Կիեւը եւ Կիեւի մարզը կեսգիշերից հետո ենթարկվել են ռուսական բալիստիկ հրթիռների եւ անօդաչու թռչող սարքերի հարձակման։ Ուկրաինական իշխանությունների տվյալներով՝ զոհվել է առնվազն 15 մարդ, տասնյակ մարդիկ վիրավորվել են, իսկ ինչպես մայրաքաղաքում, այնպես էլ մարզում խոշոր հրդեհներ են բռնկվել։
Ռուսաստանի պաշտպանության նախարարությունը հայտնել է, որ իրականացվել է զանգվածային հարված՝ «ցամաքային տեղակայման բարձր ճշգրտության զենքով եւ մեծ հեռահարության հարվածային անօդաչու թռչող սարքերով»։ Հայտարարության համաձայն՝ հարձակման թիրախներն են եղել «Կիեւ քաղաքում եւ Կիեւի մարզում գտնվող տրանսպորտային-լոգիստիկ եւ բաշխիչ կենտրոնները, որոնք օգտագործվել են տարբեր տեսակի սպառազինության, ռազմական նշանակության բեռների պահպանման եւ մատակարարման, ինչպես նաեւ անօդաչու թռչող սարքերի արտադրության եւ բաշխման համար»։
Բացի այդ, Ռուսաստանի ռազմական գերատեսչության հայտարարության համաձայն, Օդեսայից հարավ խոցվել է նաեւ երեք բեռնանավ։ Ուկրաինական կողմը այդ մասին չի հայտնել, գրում է BBC-ին։