Category: Armbanks

ԵՐԵՎԱՆ, 9 հուլիսի․/ԱՌԿԱ/․ Կառավարությունը հաստատել է Առողջության համընդհանուր ապահովագրության ոլորտում բոնուսային միավորների հաշվարկման, գործակիցների կիրառման, դրանց միջոցով վճարումներ կատարելու կարգը։

Ինչպես նշել է Առողջապահության նախարարի առաջին տեղակալ Լենա Նանուշյանը, որոշումը մշակվել է՝ հիմք ընդունելով «Առողջության համընդհանուր ապահովագրության մասին» ՀՀ օրենքի դրույթները։

 «Օրենքով սահմանել էինք, որ ապահովագրված անձի առողջ ապրելակերպի խրախուսման նպատակով հաշվում են բոնուսային միավորներ, եթե տվյալ տարվա ընթացքում վերջինիս անունով, բացի կանխարգելիչ ծառայությունից, այսինքն՝ սկրինինգներից, այլ ապահովագրական հատուցում չի գրանցվել։ Այս դեպքում արդեն տարվա ավարտից հետո անձի բոնուսային հաշվին փոխանցվում են նախնական բոնուսային միավորները», –  նշել է Նանուշյանը։

 Նրա խոսքով, հաշվի առնելով բնակչության համար կարևոր հանրային առողջապահական ցուցանիշները՝ սահմանվել են նաև լրացուցիչ ցուցանիշներ։

«Երբ ապահովագրված անձը հանդես է գալիս որպես կամավոր անհատույց արյան դոնոր կամ առողջության առաջնային պահպանման բժշկի կողմից գրանցվում են անձի առողջ ապրելակերպին միտված պարբերաբար բարելավող ցուցանիշներ, օրինակ, մարմնի զանգվածի ինդեքսի նորմավորում, ծխելուց հրաժարում և այլն, ապա այդ դեպքում կիրառվում են նաև բոնուսների նկատմամբ լրացուցիչ գործակիցներ։ Դրանք ավելի մանրամասն մենք կսահմանենք առողջապահության նախարարի հրամանով՝ և՛ ընթացակարգերը, և՛ բոնուսների չափերը»,- ասել է փոխնախարարը։

Նանուշյանը տեղեկացրել է՝ սահմանվել է, որ վերջնական բոնուսային միավորները չեն կարող գերազանցել տարեկան ապահովագրական վճարի 10%-ը, և այդ հավաքագրված միավորները տարին լրանալուց հետո արդեն կարող են օգտագործվել մի շարք նպատակներով։

«Կարող են օգտագործվել ապահովագրավճարը վճարելու, կամավոր բժշկական ապահովագրական փաթեթ ձեռք բերելու, համավճարների վճարման համար, ինչպես նաև՝ մարզասրահների, լողավազանների նաև բաժանորդական վճարների համար», – նշել է փոխնախարարը։

Ըստ փոխնախարարի՝ որոշումն ուժի մեջ է մտնելու 2029 թվականի հունվարի 1-ից։ 

«Նախնական այս հաստատումը մեզ հնարավորություն կտա ոչ միայն էլեկտրոնային գործիքը նախապատրաստել, այլ նաև իրականացնել նախապատրաստական այդ աշխատանքները», – նշել է Նանուշյանը։

ԵՐԵՎԱՆ, 9 հուլիսի․/ԱՌԿԱ/․      Հայաստանի արժութային շուկայում արտարժույթի առաջարկի աճ է նկատվում, CivilNet-ին տված հարցազրույցում հայտարարել է Հայաստանի Կենտրոնական բանկի խորհրդի անդամ Արմեն Քթոյանը։

Նրա խոսքով՝ Կենտրոնական բանկը նպատակ չունի կառավարել փոխարժեքը կամ հասնել որևէ կոնկրետ փոխարժեքային թիրախի, քանի որ կարգավորողի հիմնական խնդիրը գների կայունության ապահովումն է։

«Եթե նայենք Կենտրոնական բանկի նպատակներին, ապա առանցքայինը գների կայունությունն է։ Փոխարժեքի կառավարումը կամ փոխարժեքի գծով կոնկրետ թիրախային ցուցանիշի սահմանումը չի մտնում Կենտրոնական բանկի գործառույթների մեջ, և դա տրամաբանական է»,- նշել է Քթոյանը։

Նա ընդգծել է, որ ԿԲ-ն գործում է այն դեպքերում, երբ արժութային շուկայում նկատվում է միակողմանի շարժում, որն էականորեն սպառնում է շուկայական հավասարակշռությանը։

