Category: ABCNews

Ուկրաինան անօդաչու սարքերով հարվածել է Ռուսաստանի Մոսկվայի և Լենինգրադի մարզերում գտնվող Wildberries-ի պահեստներին։

Լենինգրադի մարզի ղեկավար Ալեքսանդր Դրոզդենկոն այս մասին հայտարարել է իր Telegram ալիքում։

Նրա խոսքով՝ հրդեհ է բռնկվել այն բանից հետո, երբ անօդաչու սարքը հարվածել է Տոսնենսկի շրջանի Կրասնի Բոր գյուղի պահեստին։ Հարձակման թիրախում են եղել Wildberries և Russ համատեղ ընկերությունների պահեստները։

«Ստեղծվել է արտակարգ իրավիճակների արձագանքման խումբ։ Լենինգրադի մարզային հրշեջ-փրկարարական ծառայության և Լենինգրադի մարզի Արտակարգ իրավիճակների նախարարության գլխավոր վարչության անհրաժեշտ ռեսուրսները գործի են դրվել հրդեհը մարելու համար», – նշել է Դրոզդենկոն։

Ուկրաինական լրատվամիջոցները նաև հայտնել են, որ օգոստոսի 4-ի գիշերն անօդաչու սարքերը հարվածել են նաև Մոսկվայի մերձակայքում գտնվող Չեխովի պահեստներին, որտեղ հարձակումից հետո հրդեհ է բռնկվել։

Կրասնի Բոր համալիրում գտնվում է Wildberries լոգիստիկ համալիրը, որը զբաղեցնում է մոտ 154,000 քառակուսի մետր տարածք։ 

Իսրայելի վարչապետ Բենիամին Նեթանյահուն անհամաձայնություն է հայտնել ԱՄՆ նախագահ Դոնալդ Թրամփի հետ՝ Գազայի հատվածում իրավիճակի կայունացման համար նախատեսված «Խաղաղության խորհրդի» «ճանապարհային քարտեզի» վերաբերյալ․ հայտնել է Al Jazeera-ն։

«ՀԱՄԱՍ-ի հետ վերջերս կնքված համաձայնագրի վերաբերյալ ես անհամաձայնություններ ունեմ նախագահ Թրամփի հետ, որոնք չեմ թաքցնում։ ՀԱՄԱՍ-ը պետք է զինաթափվի, իսկ Գազայի հատվածը պետք է ապառազմականացվի՝ նախքան վերակառուցման փուլին անցնելը», – հայտարարել է Նեթանյահուն։

Իսրայելի առաջնորդն այս հայտարարությունն արել է Թրամփի «Խաղաղության խորհրդում» գլխավոր ներկայացուցիչ Նիկոլայ Մլադենովի հետ հանդիպումից հետո։

Միևնույն ժամանակ՝ «Խաղաղության խորհուրդը» նախկինում ընդգծել է, որ Մլադենովի և Նեթանյահուի միջև հանդիպումից հետո կողմերը համաձայնության են եկել, որ Իսրայելի պաշտպանության ուժերը (IDF) դուրս կբերվեն Գազայի հատվածից միայն ՀԱՄԱՍ-ի զինաթափումից հետո։

«Ի հեճուկս ոչ ճիշտ հաղորդագրությունների՝ մենք նշում ենք, որ Իսրայելի պաշտպանության բանակի դուրսբերումը Դեղին գծից այն կողմ տեղի կունենա միայն զենքի ապամոնտաժման ավարտից հետո, ինչպես խոստացել էր ՀԱՄԱՍ-ն իր միջնորդներին։ Սա ներառում է թեթև և ծանր զենքեր, ինչպես նաև թունելներ։ Իրականացումը կհսկվի Միջազգային կայունացման ուժերի և Իրականացման ստուգման կոմիտեի կողմից, որը ներառում է ինչպես Միացյալ Նահանգներն, այնպես էլ՝ Խորհուրդը», – նշվում է հայտարարությունում։

Իրանի և Միացյալ Նահանգների միջև բանակցություններում մոտ ապագայում կարող է առաջընթաց գրանցվել․ հայտնել է Al Hadath հեռուստաընկերությունը՝ հղում անելով բարձրաստիճան աղբյուրին։ Նրա խոսքով՝ միջնորդները զգուշավոր լավատեսությամբ են մոտենում բանակցությունների հետագա ընթացքին և հույս ունեն, որ շուտով կհայտարարվի հրադադարի մասին։

