Երիտասարդները, որոնք չեն աշխատում, չեն ստանում կրթություն կամ չեն վերապատրաստվում, Մեծ Բրիտանիային տարեկան արժենում են մոտ 125 միլիարդ ֆունտ ստեռլինգ․ գրում է The Guardian-ը։
Երիտասարդներից շատերը մեծացել են 2008 թվականի ֆինանսական ճգնաժամի և կորոնավիրուսային համավարակի ժամանակ և այժմ բախվում են կենսապահովման ծախսերի աճի, հանրային ծառայությունների կրճատման և արհեստական բանականության զարգացման պատճառով աշխատաշուկայի փոփոխություններին։
Միևնույն ժամանակ՝ Մեծ Բրիտանիայի երիտասարդական ծառայությունների համար արվող ծախսերը նվազել են 1.3 միլիարդ ֆունտ ստեռլինգով կամ 76%-ով։ Հազարավոր երիտասարդական ակումբներ փակվել են, և շատ սոցիալական աշխատողներ լքել են իրենց պաշտոնները։
Ինչպես նշում է The Guardian-ը, կառավարությունը նախընտրում է գումար ծախսել խնդիրների հետևանքները լուծելու, այլ ոչ թե դրանք կանխելու վրա։ Երիտասարդների զբաղվածության համար ծախսված յուրաքանչյուր ֆունտի դիմաց 25 ֆունտ ստեռլինգ է ծախսվում նպաստների համար։
Նշվում է, որ կառավարության ծախսերը կշարունակեն աճել, եթե կառավարությունը չկարողանա երիտասարդներին վերադարձնել աշխատանքի և կրթության։