Մայր Աթոռի դիվանապետ Արշակ արքեպիսկոպոս Խաչատրյանի խափանման միջոցը մնաց անփոփոխ․ նա չի կալանավորվի․ այսօր նման վճիռ կայացրեց դատարանը։
Մեղադրող դատախազը միջնորդել էր Արշակ սրբազանի նկատմամբ կրկին կալանք կիրառել։
Դատախազ Ալիսա Բոյաջյանի պնդմամբ՝ Արշակ սրբազանի՝ ազատության մեջ լինելը կարող է ոչ միայն ռիսկ ստեղծել վկաների վրա ազդելու համար, այլև նա կարող է քայլեր ձեռնարկել հնարավոր ապացույցները ոչնչացնելու կամ կեղծելու ուղղությամբ։
Դու պիտի պատասխան տաս կոնկրետ ինձ, բոլոր ծնողներիս։ Չհամարձակվե՛ք հայ զինվորին մի բան ասել։ Այս բանդիտական ոհմակը պիտի վերանա, պիտի նոր ղեկավարություն գա, մեր բանակը բարելավվի․այսօր Ազգային ժողովի դիմաց բողոքի ակցիայի ժամանակ ասաց զոհված Դավիթ Առուշանյանի մայրը՝ անդրադառնալով ԱԺ պաշտպանության, անվտանգության հարցերի հանձնաժողովի նախագահ Անդրանիկ Քոչարյանի հնչեցրած խոսքերին։
Հիշեցնենք, որ Անդրանիկ Քոչարյանն ասել էր, որ իր տղան «շատ բարձրակարգ» տղա է, դրա համար չի ծառայել բանակում։
Իրանի նախագահ Մասուդ Փեզեշքիանն իր ֆրանսիացի գործընկերոջ հետ հեռախոսազրույցի ժամանակ հայտարարել է, որ ԱՄՆ-ի «բարի կամքի բացակայությունը» և «մաքսիմալիստական դիրքորոշումը» խոչընդոտել են անցյալ շաբաթ Իսլամաբադում կայացած բանակցությունների ժամանակ համաձայնագրի վերջնական կնքմանը․ գրում է Al Jazeera-ն՝ հղում անելով IRNA լրատվական գործակալությանը։
Նրա խոսքով՝ սպառնալիքները, ճնշումը և ռազմական գործողությունները միայն կսրեն տարածաշրջանում ԱՄՆ-ի «ստեղծած խնդիրները»։
«Դիվանագիտությունը վեճերի կարգավորման նախընտրելի ուղին է», – ասել է Փեզեշքիանը՝ հավելելով, որ Եվրոպան կարող է կառուցողական դեր խաղալ և խրախուսել ԱՄՆ-ին՝ հետևել միջազգային իրավունքին։
Իտալիայի վարչապետ Ջորջիա Մելոնին հայտարարել է Իսրայելի հետ պաշտպանական համաձայնագրի ավտոմատ երկարաձգման կասեցման մասին․ գրում է Al Jazeera-ն։
«Հաշվի առնելով ստեղծված իրավիճակը՝ կառավարությունը որոշել է կասեցնել Իսրայելի հետ պաշտպանական համաձայնագրի ավտոմատ երկարաձգումը», – Վերոնայում կայացած միջոցառման շրջանակում հայտարարել է Իտալիայի վարչապետը։
Նշվում է, որ համաձայնագիրը ենթադրում է ռազմական տեխնիկայի և տեխնոլոգիական հետազոտությունների փոխանակում։
Ուկրաինայի նախագահ Վլադիմիր Զելենսկիի՝ Գերմանիա այցի ընթացքում Գերմանիան և Ուկրաինան պաշտպանության ոլորտում համագործակցության մասին համաձայնագիր են ստորագրել։
«Մենք մեր երկկողմ հարաբերություններն Ուկրաինայի հետ բարձրացնում ենք ռազմավարական գործընկերության մակարդակի»,- հայտարարել է Գերմանիայի կանցլեր Ֆրիդրիխ Մերցը։
Նա նաև նշել է, որ Ուկրաինայի հետ համատեղ կաշխատեն սահմանափակել Գերմանիայում ապաստան գտած ուկրաինացի տղամարդկանց թիվը, քանի որ կարևոր է, որ «այս տղամարդիկ այնտեղ լինեն՝ իրենց երկրին օգնելու համար»։