Հեռուստաալիքի փոխանցմամբ՝ Իրանի արտգործնախարար Աբբաս Արաղչին շուտով կայցելի Իսլամաբադ։ Այցի ճշգրիտ ամսաթիվը դեռևս հայտնի չէ։

Ավելի վաղ Պակիստանի արտգործնախարար Իսհակ Դարն իր իրանցի գործընկերոջը հրավիրել էր հնարավորինս շուտ այցելել Իսլամաբադ։ Իրանը դեռևս պաշտոնապես չի հաստատել այս տեղեկությունը։

ԱՄՆ նախագահ Դոնալդ Թրամփը նախկինում հայտարարել էր, որ Վաշինգտոնը բանակցություններ է վարում Թեհրանի հետ և ասել, որ խորհրդակցությունների ընթացքում քննարկվում է Հորմուզի նեղուցում նավագնացության վերսկսման հարցը։ 

ԵԱՀԿ գործող նախագահ և Շվեյցարիայի արտաքին գործերի նախարար Իգնացիո Կասիսը հայտարարել է Ադրբեջան իր առաջին պաշտոնական այցի մեկնարկի մասին։

Այ մասին նա գրել է իր X սոցիալական հարթակի էջում։ Կասիսը նշել է, որ Շվեյցարիան բարձր է գնահատում Ադրբեջանի հետ իր գործընկերությունը և մտադիր է խորացնել համագործակցությունն առևտրի, նորարարության և տնտեսության ոլորտներում, ինչպես նաև ակտիվացնել ջանքերը Հարավային Կովկասում երկխոսության, խաղաղության, կայունության և բարգավաճման խթանման համար։

ԵԱՀԿ գործող նախագահը նաև ընդգծել է, որ այս այցը կնշանավորի տարածաշրջանային ավելի լայն դիվանագիտական շփումների սկիզբը։ Նրա հաջորդ երկիրը կլինի Թուրքմենստանը։

Դաշնային նախարարի այցը կլինի տարածաշրջանային շրջագայության առաջին փուլը, որը կշարունակվի աշնանը Հայաստան և Վրաստան այցելություններով։

Վենեսուելայում հունիսին տեղի ունեցած երկու երկրաշարժերի հետևանքով զոհերի թիվը հասել է 6125-ի․ գրում է Reuters գործակալությունը՝ հղում անելով երկրի խորհրդարանի անդամ Խորխե Ռոդրիգեսին։ 

Ռոդրիգեսի՝ Telegram-ում հրապարակած գրաֆիկի համաձայն՝ հիվանդանոցներում բուժօգնություն է ստացել գրեթե 61.000 մարդ։

Նշվում է, որ աղետի հետևանքով առաջացած փլատակների 16․5 տոկոսն արդեն հեռացվել է տարածքից։

ԱՄՆ Պետնախարարությունը Կոնգրեսին տեղեկացրել է, որ նախատեսում է փակել արտերկրում գործող դիվանագիտական հինգ ներկայացուցչություն․ գրում է Reuters գործակալությունը՝ հղում անելով թեմային ծանոթ աղբյուրների։ 

Անցյալ շաբաթվա վերջին Կոնգրեսի մի շարք հանձնաժողովներ ուղարկված ծանուցման մեջ Պետնախարարությունը հայտնել է, որ նախատեսում է փակել Գրենադայի Սենթ Ջորջս, Ճապոնիայի Նագոյա, Ինդոնեզիայի Մեդան, Կամերունի Դուալա և Կանադայի Վինիպեգ քաղաքներում գործող իր դիվանագիտական ներկայացուցչությունները։

Անցյալ տարվա սկզբին՝ Թրամփի նախագահության երկրոդ ժամկետի առաջին ամիսներին, Պետնախարարությունը սկսել էր արտերկրում գործող շուրջ մեկ տասնյակ ամերիկյան դիվանագիտական ներկայացուցչությունների փակման նախապատրաստական աշխատանքները։

Նշվում է, որ քայլը կապված չէ որևէ կոնկրետ աշխարհաքաղաքական զարգացման հետ։ Ըստ հրապարակման՝ այն ԱՄՆ պետական ապարատը վերափոխելու՝ Թրամփի ավելի լայն քաղաքականության մաս է, որի նպատակն է պետական կառավարման համակարգը համապատասխանեցնել «Ամերիկան՝ առաջին հերթին» (America First) օրակարգին։

