Այսօր՝ հունիսի 13-ին, հայկական հեռուստատեսության ամենասիրված ու վաղաժամ կյանքից հեռացած դերասանուհիներից մեկի՝ Հասմիկ Ղարիբյանի ծննդյան օրն է: Այս տարի տաղանդավոր արտիստը կդառնար 46 տարեկան: Այս տխուր ու հիշարժան օրվա առթիվ դերասանուհու զարմուհին՝ Աիդա Ստեփանյանը, սոցիալական ցանցերի իր էջում հրապարակել է Հասմիկի լուսանկարը և կից կատարել սիրտ գրառում. «Այսօր մորաքույրս կդառնար 46 տարեկան…»։
Հասմիկ Ղարիբյանը ծնվել է 1980 թվականի հունիսի 13-ին Երևանում, տաղանդավոր դերասան Իշխան Ղարիբյանի ընտանիքում: Ունենալով բնատուր արտիստիզմ և մեծ տաղանդ՝ նա հանրությանը հայտնի ու սիրելի դարձավ 2000-ականների սկզբին՝ «Արմենիա» հեռուստաընկերությամբ հեռարձակվող լեգենդար «Կարգին հաղորդման» մանրապատումներում նկարահանվելուց հետո:
Հենց այս նախագծից էլ նա ստացավ իր հանրահայտ ու ժողովրդական «Կարգին Հասո» կեղծանունը: Հեռուստատեսային նախագծերից բացի, Հասմիկն իր վառ մասնակցությունն ունեցավ նաև թատերական ասպարեզում՝ խաղալով հանդիսատեսի կողմից սիրված «7.5» և «No comment» ներկայացումներում, ինչպես նաև 2011 թվականին իր ուրույն կերպարով փայլեց «Ալաբալանիցա» կատակերգական ֆիլմում: 2012 թվականին դերասանուհին տեղափոխվեց Միացյալ Նահանգներ՝ այնտեղ նոր կյանք սկսելու հույսով, սակայն ճակատագիրն այլ կերպ դասավորվեց: Ամերիկայում նրա մոտ ախտորոշվեց չարաբաստիկ հիվանդությունը՝ քաղցկեղը:
Ծանր ու երկարատև պայքարից հետո, 2014 թվականի նոյեմբերի 1-ին, ընդամենը 34 տարեկան հասակում սիրված դերասանուհին հեռացավ կյանքից՝ իր հետևից թողնելով անբուժելի ցավ և էկրաններից մեզ ժպտացող անմահ կերպարներ:
Հասմիկ Ղարիբյանի հիշատակը միշտ վառ կմնա հայ հանդիսատեսի սրտերում: