Author: Julbaz

«Ապրելու երկիր» կուսակցության համահիմնադիր Մեսրոպ Առաքելյանի ֆեյսբուքյան գրառումը. ««Մեր ժողովուրդը մանկան պես միամիտ է ու դյուրահավատ։ Նա ծանր պատմություն է ունեցել, նրան շատ են խաբել։ Ես երբեք չեմ խաբի ժողովրդին։ Եվ եթե իմ գործունեության ընթացքում ինձ հաջողվի թեկուզ փոքր-ինչ բարձրացնել ազգի մակարդակը, իմ պատմական առաքելությունը կհամարեմ կատարած»։
     Այս խոսքերը պատկանում են Հայաստանի ազգային հերոս, պետական և քաղաքական խոշոր գործիչ Կարեն Դեմիրճյանին։ Այսօր նա կդառնար 94 տարեկան։
     Դեմիրճյանն այն եզակի առաջնորդներից էր, ում կերպարը մեր հավաքական հիշողության մեջ դրոշմվել է հպարտության, կարոտի և խորը ափսոսանքի զգացումներով։
     Նրա մեծության հիմքում ընկած էր պետականամետ մտածողությունը և մարդակենտրոն վերաբերմունքը։ Դեմիրճյանը սիրում էր իր երկիրը ոչ թե խոսքերով, այլ ամենօրյա քրտնաջան աշխատանքով և իր ժողովրդի արժանապատվությունը բարձր պահելու անկոտրում կամքով։
     Կարեն Դեմիրճյանի մասին խոսելը հեշտ է, նրա չափանիշներով ապրելը՝ ոչ բոլորին հարմար։ Կամ մենք բարձրանում ենք այդ մակարդակին, կամ շարունակում ենք ապրել՝ կրելով անսկզբունքային և անարդյունավետ կառավարման բոլոր հետևանքները։
     Շնորհավոր երկնային տարեդարձդ, օրինակելի հայ և քաղաքական գործիչ»։

«Նիկոլ Փաշինյանն ու իր թիմը հայտարարում են, թե ՀՀ-ում և նրա շուրջ ստեղծված իրավիճակը խաղաղություն է: Դրա միակ հիմնավորումն այն է, որ սահմաններին կրակոցներ չկան: 100-ամյա պատերազմի օրերին էլ ամեն օր ֆրանսիացիներն ու անգլիացիները հո չէին կռվում»,- ԱԺ նիստում ասել է «Հայաստան» խմբակցության պատգամավոր Արթուր Խաչատրյանը՝ ընդգծելով, որ պատերազմը վերջանում է, երբ պատերազմը ծնած պատճառն է հանգուցալուծվում:

«Մենք դեմ չենք խաղաղությանը, մենք դեմ ենք Նիկոլ Փաշինյանին այն պատճառով, որ ինքը ունակ չէ խաղաղություն հաստատել:

Պարո՛ն Փաշինյան, դուք Մովսեսը չեք, դուք ժողովրդին չբերցիք Ավետյաց երկիր, դուք բերեցիք ողբ, ողբերգություն, դուք Իվան Սուսանինն եք այն տարբերությամբ, որ նա կործանեց զավթիչների զորքին, դուք փորձում եք կործանել սեփական ժողովուրդին»,- նշել է նա: