ԵՐԵՎԱՆ, 11 օգոստոսի․/ԱՌԿԱ/. Հայաստանի Կենտրոնական բանկի խորհուրդը հաստատել է էլեկտրոնային փողերի թողարկման և օգտագործման կարգավորման փոփոխությունները, որոնք ուղղված են առավել արդյունավետ և մրցունակ վճարային միջավայրի ձևավորմանը:
Ինչպես հայտնում է ԿԲ պաշտոնական կայքը, կատարած փոփոխություններով հանվել է էլեկտրոնային փողի հաշվառման հաշիվ (դրամապանակ) բացելու համար բանկային հաշիվ կամ վճարային քարտ ունենալու պարտադիր պահանջը։ Միաժամանակ հնարավորություն է ստեղծվել էլեկտրոնային փողի հաշվառման հաշիվների լիցքավորումն ու մարումն իրականացնել ոչ միայն անկանխիկ, այլ նաև կանխիկ եղանակով:
«Նոր կարգավորման արդյունքում հաճախորդների համար էականորեն պարզեցվում է էլեկտրոնային փողի օգտագործումը․ այն դառնում է ավելի արագ և հարմար՝ հատկապես այն անձանց համար, ովքեր չեն օգտվում բանկային հաշիվներից կամ վճարային քարտերից», -նշվում է ԿԲ հաղորդագրության մեջ:
Ընդ որում, նոր մոտեցմամբ հաճախորդների նույնականացումը կիրականացվի գործող օրենսդրությամբ սահմանված պատշաճ ուսումնասիրության ընթացակարգերի համաձայն՝ ապահովելով «Փողերի լվացման և ահաբեկչության ֆինանսավորման դեմ պայքարի մասին» օրենքի պահանջների լիարժեք պահպանմամբ։
Կենտրոնական բանկից նաև նշում են, որ վճարահաշվարկային կազմակերպությունների համար ձևավորվում է ավելի մրցակցային և հավասար դաշտ․ նրանք հնարավորություն են ստանում ընդլայնել իրենց ծառայությունների շրջանակը, նվազեցնել գործառնական կախվածությունը բանկային ենթակառուցվածքներից։
«Փոփոխությունների նպատակն է ընդլայնել էլեկտրոնային փողի օգտագործման հասանելիությունը, ստեղծել հավասար մրցակցային պայմաններ ֆինանսական կազմակերպությունների համար, խթանել նորարարական վճարային լուծումների զարգացումը», – ասվում է ԿԲ հաղորդագրության մեջ:
ԿԲ-ում ակնկալում են, որ փոփոխությունների արդյունքում կավելանա էլեկտրոնային փողի կիրառման տարածվածությունը, կբարելավվի շուկայում մրցակցությունը և կձևավորվի առավել արդյունավետ և ներառական վճարային միջավայր: