Հանրային կապերի և տեղեկատվության կենտրոնի կազմակերպած կլոր սեղան-քննարկման ընթացքում ՀՀ վարչապետի մամուլի քարտուղար Նազելի Բաղդասարյանը խոսեց ապատեղեկատվության տարածման նոր մեխանիզմների մասին՝ ընդգծելով արհեստական բանականության կիրառմամբ առաջացող ռիսկերը։ «Արմենպրես»-ի հաղորդմամբ՝ Բաղդասարյանը նշեց, որ վերջին շրջանում ապատեղեկատվական արշավների բնույթը էականորեն փոխվել է։
«Եթե նախորդող ժամանակահատվածում կեղծ լուրերը ակնհայտ աբսուրդի ժանրից էին, հիմա նարատիվները որոշակիորեն իրական փաստերի վրա են հենվում և շատ ակտիվ օգտագործում են արհեստական բանականությունը»,-ասաց նա։
Վարչապետի մամուլի քարտուղարը նշեց, որ այս միտումները հիմք են տալիս կանխատեսելու ապատեղեկատվության նոր ալիքներ։
«Սա է պատճառը, որ մենք ոչ միայն կանխատեսում, այլև կանխորոշում ենք, որ առաջիկա ժամանակահատվածում հնարավոր են արհեստական բանականությամբ ստեղծված փաստաթղթերի «արտահոսքեր», ինչպես նաև գործողություններ, որոնք կթվան իրական։ Խոսքը մասնավորապես վերաբերում է արհեստական բանականությամբ գեներացված ձայնային և տեսանյութային բովանդակությանը, որը շատ նման կլինի իրական պատկերներին»,-ընդգծեց Բաղդասարյանը։
Բաղդասարյանը հավելեց, որ այս մարտահրավերներին արձագանքելու նպատակով արդեն իրականացվել են օրենսդրական փոփոխություններ։
«Դրան է ուղղված նաև Ազգային ժողովում վերջերս ընդունված օրենսդրական փոփոխությունները, որոնք նախընտրական շրջանում պահանջում են մակնշել արհեստական բանականության կողմից գեներացված նյութերը, ինչը հնարավորություն կտա որոշակի տարբերակում իրականացնել»,-ասաց նա։
Նրա խոսքով՝ այս հարցում կարևոր դեր է ունեցել նաև միջազգային փորձը։
«Տարբեր երկրների փորձը մեզ օգնել է, և մենք կարողացել ենք որոշակի կանխարգելող միջոցներ ստեղծել, որոնք, հույս ունենք, կօգնեն»,-եզրափակեց Նազելի Բաղդասարյանը։
