Այսօր հայկական մշակութային աշխարհը տոնում է մեծանուն արտիստ, ՀՀ ժողովրդական արտիստ և պարարվեստի անխոնջ մշակ Արտյուշա Կարպետյանի ծննդյան տարեդարձը։
Հայկական պարի վարպետն այսօր դառնում է պատկառելի 98 տարեկան։
Արտյուշա Կարպետյանի անունը հայկական պարարվեստի պատմության մեջ գրված է ոսկե տառերով։ Նա այն եզակի մեծերից է, ով իր ողջ կյանքն ու տաղանդը նվիրաբերել է ազգային պարի պահպանմանը, զարգացմանն ու այն սերունդներին անաղարտ փոխանցելու սուրբ գործին։
Այս գեղեցիկ առիթով Վարպետին սրտառուչ շնորհավորանք է հղել նրա թոռնուհին՝ պարուհի և դերասանուհի Աիդա Կարպետյանը։ Նա սոցցանցերի իր էջում կիսվել է ջերմ մաղթանքներով, որոնք լի են մեծ սիրով և երախտագիտությամբ.
«Դեռ 98 տարեկան, իմ Պապո՛… Շնորհավոր սիրուն ծնունդդ։ Ապրում ու ապրեցնում ես քո ներկայությամբ ու տարիների ստեղծած քո արվեստով։ Ուզում եմ դեռ երկար վայելել ներկայությունդ։ Անսահման շատ եմ սիրում… Դու միայն մեզ համար կարևոր չես, դու սիրված ու թանկ ես բոլոր այն սերունդների համար, ում փոխանցել ես քո արվեստը»:
Վարպետի ծննդյան տարեդարձը վերածվել է իսկական տոնի նաև համացանցում։ Հազարավոր օգտատերեր, արվեստագետներ և նրա սաները միացել են շնորհավորանքներին՝ մաղթելով լեգենդար պարուսույցին քաջառողջություն, կորով և երկար տարիների կյանք։
Արտյուշա Կարպետյանի կերպարն այսօր էլ շարունակում է ոգեշնչել երիտասարդ պարողներին՝ հիշեցնելով, որ արվեստը տարիք չունի, երբ այն մատուցվում է հոգով և նվիրումով։