Հորդանանը նախազգուշացրել է Երուսաղեմում Ալ-Աքսա մզկիթի համալիրի նկատմամբ վերահսկողությունը զավթելու «սպառնալից» փորձի մասին և հայտարարել կրոնական առճակատման վտանգի մասին։ Այդ կապակցությամբ Ամմանը հրավիրում է արաբական և իսլամական պետությունների արտգործնախարարների արտակարգ հանդիպում, հայտնում է The Guardian-ը։
Հորդանանի ԱԳ նախարար Այման Սաֆադին հայտարարել է, որ Ալ-Աքսայի համալիրի տարածքում գործող կարգի ցանկացած փոփոխություն կարող է հանգեցնել լայնածավալ էսկալացիայի, որի հետևանքները դուրս կգան Պաղեստինի և Հորդանանի սահմաններից։
Սրբավայրերի կարգավիճակի վերաբերյալ՝ ըստ XX դարի կեսերից գործող և 1994 թվականին Իսրայելի ու Հորդանանի միջև կնքված խաղաղության պայմանագրով հաստատված համաձայնագրի, մահմեդականներին թույլատրվում է աղոթել համալիրի տարածքում, մինչդեռ ոչ մահմեդականները կարող են այցելել այն՝ առանց կրոնական արարողություններ անցկացնելու։
Ամմանի անհանգստության պատճառը դարձել են համալիրի տարածք իսրայելական ծայրահեղ աջ շրջանակների ներկայացուցիչների հաճախացած այցերը։
Մասնավորապես, հուլիսի 23-ին Իսրայելի ազգային անվտանգության նախարար Իթամար Բեն-Գվիրի գլխավորությամբ ավելի քան 2 հազար իսրայելցի կրոնական ակտիվիստներ այցելել են տարածք, որը հրեաներին հայտնի է որպես Տաճարի լեռ, որտեղ, հորդանանյան իշխանությունների պնդմամբ, կատարվել են աղոթքներ և կրոնական ծեսեր։
Սաֆադին հայտարարել է, որ Երուսաղեմը «վառոդի տակառ» է, և կոչ է արել միջազգային հանրությանը ուշադրություն դարձնել գործող կարգի փոփոխության հնարավոր հետևանքներին։
Հորդանանում նաև մտավախություն ունեն Հորդանան գետի Արևմտյան ափին իրավիճակի հետագա սրման և պաղեստինցիների հնարավոր զանգվածային տեղահանման վերաբերյալ։ Ամմանը նման սցենարն անվանել է «կարմիր գիծ» և հայտարարել, որ թույլ չի տա պաղեստինյան բնակչության տեղափոխումը թագավորության տարածք։
Հորդանանի և Իսրայելի հարաբերությունները վերջին ամիսներին բարդացել են նաև ջրային համաձայնագրի շուրջ տարաձայնությունների և Գազայի հատվածում իրավիճակի պատճառով։ Ամմանում կարծում են, որ իսրայելական իշխանությունների գործողությունները մեծացնում են կառավարության վրա ներքին ճնշումը և վտանգի տակ դնում տարածաշրջանի կայունությունը։
Արտակարգ հանդիպմանը հրավիրված են Արաբական պետությունների լիգայի երկրների ներկայացուցիչները, ինչպես նաև Թուրքիայի, Ինդոնեզիայի, Մալայզիայի և Պակիստանի ներկայացուցիչները։