Առնվազն ինը մարդ ստացել է թեթև վնասվածքներ «Չանմի» թայֆունի հետևանքների պատճառով, որը հարվածել է Օկինավա պրեֆեկտուրային և շարունակում է շարժվել դեպի Ճապոնիայի հիմնական կղզիները՝ Կյուսյու, Սիկոկու և Հոնսյու։ Այս մասին հայտնել է Ճապոնիայի կառավարության գլխավոր քարտուղար Մինորու Կիհարան։
Նրա խոսքով՝ Օկինավայում նաև արձանագրվել են վեց շենքի վնասումներ։
Տարերքի մոտենալու պատճառով, ՏԱՍՍ-ի հաշվարկներով, չեղարկվել է ավելի քան 300 ավիաչվերթ։ Հիմնական սահմանափակումները ազդել են Կյուսյու կղզու Միյաձակի և Կագոսիմա օդանավակայանների վրա, դեպի ուր այժմ շարժվում է թայֆունը։
Օդերևութաբանների տվյալներով՝ «Չանմի»-ն անցել է Օկինավայի վրայով և այժմ գտնվում է Կյուսյուից հարավ՝ շարժվելով հյուսիս-արևելք մոտ 25 կմ/ժ արագությամբ։ Ակնկալվում է, որ մինչև երեկո այն կհասնի Կյուսյուի հարավային հատվածին, ապա կշարունակի շարժվել Սիկոկուի և Հոնսյուի խաղաղօվկիանոսյան ափով։
Հունիսի 3-ի երեկոյան կողմ թայֆունը կարող է մոտենալ Տոկիոյի մայրաքաղաքային տարածաշրջանին, որից հետո կշարժվի դեպի Խաղաղ օվկիանոս։