Բոլիվիայի նախագահ Ռոդրիգո Պասը երկրում արտակարգ դրություն է հայտարարել։ Այս որոշման պատճառը խորացող քաղաքական ճգնաժամն է, զանգվածային բողոքի ցույցերը և տնտեսության վատթարացումը։
Արդեն մի քանի շաբաթ է, ինչ ցուցարարները փակում են երկրի գլխավոր ճանապարհները։ Բողոքի ակցիաներին մասնակցում են արհմիությունները, ֆերմերները և նախկին նախագահ Էվո Մորալեսի կողմնակիցները։ Նրանք պահանջում են գործող նախագահի հրաժարականը, ինչպես նաև քաղաքական ու տնտեսական բարեփոխումներ։
Ճանապարհների շրջափակումը լրջորեն խաթարել է սննդամթերքի, վառելիքի և դեղորայքի մատակարարումը, իսկ որոշ շրջաններում տնտեսական կյանքը լիովին կաթվածահար է եղել։
«Ես արտակարգ դրություն եմ հայտարարել, որպեսզի բացենք երկրի ճանապարհները։ Բոլիվիացիները չպետք է պատանդ մնան այս շրջափակումներին, որոնք թույլ չեն տալիս աշխատել, սովորել, բժշկական օգնություն ստանալ և ընտանիք պահել»,- հայտարարել է Պասն իր ուղերձում։
Նախագահը հավելել է, որ արտակարգ դրությունը թույլ կտա ներգրավել բանակն ու ոստիկանությունը՝ կարգուկանոնը վերականգնելու համար։ Նրա խոսքով՝ իշխանությունները փորձել են հարցը լուծել երկխոսության միջոցով, սակայն ցուցարարների մի մասը դիմում է բռնության։
«Երկխոսության բոլոր հնարավորություններն սպառվելուց հետո մենք ստիպված էինք արտակարգ դրության ռեժիմ մտցնել ամբողջ երկրում»,- ասել է նա։
Այս ճգնաժամն ընթանում է Բոլիվիայի համար ծանր տնտեսական պայմաններում։ Երկրում կա վառելիքի և արտարժույթի դեֆիցիտ, կտրուկ աճում է գնաճը, իսկ գազի արտահանումը նվազել է։ Մարդկանց դժգոհությունն էլ ավելի է մեծացել այն բանից հետո, երբ կառավարությունը կրճատել է վառելիքի սուբսիդիաները։
Սա վերջին տարիների ամենածանր քաղաքական ճգնաժամն է Բոլիվիայում, որն արդեն կանգնեցրել է երկրի տնտեսության մի զգալի մասը։