ԱՄՆ Միսսուրի նահանգում ինքնաթիռ է կործանվել, ինչի հետևանքով 12 մարդ է զոհվել, հայտնում է Associated Press-ը։
Միսսուրի նահանգի ճանապարհային ոստիկանության հայտարարության համաձայն, դեպքի վայրում աշխատում են Բաթլեր քաղաքի ոստիկանության աշխատակիցներն ու Բեյթս շրջանի շերիֆի վարչության ներկայացուցիչները՝ աջակցելով վթարի հետևանքների վերացմանը և արտակարգ ծառայությունների աշխատանքի կազմակերպմանը։
Աղետը տեղի է ունեցել Բաթլեր Մեմորիալ օդանավակայանի մոտակայքում, որը գտնվում է Կանզաս Սիթիից մոտ 105 կմ հարավ։
Միսսուրիի ճանապարհային ոստիկանության սերժանտ Ջասթին Յուինգը հայտնել է, որ ինքնաթիռն օգտագործվում էր պարաշյուտային սպորտով զբաղվելու նպատակով մարդկանց բարձրացնելու համար։
«Զանգ է ստացվել այն մասին, որ ինքնաթիռը կործանվել է և կրակի մեջ է մոտավորապես կիրակի առավոտյան ժամը 11:30-ին», — նշել է նա։
Ըստ նրա, օդանավը ընկել է օդանավակայանի հարևանությամբ գտնվող դաշտում։ Նախազգուշական նպատակով իշխանությունները փակում են հարակից ճանապարհները։
«Ինքնաթիռը վայրէջք է կատարել օդանավակայանի հարևանությամբ գտնվող դաշտում, սակայն, որքան հասկանում եմ, ճանապարհները փակվում են որպես նախազգուշական միջոց», — հավելել է Յուինգը։
Լրացուցիչ մանրամասներ առայժմ չեն հրապարակվում։ Աղետի պատճառների քննությամբ կզբաղվի ԱՄՆ Տրանսպորտային անվտանգության ազգային խորհուրդը։