Վրաստանի Պետական անվտանգության ծառայությունը լրտեսության մեղադրանքով կալանավորել է ևս մեկ մարդու․ դա լրագրող Իրակլի Չիխլաձեն է։ Տեղեկությունը հաստատել են գերատեսչությունում։
Իրակլի Չիխլաձեն «Կովկասի մարդու իրավունքների ինստիտուտի» հիմնադիրն ու ղեկավարն է, հայտնում է Վրաստանի Առաջին ալիքը։
Ինչպես հայտարարվել է Պետական անվտանգության ծառայությունում անցկացված ճեպազրույցում, ձերբակալվածը, գործելով իր երկրի շահերին հակառակ, օգտագործելով լրագրողական, փորձագիտական և այլ մասնագիտական շրջանակներում ունեցած անձնական կապերը, օտարերկրյա հատուկ ծառայությունների շահերից ելնելով, համակարգված զբաղվել է նրանց համար հետախուզական բնույթի տեղեկությունների հավաքմամբ և փոխանցմամբ։
Գերատեսչության տվյալներով՝ ձերբակալվածի փոխանցած տեղեկությունները ներառել են տվյալներ Վրաստանում և հարևան երկրներում տեղի ունեցող գործընթացների մասին։
Բացի այդ, ինչպես նշել են ՊԱԾ-ում, նա առցանց հարթակի քողի տակ ղեկավարել է հետախուզական ցանց, ինչպես նաև հատուկ ծառայություններից ստացված միջոցները բաշխել ցանցի անդամների միջև։
Բացի այդ, ավելի վաղ ՊԱԾ-ը լրտեսության մեղադրանքով կալանավորել էր նաև «Եվրասիա ինստիտուտի» հիմնադիր Գուլբաաթ Ռցխիլաձեին։