Category: Armbanks

ԵՐԵՎԱՆ, 7 սեպտեմբերի․ /ԱՌԿԱ/․ Հայաստանում գնաճը 2026 թ.-ի վերջին տարեկան կտրվածքով կկազմի 4,4%, կանխատեսում է Եվրասիական զարգացման բանկը (ԵԶԲ):

Ինչպես նշվում է բանկի շաբաթական մակրոտնտեսական ակնարկում, օգոստոսին Հայաստանում տարեկան գնաճը կազմել է 4,4%՝ նախորդ ամսվա 4,5% ցուցանիշի համեմատ:

Ընդհանուր ցուցանիշի դանդաղման վրա հիմնական ազդեցությունն ունեցել է պարենային ապրանքների գների աճի տեմպերի նվազումը՝ տարեկան կտրվածքով հասնելով 6,4%-ի՝ հուլիսի 7,4%-ից: ԵԶԲ-ն այս դինամիկան կապում է գյուղատնտեսական առանձին ապրանքատեսակների գների նվազմամբ:

Ոչ պարենային ապրանքների գների աճը նույնպես որոշ չափով դանդաղել է՝ հասնելով 2,4%-ի՝ նախորդ ամսվա 2,5%-ից:

Միևնույն ժամանակ, ծառայությունների ոլորտում գնաճն արագացել է՝ հուլիսի 1,8%-ից տարեկան կտրվածքով հասնելով 2,8%-ի, ինչը ԵԶԲ-ն բացատրում է տրանսպորտային ծառայությունների գների աճի արագացմամբ:

Համաձայն ԵԶԲ-ի 2026–2028 թվականների մակրոտնտեսական կանխատեսման՝ Հայաստանում սպառողական գների աճը ընթացիկ տարվա վերջին սպասվում է տարեկան 4,4% մակարդակում:

Հայաստանի 2026 թ.-ի պետական բյուջեում գնաճը ամրագրված է 3% մակարդակում (±1 տոկոսային կետ թույլատրելի շեղմամբ): ԿԲ վերջին կանխատեսման համաձայն՝ 2026 թ.-ի արդյունքներով գնաճը սպասվում է 3,3–4,4% միջակայքում (կախված սցենարից):

ԵՐԵՎԱՆ, 7 սեպտեմբերի․ /ԱՌԿԱ/․ Բաժնետոմսերի շուկայի կապիտալիզացիան 2026 թվականի օգոստոսին գերազանցել է 356.2 մլրդ դրամը, հայտնել են Հայաստանի ֆոնդային բորսայի (AMX) մամուլի ծառայությունից: Նշվում է, որ հաշվետու ամսում բաժնետոմսերով բորսայական առևտրի ծավալը կազմել է ավելի քան 153.4 մլն դրամ: Բաժնետոմսերով կնքվել է 288 գործարք:

Պարտատոմսեր

AMX-ի պետական պարտատոմսերի առաջնային տեղաբաշխման  հարթակում պետական պարտատոմսերի տեղաբաշխման աճուրդների ընդհանուր ծավալն օգոստոսին գերազանցել է 53.4 մլրդ դրամը: Երկրորդային շուկայում իրականացվել է 62 գործարք՝ ավելի քան 21 մլրդ դրամ ծավալով, ինչը 135%-ով գերազանցում է անցյալ տարվա նույն ժամանակահատվածի ցուցանիշը: Օգոստոսին կորպորատիվ պարտատոմսերի շուկայում առևտրի ծավալը նախորդ տարվա նույն ժամանակահատվածի համեմատ արձանագրել է 72% աճ՝ կազմելով ավելի քան 10.5 մլրդ դրամ: Հաշվետու ժամանակահատվածում կնքվել է 2085 գործարք օգոստոսի վերջի դրությամբ բորսայում շրջանառվող 221 կորպորատիվ պարտատոմսով: «Այս կայուն աճն արտացոլում է առողջ պահանջարկը կորպորատիվ պարտատոմսերի նկատմամբ», – ասված է հաղորդագրության մեջ:

