Մեծ Բրիտանիայի թագավոր Չարլզ III-ին և Քամիլա թագուհուն դիմավորել են ծափահարություններով և ողջույնի բացականչություններով, երբ նրանք ժամանել են թագավորի ավագ քրոջ՝ արքայադուստր Աննայի որդու՝ Փիթեր Ֆիլիպսի հարսանիքին։ Արարողությունը տեղի է ունեցել շաբաթ օրը Գլոսթերշիր կոմսության Քեմբլ գյուղի Բոլոր Սրբերի եկեղեցում, հայտնել է BBC News-ը։
48-ամյա Փիթեր Ֆիլիպսը փակ արարողության շրջանակում ամուսնացել է բուժքույր Հարիեթ Սփերլինգի հետ։ Զույգն ընտրել է այս եկեղեցին, քանի որ հենց այստեղ է Սփերլինգը ապրել նրանց ծանոթության ժամանակ։
Հարսանիքին ներկա են եղել բրիտանական թագավորական ընտանիքի հայտնի անդամներ, այդ թվում՝ Ուելսի արքայազն և արքայադուստր Ուիլյամն ու Քեթրինը, ինչպես նաև Զառա և Մայք Թինդալները, Էդինբուրգի դուքսն ու դքսուհին, արքայադուստրեր Եվգենիան և Բեատրիսն իրենց ամուսինների հետ։
Ականատեսների և Reuters գործակալության տվյալներով՝ եկեղեցու մոտ են եկել նաև բազմաթիվ քաղաքացիներ հատուկ թագավորական ընտանիքի անդամներին տեսնելու համար։ Ուելսի արքայազնի և արքայադստեր, ինչպես նաև մյուս հյուրերի ժամանման պահին հնչել են ողջույնի բացականչություններ։
Հարսնացուն ժամանել է երեք հարսնաքույրերի ուղեկցությամբ, որոնց թվում էին Ֆիլիպսի դուստրերը՝ Սավաննան և Այլան, ինչպես նաև Սփերլինգի դուստրը։
Արարողության համար եկեղեցու շուրջ տեղադրվել են արգելապատնեշներ և փակվել են ճանապարհներ՝ մեծ թվով հանդիսատեսների և լրատվամիջոցների ներկայացուցիչների պատճառով։
Փիթեր Ֆիլիպսը՝ արքայադուստր Աննայի և կապիտան Մարկ Ֆիլիպսի որդին, բրիտանական գահի ժառանգորդության հերթականության մեջ զբաղեցնում է 19-րդ տեղը։