ԱՄՆ նախագահ Դոնալդ Թրամփը կարծում է, որ Իրանի համար Միացյալ Նահանգների հետ փոխըմբռնման հուշագրի ստորագրումը համարժեք է կապիտուլյացիայի։ Այդ տեսակետը նա հայտնել է հունիսի 18-ին Axios պորտալին տված հարցազրույցում։
«Սա իսկապես, հավանաբար, անվերապահ կապիտուլյացիա է։ Ես այդպես եմ կարծում», – ասել է ԱՄՆ առաջնորդը։ Այսպես նա պատասխանել է լրագրողի դիտարկմանը, որը նշել էր, որ Թրամփը նախկինում հայտարարել էր Թեհրանից «անվերապահ կապիտուլյացիա» պահանջելու մտադրության մասին, իսկ կողմերի միջև փոխըմբռնման հուշագրի ստորագրումը չի վկայում հակամարտության նման ավարտի մասին։
«Մենք նրանց լիովին ռազմական պարտության ենք մատնել», – կարծում է Վաշինգտոնի վարչակազմի ղեկավարը։ «Մեզ մոտ աշխարհի ամենահզոր զինված ուժերն են», – պնդել է նա։ «Ուրիշ ո՞վ կարող էր նման շրջափակում սահմանել։ Ես [Իրանի] ծովային շրջափակում եմ սահմանել։ Եվ ոչ մի նավ չէր կարող անցնել», – ասել է Թրամփը։ Այն հարցին, թե հակամարտության արդյունքում արդյոք գիտակցե՞լ է ուժ կիրառելու իր հնարավորությունների սահմանափակվածությունը, Սպիտակ տան ղեկավարը պատասխանել է. «Սահմանափակումներ չկան»։
Ավելի վաղ մի քանի ամերիկացի օրենսդիրներ՝ դեմոկրատներից և իշխող Հանրապետական կուսակցության ներկայացուցիչներից, քննադատել էին Թրամփի վարչակազմին Իրանի դեմ ռազմական գործողություն իրականացնելու և Թեհրանի հետ պայմանավորվածությունների պայմանների համար։ Սենատոր Ռիչարդ Բլյումենթալը (դեմոկրատ, Կոնեկտիկուտ նահանգից), մասնավորապես, հուշագրի ստորագրումն անվանել է ամերիկյան կողմի համար «խայտառակ գործարք»։ Նրա խոսքով՝ դա նման է «անվերապահ կապիտուլյացիայի, բայց ոչ Իրանի, այլ ԱՄՆ-ի»։
The New York Times թերթը նույնպես նշել է, որ ԱՄՆ-ի և Իրանի միջև հակամարտության կարգավորման վերաբերյալ համաձայնագիրը նման չէ Թեհրանի «անվերապահ կապիտուլյացիայի» մասին փաստաթղթի, որի մասին ավելի վաղ խոսում էր Թրամփը։ Պարբերականի գնահատմամբ՝ Իրանը դուրս է եկել ԱՄՆ-ի հետ դիմակայությունից՝ ոչ միայն պահպանելով կայունությունը, այլև հասնելով իր համար շահավետ պայմանների, ներառյալ նավթի վաճառքից կրկին միլիարդավոր դոլարներ ստանալու հնարավորության վերականգնումը։