Նիդեռլանդների հարավարևելքում հրշեջները փորձում են մարել անտառային հրդեհը, որը գիշերում ընդգրկել է100 հեկտար տարածք․ գրում է Euronews-ը՝ հղում անելով տեղի իշխանություններին։ 

Հրդեհը բռնկվել է երկուշաբթի կեսօրին՝ Գերմանիայի սահմանի մոտ՝ Լիմբուրգ նահանգի Օոստրում գյուղի մերձակայքում գտնվող արգելոցում։

Նշվում է, որ հրդեհին նախորդել էին շոգի ալիքներ, որոնք չորացրել են գետերի հուներն ու բուսածածկը։

Սա Արևմտյան Եվրոպայում վերջին շրջանում գրանցված անտառային հրդեհների հերթական դեպքն է։ Գիտնականները նման ծայրահեղ եղանակային երևույթները կապում են մարդու գործունեությամբ պայմանավորված կլիմայի փոփոխության հետ։

Այսօր՝ օգոստոսի 4-ին, ողբերգական դեպք է տեղի ունեցել Երևանում։ Ժամը 04:20-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Ավանի բաժնում օպերատիվ տեղեկություններ են ստացվել, որ Աճառյան 1 հասցեում՝ կամրջի տակ, դի կա. գրում է Shamshyan.com-ը։

Տեղում պարզվել է, որ ստացված օպերատիվ տեղեկությունները հավաստի են։ Համայնքային ոստիկաններն ու պարեկները կամրջի տակ հայտնաբերել են Երևանի բնակիչ 78-ամյա Վանիկ Չ.-ի դին։

Ֆոտոլրագրողի տեղեկություններով մահացածը մոտ հայտնաբերվել է 2 նամակ։

Նախաքննության շահերից ելնելով այս պահին որոշ մանրամասներ չենք հայտնում։

Կրթության, գիտության, մշակույթի և սպորտի նախարարի խորհրդական Արման Անտոնյանը հայտնել է, որ դիմում է ներկայացրել պաշտոնից ազատվելու վերաբերյալ։

«Այսօր դիմում եմ ներկայացրել ՀՀ կրթության, գիտության, մշակույթի և սպորտի նախարարի խորհրդականի պաշտոնից ազատվելու վերաբերյալ, որում ներկայացրել եմ այդ որոշման պատճառները, ինչպես նաև իմ պաշտոնավարման ընթացքում առկա համակարգային խնդիրները, որոնց հետևանքով փաստացի անհնար է դարձել նախարարի խորհրդականի պաշտոնից բխող լիազորությունների լիարժեք իրականացումը։

Միտումնավոր աշխատանքային մեկուսացման պայմաններում անհնար է արդյունավետ ծառայել այն նպատակներին, որոնց համար ստանձնել էի այդ պատասխանատվությունը։ Եթե որևէ մեկին հետաքրքրում է իրական պատկերը և իմ որոշման հիմքերը, կարող է ծանոթանալ նախարարին ներկայացված իմ պաշտոնական դիմում-զեկուցագրին։ Շնորհակալություն եմ հայտնում նախարարության բոլոր այն գործընկերներին, որոնց հետ ունեցել եմ պատիվ աշխատելու և շփվելու:

Իմ պաշտոնավարման ամենամեծ ձեռքբերումը մարդիկ են, որոնց ճանաչեցի, որոնց հետ ձևավորվեցին մասնագիտական ու մարդկային հարաբերություններ, և որոնց հետ մեզ միավորեցին գաղափարներն ու պետական շահին ծառայելու ձգտումը։ Ցանկացած պաշտոն ժամանակավոր է, իսկ արժանապատիվ աշխատանքն ու սկզբունքներին հավատարիմ մնալը՝ մնայուն։

Առաջիկայում կանդրադառնամ այն խնդիրներին, որոնք, իմ համոզմամբ, անհետաձգելի կարգավորման կարիք ունեն։ Եթե դրանք հնարավոր չեղավ լուծել ի պաշտոնե, կփորձենք դրանց լուծմանը նպաստել հասարակական հիմունքներով՝ ի շահ պետության, ոլորտի զարգացման և բոլոր շահառուների։»,- գրել է Արման Անտոնյանը։

Իտալիան նպատակ ունի եվրոպական մակարդակով տարածել Ալբանիայում ստեղծված միգրանտների կենտրոնների մոդելն՝ առաջարկելով ԵՄ տարածք անօրինական ճանապարհով ժամանած օտարերկրյա քաղաքացիների արտաքսման կենտրոններ ստեղծել երրորդ անվտանգ երկրներում, մինչև նրանց ապաստանի և ներգաղթի գործերը կուսումնասիրվեն․ գրել է Euronews-ը։

