ԱՄՆ նախագահ Դոնալդ Թրամփը Truth Social սոցիալական ցանցում հայտարարել է, որ իր երկրի զինված ուժերը ոչնչացրել են Tren de Aragua թմրակարտելի առաջնորդին։
«Իմ հրահանգով Միացյալ Նահանգների Հարավային հրամանատարությունը արագ և մահաբեր կինետիկ հարված հասցրեց՝ հաջողությամբ վերացնելու Նինյո Գերերոյին՝ Tren de Aragua-ի տխրահռչակ առաջնորդին, որը Երկիր մոլորակի ամենաարյունարբու ահաբեկչական կազմակերպություններից մեկն է», – նշել է Թրամփը։
ԱՄՆ նախագահը նաև հերթական անգամ այս կապակցությամբ քննադատել է իր նախորդի՝ Ջո Բայդենի միգրացիոն քաղաքականությունը, որը, նրա խոսքով, երկրի հարավային սահմանը բացել էր «միլիոնավոր անօրինական հանցագործների համար»։
«Մինչ ես վերադարձա իմ պաշտոնին, Ջո Բայդենը բացել էր մեր հարավային սահմանը միլիոնավոր անօրինական հանցագործների համար և թույլ տվել, որ այդ օտար բանակը լիովին անպատիժ բռնաբարի, խեղի և սպանի ամերիկացի քաղաքացիներին։
Իմ նախընտրական արշավի ընթացքում ես երդվել էի վտարել այս հրեշներին մեր երկրից և վերականգնել արդարությունը նրանց ընտանիքների նկատմամբ, ում նրանք սպանել են, այդ թվում՝ թանկագին 12-ամյա Ջոսլին Նանգարայի, 22-ամյա Լեյքեն Ռեյլիի և անհամար այլ հրաշալի հոգիների։ Իրենց գործողություններով Միացյալ Նահանգների զինված ուժերը հատուցում բերեցին նրանց, նրանց ընտանիքների և նրանց սիրելիների համար։
Իմ վարչակազմի աշխատանքի սկզբում ես կատարեցի իմ խոստումը՝ Tren de Aragua-ն հայտարարել օտարերկրյա ահաբեկչական կազմակերպություն, արտաքսել հազարավոր վտանգավոր հանցագործների և պատերազմ սկսել կարտելների դեմ, որոնք վաղուց արդեն պատերազմ են վարում մեր քաղաքացիների դեմ, մինչդեռ թույլ առաջնորդները Ամերիկան թողել էին անօգնական և ստիպված՝ պաշտպանվելու։
Այս գործողությունը սերտորեն համակարգվել էր Վենեսուելայում մեր բարեկամների հետ, որոնց հետ մենք շատ լավ համագործակցում ենք։ Արդյունքում Tren de Aragua-ի ահաբեկիչներն այլևս ապաստան չունեն ոչ Վենեսուելայում, ոչ էլ որևէ այլ վայրում, և իմ ղեկավարության ներքո մենք կգտնենք այս չարասպաններին և նարկոբարոններին ցանկացած ժամանակ և ցանկացած վայրում և կուղարկենք նրանց դժոխքի խորքերը, որտեղ նրանց իսկական տեղն է», – նշել է Թրամփը։