Երևանում 2026թ․ հոկտեմբերին ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովին (COP17) ընդառաջ «Էկոլուր» տեղեկատվական ՀԿ-ն իրազեկման հանդիպումներ է անցկացնում մարզերում։
Եղեգնաձոր համայնքը հարուստ բնաշխարհ ունի, ներառում է տարածքներ, որոնք հանդիսանում են էկոմիջանցք վայրի կենդանիների համար։ Եղեգնաձորը գրավում է զբոսաշրջիկներին իր լանդշաֆտներով, Եղեգնաձորում են մշակվում խաղողի էնդեմիկ տեսակներ, որոնցից պատրաստված գինին զբաղեցնում է իր ուրույն տեղը հայտնի «Գինու ուղու» քարտեզում։
2026թ․ օգոստոսի 3-ին Եղեգնաձոր համայնքի Վերնաշեն բնակավայրում «Էկոլուր» տեղեկատվական ՀԿ-ն COP17-ին ընդառաջ իրազեկման հանդիպում անցկացրեց։ Հանդիպմանը մասնակցեցին Վայոց ձորի մարզպետարանի, Եղեգնաձոր համայնքի ՏԻՄ-ի, քաղաքացիական հասարակության ներկայացուցիչներ և տեղի ակտիվ բնակիչներ։
Հանդիպման ընթացքում «Էկոլուր» տեղեկատվական ՀԿ-ի փոխնախագահ Վիկտորյա Բուռնազյանը ներկայացրեց COP17-ի հիմնական նպատակները, ՀՀ կենսաբազմազանության պահպանության ազգային ծրագրի թիրախները, ինչպես նաև Եղեգնաձորի բնության նշանակությունը՝ Հայաստանի կողմից սահմանված թիրախներին հասնելու համատեքստում։
Քննարկվեցին նաև Եղեգնաձոր համայնքի ներկայացուցիչների՝ COP17-ին մասնակցության հնարավորությունները։
«Քաղաքացիական հասարակության առաջնորդության և կենսաբազմազանության կառավարման ամրապնդումը՝ Հայաստանում կայանալիք COP17-ի նախօրեին» ծրագիրն իրականացնում է «Էկոլուր» տեղեկատվական ՀԿ-ն՝ Հայնրիխ Բյոլ հիմնադրամի հայաստանյան մասնաճյուղի աջակցությամբ։
Այս հոդվածում արտահայտված մտքերը հեղինակինն են և չեն արտահայտում Հայնրիխ Բյոլ հիմնադրամի Հարավային Կովկասի տարածաշրջանի երևանյան գրասենյակի տեսակետը։
Հանդիպման մանրամասները՝ հաջորդ հրապարակումներում։
Օգոստոս 12, 2026 at 14:20