Իսրայելի իշխանությունները հինգշաբթի արտաքսել են հայտնի ֆրանսիացի լրագրող Էլիս Ֆրուսարին այն դեպքից հետո, երբ նախորդ օրը երկրի գլխավոր միջազգային օդանավակայանում վայրէջք կատարելիս նրան մերժել էին մուտք գործել երկիր: Դրա մասին հայտնել են նրա գործատուն և Իսրայելում Օտարերկրյա մամուլի ասոցիացիան, հաղորդում է Associated Press գործակալությունը։
Էլիս Ֆրուսարը, որը երկար տարիներ աշխատել է Իսրայելում և պաղեստինյան տարածքներում, չորեքշաբթի Փարիզից չվերթով ժամանել է Թել Ավիվի Բեն Գուրիոն օդանավակայան, հաղորդում է Radio France Internationale հանրային ռադիոյի լրատվական ցանցը, որի համար նա հաճախակի ռեպորտաժներ էր պատրաստում:
Ֆրուսարն ունեցել է ճամփորդության համար անհրաժեշտ թույլտվությունը և դիմել էր Իսրայելի օկուպացրած Հորդանան գետի արևմտյան ափին աշխատելու վիզա ստանալու համար, հայտնում է RFI-ն։ Սակայն, ժամանելուն պես նրան հարցաքննել են, ձերբակալել, այնուհետև ինքնաթիռով հետ ուղարկել Ֆրանսիա։
«Իսրայելի իշխանությունները RFI-ին որևէ բացատրություն չեն տվել այս որոշման վերաբերյալ»,- ասված է հեռուստաալիքի հայտարարության մեջ։
Ֆրանսիայի ԱԳՆ պաշտոնական ներկայացուցիչ Պասկալ Կոնֆավրոն հայտարարել է, որ Ֆրանսիան մոբիլիզացրել է իր դիվանագիտական ցանցը Ֆրուսարին աջակցելու համար, սակայն նրան արտաքսելու որոշումը «այնուամենայնիվ, պատկանում է Իսրայելի իշխանությունների ինքնիշխան լիազորություններին»։
Մի քանի իսրայելական լրատվամիջոցներ մեջբերել են Սփյուռքի և հակասեմականության դեմ պայքարի նախարարության հայտարարությունը, ըստ որի՝ գերատեսչությունը հանձնարարել է մերժել Ֆրուսարի մուտքը Գազայում և Արևմտյան ափին Իսրայելի գործողությունները լուսաբանելու համար, դրանց թվում՝ պաղեստինցիների նկատմամբ կառավարության քաղաքականությունը նկարագրելելիս «ապարտեիդ» բառն օգտագործելու պատճառով։