Առաջարկը, որը հրապարակվել է իտալական առաջատար լրատվամիջոցների կողմից և հաստատվել է կառավարության պաշտոնյաների կողմից, կներկայացնի Ներքին գործերի նախարար Մաթեո Պիանտեդոզին Եվրամիության ներքին գործերի նախարարների արտակարգ խորհրդում։

Հանդիպումը կազմակերպվել է Մարոկկոյի տարածքում գտնվող իսպանական անկլավ Սեուտայում բռնկված միգրացիոն արտակարգ իրավիճակից հետո։

Նախագծի ֆինանսավորման համար անհրաժեշտ ռեսուրսների հարցը մնում է բաց։ «Մենք պետք է մշակենք ներգաղթի վերաբերյալ ընդհանուր ռազմավարություն։ Իտալիայի կառավարությունը խնդրել է այս հանդիպումը՝ Դանիայի սոցիալ-դեմոկրատական կառավարության հետ համատեղ, որպեսզի ԵՄ-ում իրականացվի Միգրացիայի և ապաստանի մասին պայմանագիրը։ Այլ կերպ ասած՝ ակտիվացվեն վերադարձները», – հանդիպումից առաջ տեղական լրատվամիջոցներին ասել է արտգործնախարար Անտոնիո Տայանին։

Սեուտայում ճգնաժամն Իտալիայի և Իսպանիայի միջև միգրանտների կառավարման հարցում նոր լարվածության առաջացման պատճառ է դարձել։

Տայանին պաշտպանել է վարչապետ Ջորջիա Մելոնիի կառավարության դիրքորոշումն՝ այն որակելով «խիստ և չափավոր», միաժամանակ քննադատելով Պեդրո Սանչեսի գլխավորած Իսպանիայի կառավարության ռազմավարությունը, ով մեղադրվում է միգրացիայի նկատմամբ չափազանց հնազանդ մոտեցում որդեգրելու համար։

«Մադրիդի մոտեցումը հակասում է իտալականին, որին գրեթե բոլոր մյուս երկրներն են աջակցում», – նշել է իտալացի բարձրաստիճան դիվանագետը։

Իտալիայի արտաքին գործերի նախարարը դատապարտել է «գաղափարախոսական մանիպուլյացիաները», որոնք, նրա խոսքով, Իսպանիայի կառավարությունը ստեղծել է միգրացիայի հարցի շուրջ՝ բացատրելով, որ համագործակցության ծրագիրը կարող է հանգեցնել «անհրաժեշտ քաղաքականության», որը հեռու է «կարգախոսներից և կեղծ խոստումներից»։

Կառավարության նպատակն է ստեղծել Եվրոպական Միությունից դուրս կենտրոնների ցանց, որը նվիրված կլինի միգրանտների կառավարմանը և վերադարձին՝ հիմնված ծագման և տարանցիկ երկրների հետ համագործակցության վրա։

Գաղափարն առաջին անգամ առաջ է քաշել Իտալիայի վարչապետը հունիսի վերջին։ Նոր կենտրոնները, ըստ Իտալիայի առաջարկի, կֆինանսավորվեն դաշինքի կողմից։

Նախնական ցանկում ներառված են մի քանի աֆրիկյան պետություններ և որոշ երկրներ, որոնք գտնվում են ավանդական միգրացիոն ուղիներից դուրս։ Հավանական թեկնածուների թվում են Գանան, Սենեգալը, Թունիսը, Լիբիան, Մավրիտանիան, Եգիպտոսը, Ուգանդան, Եթովպիան, Ուզբեկստանը, Հայաստանը և Չեռնոգորիան։

Ուգանդան ամենահավանական համարվող տարբերակներից է։ Հաղորդվում է, որ Գերմանիան, Ավստրիան և Նիդեռլանդները արդեն հետաքրքրություն են հայտնել աֆրիկյան երկրում հնարավոր նախագծերի նկատմամբ։

Չեռնոգորիան նույնպես կարող է ընդգրկվել եվրոպական ռազմավարության մեջ, չնայած քննարկումները դեռևս նախնական փուլում են։ Հիմնական հարցերից մեկը, որը դեռևս պետք է լուծվի, վերաբերում է ծրագրի ֆինանսական ծածկույթին՝ ներառյալ ԵՄ-ի և ազգային մակարդակով ներդրումները։