ԱՄՆ պետքարտուղար Մարկո Ռուբիոն, որն այցելել է Պարսից ծոցի երկրներ, հայտարարել է, որ Վաշինգտոնը հաշվի է առնում տարածաշրջանային դաշնակիցների դիրքորոշումները Իրանի հետ բանակցությունների և Լիբանանի վերաբերյալ համաձայնագրերի քննարկման շրջանակում, հաղորդում է CNN հեռուստաալիքը։
Երեքշաբթի ժամանելով Արաբական Միացյալ Էմիրություններ՝ նա հայտնել է, որ իր այցի նպատակը ԱՄԷ, Քուվեյթ և Բահրեյն, ինչպես նաև հանդիպումը Պարսից ծոցի արաբական պետությունների համագործակցության խորհրդի (GCC) հետ այն է, որ լսի գործընկերների դիրքորոշումները անվտանգության և տնտեսության հարցերի շուրջ։
«Մենք այստեղ իսկապես ավելի շատ լսելու, քան խոսելու համար ենք»,- Աբու Դաբիի օդանավակայանում լրագրողներին ասել է Ռուբիոն՝ հավելելով, որ ԱՄՆ-ն ցանկանում է հաշվի առնել դաշնակիցների կարծիքները որոշումներ ընդունելիս, հատկապես Շվեյցարիայում տեղի ունեցած բանակցություններից հետո։
Նա նշել է, որ դաշնակիցները «աջակցում են խաղաղության գաղափարին», սակայն ընդգծել է, որ ապագա համաձայնագրերի մանրամասները դեռևս մնում են քննարկման առարկա։ Ըստ նրա՝ «դեռ շատ անելիք կա», չնայած այն հանգամանքին, որ վերջին 72 ժամվա ընթացքում «լավ հիմք» է դրվել։
Ռուբիոն հայտարարել է նաև, որ չի դիտարկում դաշնակիցների ֆինանսական մասնակցության հարցը քննարկվող՝ Իրանի վերականգնման հիմնադրամին, որի ծավալը կազմում է շուրջ 300 միլիարդ դոլար՝ դա անվանելով «հեռավոր ապագայի հարց»։
ԱՄՆ պետքարտուղարը նշել է, որ տարածաշրջանային երկրների հետ բանակցություններում, ըստ ամենայնի, կբարձրացվի Իրանի հրթիռային ծրագրի և նրա կողմից դաշնակից զինված խմբավորումներին աջակցելու թեման, ինչը, ըստ նրա, ամբողջությամբ արտացոլված չէ ԱՄՆ-ի և Իրանի միջև փոխըմբռնման հուշագրում։
Առանձնահատուկ նա ընդգծել է, որ Լիբանանի շուրջ բանակցություններն ընթանում են Իրանի հետ երկխոսությունից անկախ։ Նա ընդգծել է, որ Լիբանանն ինքնիշխան պետություն է, և Վաշինգտոնն ուղղակիորեն կաշխատի նրա կառավարության հետ։
Միևնույն ժամանակ, Ռուբիոն ընդունել է «իրանական գործոնի» առկայությունը լիբանանյան հարցում, որը կապված է «Հըզբոլլահ» շարժմանն աջակցելու հետ, և նշել է, որ այդ խնդիրը կքննարկվի Թեհրանի հետ ավելի լայն խորհրդակցությունների շրջանակում։