Ռուսաստանի մաքսային ծառայությունը սկսել է ավելի բարձր մաքսատուրքեր գանձել Եվրասիական տնտեսական միությունից (ԵԱՏՄ) ներմուծվող ապրանքների համար, եթե դրանք արտադրված են «անբարյացակամ» երկրներում․ Forbes-ին հայտնել են իրավաբաններն ու ձեռնարկատերերը։
Forbes-ի տվյալներով՝ դրույքաչափերը տատանվում են 15%-ից մինչև 50%։ Լրատվամիջոցը որպես օրինակ է բերում Ֆրանսիայից ստացված օծանելիքը և շրթներկը, որոնց համար գանձվում է 20% և 35% մաքսատուրք, չնայած այս ապրանքների համար հիմնական մաքսատուրքը 6.5% է։ Forbes-ը նշում է, որ նախկինում մաքսային ծառայությունը լրացուցիչ մաքսատուրքեր չէր պահանջում, եթե ապրանքները «ձեռք էին բերում ԵԱՏՄ ապրանքների կարգավիճակ»։
Եթե այս պրակտիկան շարունակվի, առօրյա ոչ պարենային ապրանքների գները կարող են աճել 10-15%-ով, իսկ որոշ հատվածներում՝ մինչև 30%-ով։ Առավել խոցելի կատեգորիաների շարքում լրատվամիջոցը նշում է շուկաներում առկա հագուստը և կոսմետիկան։
Գործընկերների հետ միասին այսօր մուտք ենք արել դիմում-միջնորդություն՝ հասցեագրված դատավոր Դոլմազյանին առ այն, որ առաջնահերթության կարգով քննության առարկա դառնա Սամվել Կարապետյանի խափանման միջոցի հարցը․ այսօր լրագրողների հետ զրույցում ասաց տնային կալանքի տակ գտնվող Սամվել Կարապետյանի փաստաբանական թիմի անդամ Արամ Վարդևանյանը։
«Յուրաքանչյուր ժամ այլևս էական նշանակություն ունի Հայաստանում գալիք խորհրդարանական ընտրությունների տեսանկյունից։ 2026 թվականի ապրիլի 21-ին «Ուժեղ Հայաստան» կուսակցությունը հրավիրել է համագումար, և առանցքային է, որ մինչ այդ համագումարը, որի օրակարգում հենց ընտրություններին վերաբերող հարցերն են, Սամվել Կարապետյանը հնարավորություն ունենա ամբողջությամբ մասնակցելու քաղաքական գործընթացին, որովհետև կուսակցության նախագահի մասնակցությունն առանցքային է»,- ասաց նա։
Ըստ նրա՝ մրցակցության, հավասարության, ընտրական գործընթացի երաշխիքների տեսանկյունից սա ակնհայտ անհրաժեշտություն է։
«Ինչ-որ իմաստով ցավ ենք ապրում, որ այդ բեռն ընկել է այլևս դատական իշխանության ուսերին։ Այդպես չպետք է լինի, բայց սա Հայաստանի Հանրապետությունում առկա իրականությունն է, սա է քաղաքական հետապնդումների տրամաբանությունը։ Դրանից չենք զարմանում, բայց մյուս կողմից ունենք հստակ ակնկալիք, հստակ պահանջ իրավունքի խախտման վերացման վերաբերյալ»,- ասաց Արամ Վարդևանյանը։
Մեծ Բրիտանիայի վարչապետ Քեյր Սթարմերը ստեղծում է Brexit-ի ոճով «Մերձավոր Արևելքի արձագանքման կոմիտե»՝ վերանայելու համար Մեծ Բրիտանիայի մոտեցումն Իրանի հակամարտությանը․ հայտնում է Politico-ն։
