Չդադարող ծափահարություններ, հուզմունք, ժպիտ․ ամեն ինչ խառնվել էր իրար։
Գյումրիի մարզամշակութային կենտրոնի բեմում Արցախի երգի ու պարի պետական համույթներն իրենց կատարումներով ներկայացրել են արցախյան հարուստ մշակույթը։ «Մենք կանք» արցախյան մշակութային միջոցառումը միավորել է արցախյան մշակութային համույթներին և անհատ կատարողներին։ Այն հիշողության, մշակութային ժառանգության և մեր միասնականության մասին է։
Հիշեցնենք, որ «Մենք կանք» կրթամշակութային մեծ համերգն առաջին անգամ կազմակերպվել էր 2026 թվականի հունվարի 18-ին՝ Կարեն Դեմիրճյանի անվան մարզահամերգային համալիրում, և լայն արձագանք ստացել հանրության շրջանում։
Հանրային մեծ հետաքրքրության և դրական արձագանքների արդյունքում «Արցախյան մշակույթի պահպանման կենտրոն» ՀԿ-ն որոշում է կայացրել ծրագիրը դարձնել շարունակական՝ մեկնարկելով համայնքային մշակութային միջոցառումների շարքը։
Ծրագրի առաջին կանգառը Գյումրիից է սկսվել։ Արցախի ՄԻՊ Գեղամ Ստեփանյանը Oragir.News-ի հետ զրույցում ասել է, որ Արցախի մշակույթը ներկայացվելու է Հայաստանի բոլոր բնակավայրերում։
«Նմանատիպ միջոցառումները շատ կարևոր են արցախյան մշակութային ինքնությունը պահպանելու համար։ Այս պարագայում մենք կարողանում ենք պահպանել մեր մշակութային ժառանգությունը, և հենց այդ նպատակն է հետապնդում ծրագիրը»։
Մանրամասները՝ տեսանյութում։
Անահիտ Չալիկյան