Քթոյանը մատնանշել է, որ արտարժույթի առաջարկի աճը կապված է, մասնավորապես, առանձին ծառայությունների արտահանման ընդլայնման, զբոսաշրջային ծառայությունների նկատմամբ պահանջարկի մեծացման, կապիտալի ներհոսքի և հայկական պարտատոմսերի հանդեպ ոչ ռեզիդենտների հետաքրքրության հետ։

Նրա խոսքով՝ ընթացիկ տարվա առաջին 5 ամիսների ընթացքում բանկային համակարգի միջոցով Հայաստան արտարժույթի ներհոսքը կազմել է շուրջ 2,8 մլրդ դոլար՝ նախորդ տարվա նույն ժամանակահատվածի 2,3 մլրդ դոլարի և երկու տարի առաջվա շուրջ 2 մլրդ դոլարի դիմաց։

 «Արտահոսքը կազմում է շուրջ 1,6–1,7 մլրդ դոլար։ Այսինքն՝ այն գրեթե չի աճում նույնպիսի տեմպերով, ինչպես ներհոսքը։ Դա նշանակում է, որ շուկայում ավելանում է արտարժույթի առաջարկը»,- ասել է Քթոյանը։

Պատասխանելով ներհոսքի հիմնական աղբյուրների մասին հարցին՝ նա նշել է, որ միջոցները ստացվում են նաև Ռուսաստանից, սակայն ոչ միայն այնտեղից։

«Ոչ ռեզիդենտների կողմից պարտատոմսերի ձեռքբերման մեծ ակտիվություն կա։ Եթե հայկական կապիտալի շուկայի և ֆինանսական շուկայի գործիքները գրավիչ են դառնում օտարերկրյա ներդրողների համար, դա ուղեկցվում է արտարժույթի ներհոսքի ընդլայնմամբ և դրա առաջարկի աճով»,- հայտարարել է Քթոյանը։

ԵՐԵՎԱՆ, 9 հուլիսի․/ԱՌԿԱ/․    Հայաստանի կապիտալի շուկայում օտարերկրյա ներդրումների ակտիվացման բավականին հետաքրքիր պատկեր է նկատվում, CivilNet-ին տված հարցազրույցում հայտարարել է ՀՀ Կենտրոնական բանկի խորհրդի անդամ Արմեն Քթոյանը։

Նրա խոսքով՝ ընթացիկ տարվա առաջին հինգ ամիսների ընթացքում ոչ ռեզիդենտների ներդրումները դրամային պարտատոմսերում նախորդ տարվա նույն ժամանակահատվածի համեմատ գրեթե կրկնապատկվել են՝ հասնելով 10%-ի։

Քթոյանը նաև մատնանշել է Հայաստանի համար ռիսկի պրեմիայի նվազումը։ «Շատ կարևոր միտում, որը մենք պետք է արձանագրենք, ռիսկի պրեմիայի նվազումն է Հայաստանի Հանրապետության դեպքում։ Եվ պետք է գոհունակությամբ նշել, որ հայկական, այսպես ասած, ֆինանսական շուկայի դեպքում ռիսկի պրեմիայի վարքագիծը որոշակիորեն սկսել է տարբերվել զարգացող այլ տնտեսություններում նույն ցուցանիշի վարքագծից»,-նշել է նա։

Քթոյանի խոսքով՝ եթե նախկինում Հայաստանը շարժվում էր զարգացող շուկաների հետագծով, ապա վերջին շրջանում ռիսկի պրեմիայի վարքագիծն ավելի է մոտեցել զարգացած երկրների մոդելին։

«Որոշակի շոկային էֆեկտներ, օրինակ՝ ասենք, Մերձավոր Արևելքում դրսևորված աշխարհաքաղաքական բացասական լիցքերը, այսպես ասած, անվտանգային խնդիրները, մեր դեպքում ռիսկի պրեմիայի մեծության վրա չեն ազդել այնպես, ինչպես տարածաշրջանի մի շարք այլ երկրների դեպքում։ Այսինքն՝ Հայաստանը մի փոքր այլ կերպ է գնահատվում, և դա կարևոր նախադրյալ է ստեղծում ապագա ներդրումների, ինչպես նաև տնտեսական աճի համար»,- ասել է Քթոյանը։

Խոսելով տնտեսության դիվերսիֆիկացման մասին՝ նա նշել է, որ նախընտրելի է ունենալ ավելի դիվերսիֆիկացված տնտեսություն՝ տարբեր ճյուղերի համամասնական զարգացմամբ։

