Սերբիայի նախագահ Ալեքսանդր Վուչիչը հայտնել է, որ առաջիկայում Սերբիայի՝ Եվրամիությանն անդամակցելու իրատեսական հնարավորություն չի տեսնում։ Այս մասին նա ասել է Բելգրադում՝ Ուկրաինայի նախագահ Վլադիմիր Զելենսկու հետ համատեղ մամուլի ասուլիսի ժամանակ, փոխանցել է «Европейская правда»-ն։
Վուչիչի խոսքով՝ նա հասկանում է Ուկրաինայի ձգտումը հնարավորինս շուտ բացել ԵՄ-ի հետ մնացած բոլոր բանակցային կլաստերները, սակայն կարծում է, որ Սերբիային առայժմ չի հաջողվի դառնալ միավորման անդամ «բազմաթիվ քաղաքական պատճառներով»։
«Բայց ես, առաջին հերթին՝ Սերբիայի համար, հիմա ես Ուկրաինայի մասին չեմ խոսում, մոտ ապագայում բազմաթիվ քաղաքական պատճառներով ԵՄ անդամ դառնալու հնարավորություն չեմ տեսնում», — ասել է Սերբիայի նախագահը։
Վուչիչը նշել է, որ ցանկանում է, որպեսզի Ուկրաինան, Մոլդովան և մյուս երկրները միանան Եվրամիությանը։ Միևնույն ժամանակ, նրա խոսքով, վստահություն չկա, որ ԵՄ բոլոր պետությունները դրական են վերաբերվում միավորման հետագա ընդլայնմանը։
«Բայց ես չեմ կարծում, որ դա բացարձակապես անվիճելի է, թե բոլոր եվրոպացիները դրական են վերաբերվում ԵՄ-ին (մեր երկրների) անդամակցությանը։ Եվ ես միշտ այդ մասին բացահայտ եմ խոսում։ Մեզ համար նրանք կգտնեն խորվաթների, բուլղարների, հոլանդացիների, իսկ Ուկրաինայի համար կգտնեն մեկ ուրիշին։ Բայց ես այս պահին դա գործնականում իրատեսորեն կյանքի կոչելու հնարավորություն չեմ տեսնում», — հայտարարել է Վուչիչը։
Միաժամանակ, նա հավաստիացրել է, որ Բելգրադը չի խոչընդոտի Ուկրաինայի եվրոպական ինտեգրմանը։
«Մենք չենք ասի. «Սկզբում մեզ վերցրեք, Ուկրաինային մի վերցրեք»։ Ուկրաինան երբեք նման խնդիր չի ունենա, առնվազն այնպիսի փոքր երկրի կողմից, ինչպիսին Սերբիան է», — ընդգծել է նախագահը։
Վուչիչը նաև կարծիք է հայտնել, որ ԵՄ ներսում այժմ չի ձևավորվի բավականաչափ ուժեղ աջակցություն թեկնածու երկրների եվրաինտեգրման գործընթացն արագացնելու համար։
Ավելի վաղ Սերբիայի նախագահը հայտարարել էր, որ աջակցում է Ուկրաինայի՝ ԵՄ-ին անդամակցելու ձգտմանը և նրան մաղթել էր հնարավորինս շուտ բացել ու փակել բոլոր բանակցային կլաստերները։ Կիևը հույս ունի աշնանը բացել մնացած կլաստերները և մինչև 2027 թվականի վերջ ավարտել Եվրամիությանն անդամակցելու շուրջ բանակցությունները։