ՆԳ նախարարությունում տեղի է ունեցել աշխատանքային քննարկում, որտեղ քննարկվել են հանցավորության վիճակագրության և հետազոտությունների ոլորտի թվայնացման հարցերը։ Այն վարել է ՆԳ նախարարի տեղակալ Արմեն Ղազարյանը։
ՆԳՆ–ից NEWS.am–ին հայտնում են, որ մասնակցել են ՆԳ նախարարության, Գլխավոր դատախազության, Քննչական և Հակակոռուպցիոն կոմիտեների ներկայացուցիչներ։
Օրակարգում հանցավորության վիճակագրության և հետազոտությունների ոլորտի թվայնացման վերաբերյալ հարցերն էին։
Ներկայացվել է վիճակագրական քարտերի հաշվառման էլեկտրոնային հարթակի նախագծային տարբերակը, ինչը թույլ կտա թղթային գործընթացները փոխարինել թվային լուծումներով՝ ապահովելով հետագծելիությունը։
Անդրադարձ է կատարվել արհեստական բանականության գործիքների կիրառմանը, որոնք նախատեսվում է օգտագործել տվյալների վերլուծության, հնարավոր անհամապատասխանությունների բացահայտման և այլ գործառույթների համար։
Քննարկվել են նաև իրավապահ մարմինների տեղեկատվական համակարգերի ինտեգրման հնարավորությունները, ինչի արդյունքում ապահովվելու է տվյալների փոխգործելիությունն ու տեղեկատվության փոխանակման արդյունավետությունը։
Պայմանավորվածություն է ձեռք բերվել հարթակի տեխնիկական և բովանդակային լուծումների շուրջ միասնական մոտեցումներ ձևավորելու նպատակով շարունակել աշխատանքային քննարկումները։