Լիբանանի վարչապետ Նավաֆ Սալամն այցելել է Զաուտար էլ Ղարբիա քաղաք, որտեղից երեքշաբթի դուրս էին բերվել իսրայելական զորքերը, և քաղաքապետարանի հրապարակում բարձրացրել հանրապետության դրոշը։
«Լիբանանի կառավարությունն ազգային խնդիր է համարում բռնազավթման լիակատար դադարեցումը, – հայտարարել է նա։ – Մենք դեռ ճանապարհի սկզբում ենք, բայց լի ենք վճռականությամբ և գործադրում ենք դիվանագիտական բոլոր ջանքերը՝ մեր ողջ տարածքից իսրայելական զորքերի դուրսբերումն ապահովելու համար»։
Վարչապետը հայտնել է, որ պետությունն արդեն միջոցներ է ուղղում խաղաղ բնակիչների վերադարձը կազմակերպելու համար։ «Լիբանանյան բանակն այստեղ է քաղաքացիներին պաշտպանելու համար․ տեղակայմանը զուգահեռ՝ այն մաքրում է ճանապարհներն ու փլատակները, ինչը թույլ կտա բնակչությանը՝ ապահով ու արժանապատվորեն վերադառնալ իրենց տներն ու գյուղերը», – ընդգծել է նա։
Սալամի խոսքով՝ ժողովրդի իրենց հող վերադարձը «խորհրդանշում է Լիբանանի միասնությունն ու ինքնիշխանության վերականգնումը»։
Իսրայելի հետ ձեռք բերված համաձայնությամբ՝ Զաուտար էլ Ղարբիան դարձել է երկրի հարավում առաջին «պիլոտային գոտու» կենտրոնը։ Այնտեղ տեղակայված լիբանանյան բանակի ստորաբաժանումները պետք է ցույց տան տարածաշրջանում կայունություն պահպանելու իրենց ունակությունը և ձեռնամուխ լինեն շիական «Հեզբոլլահ» կազմակերպության կողմնակիցների զինաթափմանը։