Քուվեյթը շաբաթ վաղ առավոտյան վերսկսել է իր օդային տարածքի աշխատանքը՝ ժամանակավոր փակվելուց հետո, որը կիրառվել էր Պարսից ծոցում իրավիճակի կտրուկ սրման և հրթիռային ու անօդաչու սարքերի հարձակումների մասին հաղորդագրությունների ֆոնին, տեղեկացրել է Gulf News-ը։
Քուվեյթի քաղաքացիական ավիացիայի գլխավոր վարչությունը հայտնել է, որ ավիահաղորդակցությունը լիովին վերականգնվել է տեղի ժամանակով առավոտյան ժամը 6:15-ին։ Որոշումն ընդունվել է ոլորտային գերատեսչությունների հետ խորհրդակցություններից և անվտանգության իրավիճակի գնահատումից հետո։
Երկրի օդային տարածքը մի քանի ժամով փակվել էր որպես նախազգուշական միջոց։ Սահմանափակումների պատճառով Kuwait Airways և Jazeera Airways ավիաընկերությունների 11 չվերթ վերուղղորդվել էր հարևան պետությունների օդանավակայաններ։
Ավելի վաղ Քուվեյթի զինված ուժերի գլխավոր շտաբը հայտնել էր, որ երկրի հակաօդային պաշտպանության համակարգերը որսացել են մի քանի հրթիռ և անօդաչու սարք։ Ռազմական գերատեսչությունում նշել էին, որ երկրի մի շարք շրջանների բնակիչների լսած պայթյունների ձայները կապված էին օդային թիրախների ոչնչացման ուղղությամբ ՀՕՊ միջոցների աշխատանքի հետ։
Տեղի ունեցող իրադարձությունների ֆոնին իշխանությունները քաղաքացիներին կոչ են արել օգտվել միայն պաշտոնական տեղեկատվական աղբյուրներից։
ԱՄՆ կենտրոնական հրամանատարության (CENTCOM) տվյալներով՝ Իրանը Քուվեյթի և Բահրեյնի ուղղությամբ արձակել է յոթ բալիստիկ հրթիռ։ Ամերիկացի զինվորականները պնդում են, որ դրանցից վեցը որսացել են, ևս մեկը չի հասել նպատակին։ Զոհերի կամ ավերածությունների մասին հաղորդումներ չեն ստացվել։
Միջադեպը տեղի է ունեցել Իրանի և ԱՄՆ-ի միջև լարվածության նոր փուլի ֆոնին, որը Պարսից ծոցի մի շարք երկրներում առաջացրել է քաղաքացիական ավիացիայի աշխատանքի ժամանակավոր սահմանափակումներ և անվտանգության ուժեղացված միջոցառումներ։