Ռեպո գործարքներ

Ռեպո գործարքների ընդհանուր ծավալը գերազանցել է 22.8 մլրդ դրամը: Օգոստոսին կնքվել է 119 ռեպո գործարք, ինչը 361%-ով գերազանցում է անցյալ տարվա նույն ժամանակահատվածի ցուցանիշը:

Արտարժույթի հարթակ

Օգոստոսին AMX-ի արտարժույթիի հարթակում իրականացվել է ԱՄՆ դոլարի փոխանակում՝ շուրջ 277 մլն դրամ ծավալով՝ 4 գործարքով: Ամսվա ընթացքում փոխարժեքը տատանվել է 364․25-364․5 դրամի միջակայքում:

Հայաստանի ֆոնդային բորսայի մասին

AMX-ը Հայաստանում գործող միակ ֆոնդային բորսան է, որը հանդիսանում է նաև Հայաստանի կենտրոնական դեպոզիտարիայի միակ բաժնետերը: AMX խմբի առաքելությունն է նպաստել Հայաստանում բարենպաստ ներդրումային միջավայրի ձևավորմանը՝ առաջարկելով արդյունավետ լուծումներ ու ծառայություններ, այդ թվում՝ արժեթղթերի առևտրի, քլիրինգի, վերջնահաշվարկի և կենսաթոշակային համակարգի ակտիվների պահառության և ռեեստրավարման ոլորտում:

ԵՐԵՎԱՆ, 4 սեպտեմբերի․ /ԱՌԿԱ/․ ՀՀ կենտրոնական բանկի նախագահի 2026թ. հուլիսի 01-ի Թիվ N 1/288 Ա որոշմամբ գրանցվել է «Կուբ Ինվեսթ» ՓԲԸ անվանական արժեկտրոնային պարտատոմսերի Ծրագրային ազդագիրը:

«Կուբ Ինվեսթ» ՓԲԸ անվանական արժեկտրոնային պարտատոմսերի տեղաբաշխումն իրականացվելու է 2026 թվականի սեպտեմբերի 11-ից մինչև 2026 թվականի նոյեմբերի 11-ը ժամը 16:30-ն ընկած ժամանակահատվածում:

Պարտատոմսերի ձեռքբերման համար ներդրողները սահմանված կարգով պետք է լրացնեն և պատշաճ կերպով «Կուբ Ինվեսթ» ՓԲԸ առաքեն կամ ներկայացնեն Պարտատոմսերի ձեռքբերման հայտ/հայտեր:

Պարտատոմսերի ձեռքբերման հայտի լրացումից և պատշաճ կերպով «Կուբ Ինվեսթ» ՓԲԸ առաքումից հետո, սակայն ոչ ուշ քան պարտատոմսերի ձեռքբերման օրվա ժամը 16:30-ը պարտատոմս ձեռք բերել ցանկացող իրավաբանական և/կամ ֆիզիկական անձինք պետք է վճարում կատարեն թողարկման նպատակով բացված հետևյալ հաշվեհամարներից որևէ մեկին՝ Էվոկաբանկ ԲԲԸ՝ 1660030016400900,

Ամերիաբանկ ՓԲԸ՝ 1570025547625500,

Արդշինբանկ ԲԲԸ՝ 2470072930190239՝

պարտատոմսերի ձեռքբերման հայտ-հանձնարարականում նշված քանակի պարտատոմսեր ձեռք բերելու համար: 

Ծրագրային ազդագրի և Թողարկման վերջնական պայմանների էլեկտրոնային տարբերակը կարելի է բեռնել հետևյալ https://cubeinvest.am/ կայքից, իսկ թղթային տարբերակները` այցելելով «Կուբ Ինվեսթ» ՓԲԸ Վազգեն Սարգսյան 10 հասցեով:

Պարտատոմսերի էական պայմանները

ԵՐԵՎԱՆ, 4 սեպտեմբերի․/ԱՌԿԱ/․ Ստեփան Գիշյան բարեգործական հիմնադրամի աջակցությամբ Հայոց ցեղասպանության թանգարան-ինստիտուտը համալրվել է 120 ռադիո և 45 նոր աուդիոգիդերով։ Աուդիոգիդերը հինգ լեզվով են՝ անգլերեն, ռուսերեն, ֆրանսերեն, գերմաներեն և չինարեն։ Շուտով կավելանան նաև իսպաներենն ու  իտալերենը, հաղորդում է Ակբա բանկի մամուլի ծառայությունը։