Ըստ բրիտանացի պաշտոնյայի՝ կոմիտեն կկազմվի երկու խմբից՝ մեկ նախարարական և մեկ պաշտոնական մակարդակով։ Նրանք լիազորություններ կունեն խորհրդակցելու կառավարության ողջ անձնակազմի հետ պատասխանատվության համընկնող ոլորտների վերաբերյալ։ Պաշտոնյայի խոսքով՝ խումբը կկենտրոնանա միջնաժամկետ սցենարների պլանավորման վրա առաջիկա շաբաթների և ամիսների ընթացքում՝ սկսելով Հորմուզի նեղուցի վերաբացման ջանքերից։ Ֆինանսների նախարարությունը պատրաստվում է կենսապահովման ծախսերի կտրուկ աճի, մինչդեռ փորձագետները նախազգուշացրել են, որ Մեծ Բրիտանիան ապագայում կարող է բախվել ավիացիոն վառելիքի պակասի։
Կառավարության արտակարգ COBR կոմիտեի նիստերը կշարունակվեն զուգահեռաբար։
Սթարմերը և Ֆրանսիայի նախագահ Էմանուել Մակրոնն այս շաբաթ դաշնակիցների հետ համատեղ կանցկացնեն Հորմուզի նեղուցով նավագնացության անվտանգությանը նվիրված ևս մեկ գագաթնաժողով։
Որոշ պաշտոնյաներ Politico-ին մտահոգություններ են հայտնել, որ Սթարմերի արտաքին քաղաքականության մտածողությունը մեծապես կարող է կախված լինել մեկ մարդուց՝ ազգային անվտանգության խորհրդական Ջոնաթան Փաուելից։ Նա միաժամանակ վարչապետի արտաքին քաղաքականության խորհրդականն է և մեկնում է արտասահման՝ Սթարմերի անունից բանակցելու։
Ինձ համար նշանակություն չունի՝ ես ցուցակի որ տեղում կլինեմ, ցուցակում կլինեմ, թե չեմ լինի, իմ պայքարը ո՛չ մանդատի համար է, ո՛չ էլ պատգամավոր դառնալու, ո՛չ էլ առիթ եմ տվել մտածելու, որ ես պատգամավոր դառնալու անհագուրդ ցանկություն ունեմ․ այսօր լրագրողների հետ զրույցում ասաց «Հայաստան» դաշինքի ներկայացուցիչ Գառնիկ Դանիելյանը՝ մեկնաբանելով դաշինքի ընտրական ցուցակի 14-րդ հորիզոնականում գտնվելը։
Հիշեցնենք, որ «Հայաստան» դաշինքի ընտրական ցուցակը գլխավորում է դաշինքի առաջնորդ, ՀՀ 2-րդ նախագահ Ռոբերտ Քոչարյանը:
ԱՄՆ ներգաղթի և մաքսային ծառայությունը (ICE) ձերբակալել է Բրազիլիայի հետախուզության նախկին ղեկավար Ալեքսանդր Ռամագեմին․ գրում է Reuters գործակալությունը։
Ռամագեմը փախել էր Բրազիլիայից նախորդ տարվա սեպտեմբերին՝ նախկին նախագահ Ժաիր Բոլսոնարոյի հետ հեղաշրջում կազմակերպելու համար դատապարտվելուց հետո։
Նախկին պաշտոնյան դատապարտվել է ավելի քան 16 տարվա ազատազրկման՝ 2022 թվականի նախագահական ընտրություններում տարած հաղթանակից հետո Լուիս Ինասիո Լուլա դա Սիլվային տապալելու դավադրությանը մասնակցության համար։
Միևնույն ժամանակ, Բրազիլիայի դաշնային ոստիկանությունը հայտարարության մեջ նշել է, որ ԱՄՆ ներգաղթի ծառայությունը Ֆլորիդա նահանգում ձերբակալել է մի բրազիլացու, որին որոնում էին երկրի իշխանությունները: Դաշնային ոստիկանությունը չի բացահայտել տղամարդու ինքնությունը, սակայն հայտնել է, որ ձերբակալված անձը դատապարտվել է Բրազիլիայի Գերագույն դատարանի կողմից պետական հեղաշրջում կազմակերպելու համար։
Ոստիկանությունը հավելել է, որ ձերբակալությունը երկու երկրների իրավապահ մարմինների համագործակցության արդյունք է։