Ներդրողները վստահորեն անցել են «ագահության» ռեժիմի, քանի որ շուկաները պատրաստվում են արհեստական բանականության ոլորտի խոշոր ընկերությունների կողմից կապիտալի ներգրավման աննախադեպ ալիքի։ Դրա մասին CNBC-ին հայտարարել է Goldman Sachs-ի գլխավոր գործադիր տնօրեն Դևիդ Սոլոմոնը՝ պատասխանելով այն հարցին՝ արդյոք շուկաներն ի վիճակի՞ են դիմակայել OpenAI-ի, Anthropic-ի և SpaceX-ի սպասվող IPO-ների՝ բաժնետոմսերի առաջնային հրապարակային տեղաբաշխման խոշորածավալ թողարկումների շարքին։
Սոլոմոնը նշել է, որ շուկայում բավարար կապիտալ կա նման գործարքների համար։ «Համակարգում լիկվիդայնությունը բավարար է, եթե աշխարհում պահպանվում է լավատեսությունը,- ասել է նա։- Մենք հիմա ակնհայտորեն գտնվում ենք մի պահում, երբ ագահությունն ավելի շատ է, քան վախը»։
Նրա հայտարարությունները հնչել են վերջին տարիների ամենաակտիվ տեղաբաշխումների շրջանի սպասումների ֆոնին։ Արհեստական բանականության ոլորտում աշխատող երկու առաջատար ընկերություններ, ինչպես նաև SpaceX-ը, որը ներառում է Իլոն Մասկի AI-նախագծերը, կարող են բորսա դուրս գալ տրիլիոնավոր դոլարների գնահատմամբ, միևնույն ժամանակ, երբ այլ ընկերություններ հսկայական միջոցներ են ներգրավում տվյալների մշակման կենտրոնների կառուցման, չիպերի գնման և ենթակառուցվածքների զարգացման համար։ Դա հարցեր է առաջացնում, թե արդյոք շուկան կկարողանա՞ «մարսել» առաջարկի նման ծավալը։
Սոլոմոնը, ում ընկերությունը մասնակցում է մի շարք նման գործարքների, նվազեցրել է այս մտահոգությունների նշանակությունը։ Նրա խոսքերով՝ Alphabet-ի բաժնետոմսերի վերջին դինամիկան՝ բաժնետոմսերի թողարկման միջոցով 80 միլիարդ դոլար ներգրավելու պլանների մասին հայտարարությունից հետո, ցույց է տալիս, որ շուկան նախկինի պես բաց է արհեստական բանականության թեմատիկայի համար։
«Բաժնետոմսերը շատ լավ են վաճառվում,- նշել է նա։- Դա նման մասշտաբի տեղաբաշխման առաջին իրական օրինակն է, և այն հուսադրող է»։
Նա հավելել է, որ բաժնետոմսերի և պարտատոմսերի ուժեղ շուկաները դրդում են ընկերություններին կապիտալ ներգրավել, քանի դեռ դա հնարավոր է։ «Եթե դուք ունեք կապիտալ պարունակող բիզնես, և կապիտալը հասանելի է, վերցրեք այն»,- ասել է նա։
Սոլոմոնը խոստովանել է, որ միջոցների ներգրավման ներկայիս ալիքն իր մասշտաբով աննախադեպ է, սակայն ընդգծել է, որ հարստության և լիկվիդայնության ռեկորդային մակարդակներն աջակցում են նման գործընթացներին։ Նա նշել է նաև, որ արհեստական բանականության ընկերությունների եկամուտները կարող են ստեղծել ինքնակայուն բոլորաշրջան, որի դեպքում աշխատակիցներն ու ներդրողները շահույթը կվերաներդնեն հարկերի և նոր նախագծերի մեջ։
«Ագահությունը կարող է շատ արագ վերածվել վախի, բայց դա չի նշանակում, որ հենց այդպես էլ կլինի,- ասել է նա։- Էյֆորիան կարող է երկար տևել… Մեծ է հավանականությունը, որ մենք դեռևս բոլորաշրջանի վաղ, ոչ թե ուշ փուլում ենք»։