«Այս ներդրումը շատ կարևոր է Հայոց ցեղասպանության թանգարան-ինստիտուտի համար, քանի որ այն բարձրացնում է թանգարանի աշխատանքների արդյունավետությունը։ Օրինակ, ռադիոգիդերի միջոցով սրահում միաժամանակ կարող են մի քանի էքսկուրսավարներ աշխատել և առանց աղմուկի, առանց միմյանց խանգարելու մեծ խմբերի սպասարկել, իսկ աուդիոուղեցույցն օգնում է դառնալ ինքդ քո էքսկուրսավարը՝ որոշելով շրջայցի տեմպը»,- նշել է «Ստեփան Գիշյան» բարեգործական հիմնադրամի տնօրեն Աննա Գիշյանը։

««Ստեփան Գիշյան» հիմնադրամն այն հաստատություններից է, որը մշտապես օգնում է Հայոց ցեղասպանության թանգարան-ինստիտուտին: Առաջին համատեղ ծրագիրը մենք իրականացրեցինք 2020թ.–ին, երբ «Ստեփան Գիշյան» հիմնադրամի աջակցությամբ ձեռք բերեցինք պրոյեկտորներ, որոնք մինչև այսօր գործածվում են թանգարանում։ Սա մեր երկրորդ հաջող համագործակցությունն է, որի շնորհիվ մենք ունեցանք 120 ռադիոգիդ և 45 աուդիոգիդ»,- նշում է Հայոց ցեղասպանության թանգարան-ինստիտուտի  տնօրենի ժամանակավոր պաշտոնակատար Հրաչյա Թաշչյանը։

«Ստեփան Գիշյան» բարեգործական հիմնադրամը ստեղծվել է Ակբա բանկի, ֆրանսիական Կրեդիտ Ագրիկոլ, Կրեդիտ Ագրիկոլ Ազգային Ֆեդերացիայի և Ստեփան Գիշյանի ընտանիքի կողմից: Հիմնադրամի ծրագրերն ուղղված են հայ-ֆրանսիական կապերի ամրապնդմանը, Հայաստանի սոցիալ-տնտեսական, գիտակրթական, մշակութային, առողջապահական համակարգերի բարելավմանն ու կատարելագործմանը:

Մանրամասն՝ տեսանյութում։

ԵՐԵՎԱՆ, 4 օգոստոսի․/ԱՌԿԱ/․ Telegram-ի ռուսալեզու տիրույթում, այդ թվում՝ Հայաստանից օգտատերերի շրջանում, լայն տարածում է ստանում զեղծարարների նոր սխեման։ Նրանք մեսենջերի գործիքների ու հոգեբանական ճնշման միջոցով սպառնում են օգտատերերին և գումար կորզում՝ հաշիվների հասանելիությունը պահպանելու դիմաց։

Խաբեության մեխանիզմը․ մեկ հպումից մինչև  սպառնալիք

• Խայծ։ Օգտատերը ստանում է Telegram bot-ի հղում՝ հարցման կամ մրցանակների խաղարկության մասնակցության,  նվերի ստացման կամ հաշվի վավերացման պատրվակով։ Համոզիչ թվալու համար bot-ի անունը և ձևավորումը կարող են նման լինել պաշտոնական ծառայություններին, ինչպիսիք են Telegram Support-ը, Wallet-ը կամ BotFather-ը։
• «Start» կոճակ։ Զոհին խնդրում են ակտիվացնել bot-ը։ «Start» կոճակը սեղմելն ինքնին զեղծարարներին չի փոխանցում ձեր հաշվի վերահսկողությունը, սակայն ցույց է տալիս, որ օգտատերը արձագանքել է խայծին և պատրաստ է հետագա գործողություններին։
• Շորթում և սպառնալիքներ։ Bot-ն ակտիվացնելուց անմիջապես հետո օգտատիրոջը սկսում է գրել զեղծարարը։ Ճնշման սցենարը մեկն է․ զեղծարարները պնդում են, որ «Start» կոճակը սեղմելով՝ օգտատերը դարձել է վնասաբեր bot-ի «սեփականատեր»։ Նրանք սպառնում են գումար չփոխանցելու դեպքում օգտագործել իրենց հաշիվների ցանցը՝ տվյալ bot-ի դեմ զանգվածային բողոքներ ուղարկելու համար։ Հարթակի կանոնների համաձայն՝ Telegram-ի ալգորիթմները կարող են արգելափակել ոչ միայն bot-ը, այլև այն հաշիվը, որը փոխազդել է դրա հետ կամ որին այն կապված է։ Զոհին ահաբեկում են անձնական պրոֆիլի, նամակագրության և կոնտակտների լիակատար ու անվերադարձ կորստով։

