Author: Julbaz

Կայացել է ԿԳՄՍ նախարարության միջգերատեսչական հնագիտական հանձնաժողովի չորորդ նիստը, որի ընթացքում քննարկվել են 2025 թ. 15 հուշարձանների տարածքներում կատարված հնագիտական պեղումների հաշվետվությունները, այդ թվում՝ Արարատի մարզի Մասիս քաղաքի Մասիս բլուրում (Ենգիջա), Արագածոտնի մարզի Արուճ գյուղի Արուճի միջնադարյան ամրոց-դղյակում, Արմավիրի մարզի Մեծամոր համայնքի Հայկավան, Ջրաշեն, Արտագերս, Նոր Արմավիր գյուղերի միջտարածքում, Հին Հայաստանի մայրաքաղաք Արմավիրում, Արմավիրի մարզի Նոր Արմավիր գյուղի Արգիշթիխինիլի քաղաքի դամբարանադաշտում, Կոտայքի մարզի Ծաղկաձոր համայնքի Կեչառիսի վանական համալիրում, Արագածոտնի մարզի Շամիրամ գյուղի երկաթեդարյան դամբարանադաշտում, Արմավիրի մարզի Նոր Արմավիր և Ջրաշեն համայնքների տարածքում գտնվող Արգիշթիխինիլի հնավայրում, Տավուշի մարզի Իջևան համայնքի Ենոքավան գյուղի Գետահովիտ-2 քարայրում, Սյունիքի մարզի Կապան քաղաքի Ողջի գետի աջ ափին գտնվող «Տանձի լենջ» կոչվող վայրում, Սյունիքի մարզի Վերին Խոտանան գյուղի Վանանդաբերդի ամրոցում, Արարատի մարզի Փոքր Վեդի և Լուսառատ համայնքների տարածքում գտնվող Հին Արտաշատ մայրաքաղաքում, ինչպես նաև Արարատի մարզի Վեդի, Դաշտաքար, Ուրցաձոր, Շաղափ, Լանջանիստ, Լուսաշող և Լանջառ համայնքների տարածքում գտնվող Վեդիի ամրոցում, Երևան քաղաքի Հրազդան գետի կիրճի Երևան-1 քարայրում և այլ վայրերում։

Միջգերատեսչական հանձնաժողովը վերոնշյալ վայրերում իրականացված պեղումների հաշվետվություններին տվել է դրական եզրակացություն և թույլատրել է 2026 թվականին շարունակել պեղումները (տրամադրելով համապատասխան թույլտվություն՝ բաց թերթիկ)։

ՀՀ անկախության 35-ամյակի միջոցառումների շրջանակում ապրիլի 27-ից մայիսի 16-ը Հայաստանի ազգային ֆիլհարմոնիկ նվագախումբը 14 համերգով հանդես կգա Եվրոպայի հինգ մշակութային կենտրոններում: Շրջագայությունն իրականացվում է ԿԳՄՍ նախարարության աջակցությամբ և ընդգրկում է Իտալիայի, Գերմանիայի, Շվեյցարիայի, Ավստրիայի և Իսպանիայի հեղինակավոր համերգասրահները:

Նվագախմբի հետ հանդես կգան մեր ժամանակների մեծագույն ջութակահար Օգյուստեն Դյումեյը, հայազգի ջութակահար Սերգեյ Խաչատրյանը, դաշնակահարուհի Եվա Գևորգյանը, իտալացի թավջութակահար Էտտորե Պագանոն, դիրիժորներ Էդուարդ Թոփչյանը (Հայաստան), Պիեռ Կառլո Օրիցիոն (Իտալիա) և Բենջամին Ցվիկը (Շվեյցարիա):

Համերգային երկացանկում ընդգրկված են դասական երաժշտության գլուխգործոցներ․ կհնչեն Դմիտրի Շոստակովիչի Սիմֆոնիա թիվ 10-ը, Գուստավ Մալերի «Տիտան» սիմֆոնիան, Վոլֆգանգ Ամադեուս Մոցարտի Ջութակի թիվ 3 կոնցերտը, Մաքս Բրուխի Ջութակի թիվ 1 կոնցերտը, Յոհաննես Բրամսի Ջութակի կոնցերտը, Պյոտոր Չայկովսկու Դաշնամուրի թիվ 1 կոնցերտը և Անտոնին Դվորժակի Թավջութակի կոնցերտը, ինչպես նաև հատվածներ Արամ Խաչատրյանի «Սպարտակ» և «Գայանե» բալետներից: Համերգային շրջագայությունը յուրօրինակ մասնագիտական քննություն է, որը ևս մեկ անգամ կփաստի Հայաստանի ազգային ֆիլհարմոնիկի կատարողական մակարդակն ու մրցունակությունը եվրոպական լավագույն նվագախմբերի կողքին: