Սեուլի դատարանը Հարավային Կորեայի նախկին նախագահ Յուն Սոկ Յոլին դատապարտել է 30 տարվա ազատազրկման՝ Հյուսիսային Կորեայի օդային տարածք անօդաչու թռչող սարքեր (ԱԹՍ) ուղարկելու գործով։ Այս մասին հունիսի 12-ին հայտնել է Yonhap գործակալությունը։
«Ուրբաթ Սեուլի դատարանը նախկին նախագահ Յուն Սոկ Յոլին դատապարտել է 30 տարվա ազատազրկման՝ նրան մեղավոր ճանաչելով Հյուսիսային Կորեա անօդաչու սարքերի ներթափանցումը կազմակերպելու մեջ՝ սահմանին լարվածությունը սրելու և 2024 թվականի դեկտեմբերին ռազմական դրություն հայտարարելու հիմք ստեղծելու նպատակով», — նշվել է հրապարակման մեջ։
Ազատազրկման են դատապարտվել նաև մի շարք բարձրաստիճան զինվորական պաշտոնյաներ, որոնք անմիջականորեն պատասխանատու էին նման գործողությունների համար։
«Արտակարգ դրություն և ռազմական դրություն մտցնելու պայմաններ ստեղծելու նպատակով մեղադրյալներն օգտագործել են ռազմական գործողության պատրվակը՝ Հյուսիսային Կորեայի կողմից սադրանք հրահրելու համար», — նշվել է դատարանի որոշման մեջ։
Հարավային Կորեայի դատարանը փետրվարի 19-ին Յուն Սոկ Յոլին դատապարտել էր ցմահ ազատազրկման։ Պետության նախկին ղեկավարը մեղավոր է ճանաչվել 2024 թվականին ապստամբություն ղեկավարելու համար։ Մեղադրանքի վարկածով՝ նա դավադրության մեջ է մտել պաշտպանության նախկին նախարար Կիմ Յոն Հյոնի և այլ անձանց հետ՝ անկարգություններ կազմակերպելու և սահմանադրությունը խարխլելու նպատակով։ Պաշտպանության նախկին նախարարը նույն օրը նույնպես դատապարտվել էր 30 տարվա ազատազրկման։
Յուն Սոկ Յոլը ձերբակալվել է 2025 թվականի հունվարի 15-ին՝ կոռուպցիայի գործով, ինչն աննախադեպ է, քանի որ քննչական մարմինները ձերբակալել էին պետությունը ղեկավարած անձի։ Ավելի ուշ նախագահը կալանավորվել էր, ինչը դժգոհություն էր առաջացրել նրա կողմնակիցների շրջանում, որոնք երկրում անկարգություններ էին կազմակերպել։ Հուլիսի 15-ին հայտնի դարձավ, որ Յուն Սոկ Յոլը կրկին ձերբակալվել է, քանի որ դատարանը նաև մտավախություն է ունեցել, որ նա կարող է ոչնչացնել ապացույցները։