Կարևոր հանգամանք

Սխեմայի գլխավոր զենքը Telegram-ի տեխնիկական խոցելիությունը չէ, այլ հոգեբանական ճնշումը։ «Start» կոճակը սեղմելն ինքնին զեղծարարներին իրավունք չի տալիս կառավարել կամ հեռացնել ձեր օգտահաշիվը։

Պետք չէ հավատալ նաև այն պնդումներին, թե մի քանի բողոքն ինքնաբերաբար կհանգեցնի ձեր պրոֆիլի հեռացմանը։ Telegram-ն ուսումնասիրում է ստացված բողոքները, ուստի «զանգվածային բողոքներ ներկայացնելու և էջը հեռացնելու» սպառնալիքը դեռևս չի նշանակում, որ զեղծարարներն իսկապես ունեն նման հնարավորություն։

Իրավաբանական ծուղակ

Եթե դուք ինքներդ եք գումար փոխանցել զեղծարարներին, բանկային գործարքը համարվում է կամավոր կատարված և ձեր կողմից հաստատված, ուստի հետագայում նման փոխանցման վերադարձը չափազանց բարդ է։ Միևնույն ժամանակ, գումարի վճարման հետ կապված զեղծարարները որևէ պարտավորվածություն չեն կրում․ նրանք կարող են շարունակել գումարի շորթումը։ Հետևաբար, «գումար վճարելով խնդիրը լուծելու» փորձը գրեթե երբեք արդյունավետ ելք չէ։

IDBank-ը խորհուրդ է տալիս․

• Մի ակտիվացրեք անծանոթ bot-եր։ Հատկապես եթե դրանք խորհուրդ են տվել անծանոթ մարդիկ չատերում կամ հղումով անցնելու դեպքում խոստացել են նվեր։
• Եթե արդեն ակտիվացրել եք, ապա գումար մի փոխանցեք։ Վճարումը զեղծարարներին չի կանգնեցնում, միայն ցույց է տալիս, որ դուք պատրաստ եք ավելի շատ վճարել։
• Միանգամից արգելափակեք bot-ը և բողոք ներկայացրեք դրա դեմ Telegram-ում։ «Արգելափակել և բողոքել» գործառույթը հասանելի է Telegram հավելվածում։
• Պահպանեք նամակագրության screenshot-երը։ Դրանք անհրաժեշտ կլինեն Telegram-ի աջակցման ծառայությանը և իրավապահ մարմիններին դիմելու ընթացքում։

Հիշե՛ք․ այս սխեմայում զեղծարարի ամենաարդյունավետ գործիքը ձեր վախն է։ Թույլ մի՛ տվեք, որ հաշիվը կորցնելու սպառնալիքը դրդի ձեզ գումարը կամավոր կորցնել։ Կանգ առեք, ոչինչ մի՛ վճարեք և ցանկացած անհանգստացնող հաղորդագրություն ստուգեք պաշտոնական աղբյուրների միջոցով։

ԲԱՆԿԸ ՎԵՐԱՀՍԿՎՈՒՄ Է ՀՀ ԿԲ ԿՈՂՄԻՑ

ԵՐԵՎԱՆ, 3 սեպտեմբերի․ /ԱՌԿԱ/․ Կառավարությունն այսօրվա նիտում հավանություն տվեց «Հայաստանի Հանրապետության և ՕՊԵԿ-ի Միջազգային զարգացման հիմնադրամի միջև «Հայաստանի տնտեսական վերափոխման ծրագիր» 80 մլն եվրո արժողությամբ վարկային համաձայնագիրը հաստատելու մասին» նախագծին:

