ԱՄՆ Պետդեպարտամենտը նոր պատժամիջոցներ է սահմանել: «Ֆեդերալ Ռեգիստր»-ում հրապարակված ծանուցման համաձայն, պատժամիջոցները ուժի մեջ են մտել հուլիսի 24-ին:
Պատժամիջոցների ցանկում են Ռուսաստանի Պաշտպանության նախարարության գլխավոր հրթիռային և հրետանային վարչությունը, Պաշտպանության նախարարության առաջադեմ միջճյուղային հետազոտությունների և հատուկ նախագծերի վարչությունը, Ռուսաստանի Դաշնության ցամաքային զորքերը, ինչպես նաև 1061-րդ նյութական աջակցության կենտրոնը:
Սահմանափակումները վերաբերում են նաև «Գիդեոն Ալֆա» և «Միջազգային ներդրումային ընկերություն» ընկերություններին, դրանց դուստր ձեռնարկություններին և իրավահաջորդներին, ինչպես նաև հինգ Ռուսաստանի քաղաքացիների՝ Անդրեյ Գուսևի, Անդրեյ Կոսոլապովի, Վլադիսլավ Մորոզիկի, Ալեքսանդր Պրիխոդկոյի և Սերգեյ Ցիբարևի: Ամերիկյան կողմի պնդմամբ, պատժամիջոցների ցանկում ընդգրկված անձինք ներգրավված են ապրանքների, տեխնոլոգիաների և ծառայությունների փոխանցման կամ ձեռքբերման մեջ, որոնք կարող են օգտագործվել զանգվածային ոչնչացման զենքի, ինչպես նաև թևավոր և բալիստիկ հրթիռային համակարգերի ստեղծման մեջ՝ Իրանի, Հյուսիսային Կորեայի և Սիրիայի շահերից ելնելով:
Նոր սահմանափակումներն արգելում են ԱՄՆ կառավարական գործակալություններին որևէ պայմանագիր կնքել պատժամիջոցների ցուցակում ընդգրկված անձանց հետ, նրանցից ապրանքներ և ծառայություններ գնել, ֆինանսական կամ այլ աջակցություն տրամադրել, ինչպես նաև ռազմական արտադրանքի արտահանում կատարել: Պատժամիջոցները սահմանվում են երկու տարով, սակայն ԱՄՆ պետքարտուղարն ունի անհատական բացառություններ անելու լիազորություն: