեն, Հանրապետության օրվա առթիվ ստացել են նաև գեներալ-մայորի զինվորական կոչումներ։ Հրապարակված լուսանկարում նկատում ենք, որ նրանց մեդալների շարքում Արցախի «Արիության համար» մեդալը ձևափոխված է․ մեդալից հանել են Արցախի դրոշի հատվածը՝ այն փոխարինելով Հայաստանի դրոշով։ Պաշտպանության նախարարի մամուլի քարտուղար Արսեն Թորոսյանի հետ զրույցում փորձեցինք պարզել՝ ինչո՞ւ է փոխվել մեդալի տեսքը, ինչո՞ւ է հեռացվել Արցախի դրոշը։ Խոսնակն ասաց, որ հարցի պատասխանը իրենց տիրույթում չէ։
Արցախի Հանրապետության «Արիության համար» մեդալով պարգևատրվել են պաշտպանության բանակի զինծառայողները և այն անձինք, ովքեր մասնակցել են ԼՂՀ պաշտպանությանն ու մարտական գործողություններին։ Ռազմական փորձագետ Արթուր Եղիազարյանի խոսքով՝ մինչև 2023 թվականի սեպտեմբերի իրադարձությունները մեդալի տեսքը որևէ պաշտոնական փոփոխության չի ենթարկվել, և պարգևատրված անձինք այն պետք է կրեն նույն տեսքով, որով ստացել են։
«Եթե որևէ մեկը փոխել է մեդալի տեսքը, ապա դա արդեն կեղծման տարր է պարունակում։ Ավելի ճիշտ կլիներ ընդհանրապես չկրել մեդալը, քան փոխված տարբերակով կրել»,- ասել է փորձագետը։
Եղիազարյանի գնահատմամբ՝ այստեղ խնդիրը միայն մեդալի արտաքին ձևավորումը չէ, այլ այն խորհրդանիշներից հրաժարումը, որոնց համար այդ պարգևը տրվել է։
«Փաստացի ստացվում է, որ մարդիկ ուրանում են այն ծառայությունը, որի համար ժամանակին ստացել են այդ մեդալը»,- նշել է նա։
Փորձագետը նաև պատմական զուգահեռ է անցկացրել խորհրդային շրջանի հետ՝ հիշեցնելով, որ անգամ ԽՍՀՄ տարիներին բազմաթիվ զինվորականներ շարունակել են կրել ցարական ժամանակաշրջանում ստացած պարգևները՝ առանց դրանց տեսքը փոխելու։