Համաձայն որոշման հիմնավորման՝ այն նպատակաուղղված է ՀՀ-ում մրցակցային միջավայրի բարելավմանը և ներդրումների ներգրավմանը:

Բյուջետային աջակցության միջոցների ստացման համար նախապայման է հանդիսանում երկկողմ փոխհամաձայնեցված քաղաքականության գործողությունների աղյուսակով սահմանված՝ մի շարք ոլորտներում միջոցառումների և բարեփոխումների իրականացումը:

ԵՐԵՎԱՆ, 1 սեպտեմբերի․ /ԱՌԿԱ/․  Հայաստանի չեմպիոն և գավաթակիր «Յունիսպորտը» նվաճեց ֆուտզալի ՈՒԵՖԱ Չեմպիոնների լիգայի հիմնական փուլի ուղեգիրը՝ նախնական փուլում տանելով երեք անընդմեջ հաղթանակ։ Խմբային փուլի վերջին խաղում «Յունիսպորտը» 5։2 հաշվով առավելության հասավ Գերմանիայի չեմպիոն «Վայլիմդորֆի» նկատմամբ։ Ռաֆիկ Մելիքյանն ու Պուտրուս Վասիլևը դարձան դուբլի հեղինակ, ևս մեկ գոլ խփեց դարպասապահ Բեկբոլոտ Ակմատալիևը։ Վաստակելով առավելագույն 9 միավորը, «Յունիսպորտը» վստահորեն զբաղեցրեց E խմբի առաջին հորիզոնականը և կշարունակի պայքարը Չեմպիոնների լիգայի հիմնական փուլում։

«Յունիսպորտ» ֆուտզալի ակումբը հիմնվել է Յունիբանկի աջակցությամբ: Ակումբի հետ համագործակցությունը Բանկի՝ հայկական սպորտի զարգացմանն ու միջազգային հարթակում դրա առաջխաղացմանը նպաստող նախաձեռնություններին ուղղված հետևողական աշխատանքի մի մասն է։ «Յունիսպորտի»՝ Չեմպիոնների լիգայի հիմնական փուլ դուրս գալը նոր էջ է բացում թիմի համար և հնարավորություն ընձեռում հանդես գալ եվրոպական ֆուտզալի բարձր մակարդակում։

«Ուրախ ենք տեսնել, թե ինչպես են «Յունիսպորտի» ստեղծման հիմքում դրված հավակնությունները վերածվում կոնկրետ մարզական արդյունքների։ Չեմպիոնների լիգայում երեք հաղթանակն ու հիմնական փուլ դուրս գալը վկայում են թիմի մեծ ներուժի մասին և ցույց տալիս, թե ինչ արդյունքների կարելի է հասնել պրոֆեսիոնալ աշխատանքի ու ընդհանուր նպատակին ձգտելու շնորհիվ։ Յունիբանկի համար կարևոր է աջակցել այնպիսի նախագծերի, որոնք հնարավորություն են տալիս արժանապատվորեն ներկայացնել Հայաստանը միջազգային հարթակում։ Թիմին մաղթում ենք վստահ խաղ և նոր հաղթանակներ», — նշել են Յունիբանկում: 

Հիմնական փուլի հանդիպումները կանցկացվեն հոկտեմբերի 27-ից նոյեմբերի 1-ը Լյուքսեմբուրգում։ «Յունիսպորտի» մրցակիցները կլինեն Լիտվայի «Կաունո Ժալգիրիսը», Լյուքսեմբուրգի «Դիֆերդանժը» և Հունաստանի «Դուկասը»։

ԵՐԵՎԱՆ, 1 սեպտեմբերի․/ԱՌԿԱ/․ «Յու Այ Թի Ի Էքսպո» ՍՊԸ-ն (UATE) մուտք է գործում կապիտալի շուկա՝ ընկերության պարտատոմսերը ցուցակելով Հայաստանի ֆոնդային բորսայում (AMX), հայտնում է բորսայի մամուլի ծառայությունը։