«Այդուհանդերձ, մենք գործ ունենք այն իրողությունների հետ, որոնք կան։ Շինարարության մասով պահպանվում են աճի բարձր տեմպերը։ Դա տնտեսական ակտիվության կարևորագույն խթաններից մեկն է»,- ասել է Քթոյանը։

Նա հավելել է, որ զբոսաշրջային ծառայությունների ոլորտում նկատվում է արտաքին պահանջարկի զգալի աճ, որը գերազանցում է 20%-ը, ֆինանսական ծառայություններում կա հետաքրքրության մեծ դաշտ, ՏՏ հատվածում՝ որոշակի արտահանման ակտիվություն։ «Նաև Հայաստանն այսօր գրավիչ է պորտֆելային ներդրումների տեսանկյունից»,- հայտարարել է ԿԲ խորհրդի անդամը։

ԵՐԵՎԱՆ, 9 հուլիսի․/ԱՌԿԱ/․    ՀՀ Կենտրոնական բանկի խորհրդի անդամ Արմեն Քթոյանը CivilNet-ին տված հարցազրույցում թվարկել է երկրում գնաճի վրա ազդող հինգ գործոնները։

Որպես առաջին գործոն նա նշել է դրամի արժևորումը, որն այժմ զսպող ազդեցություն է ունենում գնաճի վրա։ «Այժմ դրամի արժևորումը այլ արժույթների նկատմամբ, ըստ էության, հանդիսանում է գնաճի վրա նվազման ուղղությամբ ազդող հանգամանք»,- ասել է Քթոյանը։

Երկրորդ գործոնը, նրա խոսքով, տնտեսության կառուցվածքային խնդիրներն են, այդ թվում՝ լոգիստիկայի և առանձին շուկաների առանձնահատկությունների հետ կապված հարցերը։

Երրորդ գործոնը առանձին սննդամթերքների գների աճն է։ Քթոյանը նշել է, որ վերջին ամիսներին գնաճում զգալի ավանդ են ունեցել միսը, կաթնամթերքը և խմիչքները։ «Մսի գործոնը՝ որպես գնաճային էֆեկտ, վերջին ամիսների համար արդեն ավանդական է դարձել»,— ասել է նա։ Քթոյանի խոսքով՝ 2026 թ.-ի հունիսին միսը և մսամթերքը նախորդ տարվա հունիսի համեմատ թանկացել են 12.5%-ով։

Չորրորդ գործոն նա անվանել է արտաքին գնաճային էֆեկտները, այդ թվում՝ Մերձավոր Արևելքի հակամարտության ազդեցությունը նավթի գների վրա։

Հինգերորդ գործոնը բնակչության գնաճային սպասումներն են։ Քթոյանն ընդգծել է, որ ԿԲ-ի համար կարևոր է ոչ միայն գների փաստացի փոփոխությունը, այլև այն, թե ինչպես է բնակչությունն ընկալում գնաճը։ «Եթե դու բարձր գնաճ ես սպասում կամ սուբյեկտիվորեն ընկալում ես, որ գնաճը բարձր է, հետևաբար՝ ապագայի համար նույնպես բարձր գնաճ ես սպասելու»,- նշել է նա։ Քթոյանի խոսքով՝ նման սպասումները ազդում են ամենօրյա գնումների, ներդրումային ակտիվության վրա և կարող են ամրապնդել գնաճը ավելի բարձր մակարդակում։

Միևնույն ժամանակ նա նշել է, որ տարածաշրջանի մի շարք երկրների և առևտրային գործընկերների համեմատ Հայաստանում գնաճի տեմպերը մնում են ավելի բարվոք։

ԵՐԵՎԱՆ, 8 հունիսի․/ԱՌԿԱ/․ Բաժնետոմսերի շուկայի կապիտալիզացիան 2026թ․–ի հունիսին կազմել է ավեի քան 492,7 մլրդ դրամ՝ ավելանալով 7,43%–ով, հայտնել է Հայաստանի ֆոնդային բորսայի (AMX) մամուլի ծառայությունը։

Նշվում է, որ բաժնետոմսերի շուկայում առևտրի ծավալը կազմել է ավելի քան 213․3 մլն ՀՀ դրամ, իսկ շուկայի կապիտալիզացիան՝ ավելի քան 492․7 մլրդ ՀՀ դրամ։ Նախորդ տարվա նույն ժամանակահատվածի ցուցանիշի համեմատ առևտրի ծավալը աճել է 10%-ով, իսկ կապիտալիզացիան՝ 7.43%։ Բաժնետոմսերով կնքվել է 290 գործարք։

Պարտատոմսեր