Վաշինգտոնյան խաղաղության հռչակագրի մեկ տարին լրացել է, և այսօր մեր բոլոր քաղաքացիները կարող են զգալ, որ խաղաղությունն իսկապես հաստատվել է։ Այս մասին, այսօր՝ օգոստոսի 10-ին խորհրդարանում լրագրողների հետ զրույցում հայտարարել է իշխող «Քաղաքացիական պայմանագիր» խմբակցության պատգամավոր Սոնա Ղազարյանը։
Նա հիշեցրել է, որ հաղորդակցությունների ապաշրջափակման գործընթացի շրջանակում Հայաստան են այցելել ԱՄՆ-ի բարձրաստիճան պաշտոնյաներ, և ավելացվել է TRIPP նախագծի բյուջեն։ Ղազարյանը շեշտել է, որ Կառավարությունը չի նահանջել իր «կարմիր գծերից» և չի գնացել որևէ տարածքային զիջման, իսկ TRIPP նախագիծն ինքնին «միջանցք» չէ (չնայած հակառակ հայտարարություններին, որոնք Ադրբեջանը գրեթե ամեն օր հնչեցնում է – խմբ.)։ «Մենք միշտ ասել ենք, որ հաղորդակցությունները ապաշրջափակվելու են առանց մեր ինքնիշխանությանը և իրավունքներին վնաս հասցնելու, և հենց դա էլ մենք արեցինք», – հավելել է իշխող կուսակցության պատգամավորը։
Մեկնաբանելով ապաշրջափակման ժամկետների և պայմանների վերաբերյալ ընդդիմության մեղադրանքները՝ նա հավաստիացրել է, որ հարևանների հետ ընթացող գործընթացները միմյանցից անկախ են։ Նրա խոսքով՝ հայկական կողմն անում է հնարավոր ամեն ինչ, որպեսզի տեղավորվի հայտարարված ժամկետների մեջ, իսկ երկրի ինքնիշխանությունը կասկածի տակ դնելու կամ օտարածին նարատիվներ առաջ մղելու ցանկացած փորձ իշխանությունները կոշտորեն կասեցնում են։
Պատասխանելով քաղաքական գործիչների աղմկահարույց հայտարարությունների և իրավապահների կողմից անձնական տվյալների արտահոսքի վերաբերյալ լրագրողների հարցերին՝ պատգամավորը նշել է մարդու իրավունքների պահպանման անհրաժեշտությունը։ «Մենք պետք է ամեն ինչ անենք, որպեսզի խորհրդարանի աշխատանքը չխաթարվի, իսկ քաղաքացիների իրավունքներն ու մարդկային արժանապատվությունը անվերապահորեն պահպանվեն», – ամփոփել է Սոնա Ղազարյանը։