ԱՄՆ-ի փոխնախագահ Ջեյ Դի Վենսն այսօր Շվեյցարիայում ներկայացրել է Իրանի և ԱՄՆ-ի միջև վերջին բանակցությունների թարմացված տեղեկությունները և հայտարարել, որ «մեծ առաջընթաց» է արձանագրվել, հայտնում է The Guardian-ը։
Վենսը լրագրողներին ասել է, որ թեև «Իրանը եղել է տարածաշրջանային անկայունության շարժիչ ուժը», սակայն կցանկանար, որ այն կարողանա տեսնել այնպիսի ապագա, որտեղ բոլորը «կկարողանան միասին աշխատել խաղաղության և բարգավաճման խթանման համար»։
Նա ասել է, որ ԱՄՆ նախագահ Դոնալդ Թրամփը ձգտում է տարածաշրջանում լիակատար հրադադարի, սակայն ընդունել է, որ հրադադարը «մի փոքր խճճված է»։
Ըստ ԱՄՆ-ի փոխնախագահի, տեխնիկական բանակցությունները, հնարավոր է, չլուծեն բոլոր տարաձայնությունները, սակայն «թույլ կտան մեզ պատմության մեջ առաջին անգամ հավաքվել միասին որպես թիմեր»։
«Վերջին մի քանի ամիսները չհաշված՝ մինչև այդ երբեք իրանական և ամերիկյան ղեկավարությունները նման բարձր մակարդակով հանդիպում չէին անցկացրել», – ասել է Վենսը։
Նա հավելել է, որ ամերիկացի բանակցողները գտնվում են Շվեյցարիայում, որպեսզի «դիվանագիտության և համատեղ աշխատանքի միջոցով վերափոխեն Մերձավոր Արևելքը, որտեղ Իրանը և Պարսից ծոցի երկրները միմյանց հետ պատերազմի վիճակում են»։