Հայաստանում անհրաժեշտ է ընդլայնել հսկիչ-դրամարկղային մեքենաների (ՀԴՄ) էլեկտրոնային կտրոնների կիրառման մեխանիզմը։ Այս մասին հունիսի 17-ին Ազգային ժողովի նիստում՝ Հարկային օրենսգրքում փոփոխություններ և լրացումներ կատարելու մասին օրենքի նախագծի քննարկման ժամանակ, հայտարարել է Պետական եկամուտների կոմիտեի (ՊԵԿ) նախագահի տեղակալ Համլետ Սահակյանը։
ՊԵԿ նախագահի տեղակալի խոսքով՝ գործող կանոնների համաձայն՝ ՀԴՄ-ի կիրառումը պարտադիր է կազմակերպությունների, անհատ ձեռնարկատերերի և նոտարների համար՝ առևտրի կետերի միջոցով մանրածախ վաճառք իրականացնելիս, ինչպես նաև բնակչությանը աշխատանքներ կատարելու կամ ծառայություններ մատուցելու դեպքում։ Միևնույն ժամանակ, թղթային կտրոնից տվյալները հարկային մարմին են մուտքագրվում 30 րոպեից մինչև 38 ժամվա ընթացքում։
«Էլեկտրոնային կտրոնի կիրառումը թույլ կտա զգալիորեն արագացնել այս գործընթացը, ինչը ավելի հարմարավետ կդառնա նաև ապրանքների և ծառայությունների սպառողների համար։ Էլեկտրոնային ՀԴՄ-ն կարող է օգտագործվել կազմակերպությունների և անհատ ձեռնարկատերերի կողմից՝ վեբ-կայքի կամ էլեկտրոնային հավելվածի (էլեկտրոնային առևտրային հարթակի) միջոցով ստացված պատվերների շրջանակում ապրանքների մատակարարման, ծառայությունների մատուցման կամ աշխատանքների կատարման գործարքներ իրականացնելիս։ Դրա կիրառումը պարտադիր կդառնա պատվերների ձևավորման ժամանակ, օրինակ՝ կազմակերպությունների, անհատ ձեռնարկատերերի կամ ֆիզիկական անձանց կողմից իրականացվող ուղևորափոխադրումների դեպքում»,- պարզաբանել է Սահակյանը։
Ինչպես նշել է պաշտոնյան, տեխնոլոգիական զարգացմանը և թվային ծառայությունների աճին զուգընթաց՝ անհրաժեշտություն է առաջացել ընդլայնել էլեկտրոնային ՀԴՄ-ների կիրառման ոլորտները՝ դրանք դարձնելով սովորական ՀԴՄ-ներին այլընտրանքային գործիք։ Դա թույլ կտա ապահովել նույն գործառույթների իրականացումն ավելի պարզ ու ժամանակակից եղանակով։
«Մենք առաջարկում ենք միասնականացնել ՀԴՄ-ներին և էլեկտրոնային ՀԴՄ-ներին վերաբերող բոլոր դրույթները, ինչպես նաև սահմանել թույլատրող նորմ, որով Կառավարությունը կկարողանա սահմանել էլեկտրոնային ՀԴՄ-ների տեխնիկական պահանջները, դրանց հաշվառման և հաշվառումից հանման պարտադիր պահանջները, վեբ-կայքին կամ էլեկտրոնային հավելվածին ներկայացվող պահանջները, ինչպես նաև էլեկտրոնային ՀԴՄ-ների կիրառման կանոնները»,- հավելել է ՊԵԿ նախագահի տեղակալը։