Category: Hraparak

Խորհրդարանական ընտրություններից հետո քաղաքական թիվ մեկ օրակարգային հարցը ընդդիմության՝ մանդատներ վերցնել-չվերցնելու հարցն է։ Ֆեյսբուքյան ակտիվ հանրույթը մի քանի օր ագրեսիվ ու կոշտ պահանջներ է հնչեցնում՝ խորհրդարան անցած երկու ուժի առաջնորդներին ուղղված, Սամվել Կարապետյանից ու Ռոբերտ Քոչարյանից պահանջում է չվերցնել մանդատները, չլեգիտիմացնել, իրենց իսկ բնորոշմամբ՝ կեղծիքներով անցած ընտրությունները, չդառնալ Ալիեւի պահանջները կատարող խորհրդարանի մաս եւ այլն, անգամ հոխորտում են, թե իրենք դրա համար քվե չեն տվել ընդդիմությանը։

Ընդդիմության շարքերում, կարելի է ասել, քար լռություն է, մեկ-երկու հերթապահ հայտարարություն, որ ԿԸՀ հրապարակած տվյալները չեն արտացոլում իրականությունը, եւ հետամուտ են լինելու խախտումները բացահայտելուն, ուրիշ ոչինչ։ Տեղեկություններ կան, որ ընտրություններից հետո ընդդիմադիր թիմերը պարբերաբար համատեղ քննարկումներ են ունենում՝ մանդատներ վերցնել-չվերցնելու նպատակահարմարության հարցով, վստահեցնում են, որ համատեղ ու միասնական դիրքորոշում է կայացվելու վերցնել-չվերցնելու հարցում, եւ սպասում են ԲՀԿ-ի հարցի լուծմանը. եթե Գագիկ Ծառուկյանի առաջնորդած ուժը վերահաշվարկի արդյունքում այնուամենայնիվ անցնի խորհրդարան, ապա ընդդիմության շարքերում հակված են վերցնել մանդատները, քանի որ Փաշինյանի իշխանությունն այդ պարագայում զրկվում է 3/5-ի մեծամասնությունից, ինչը նրան կզրկի սահմանադրական օրենքներն ու անկախ մարմինները միանձնյա ձեւավորելու հնարավորությունից։

Սամվել Կարապետյանի առաջնորդած «Ուժեղ Հայաստանի» առաջին համար Նարեկ Կարապետյանն իր լայվում ըստ էության խոսեց այդ մասին․ սպասում են ձայների վերահաշվարկի արդյունքներին, որպեսզի հասկանան՝ արդյոք «Բարգավաճ Հայաստան» կուսակցությունը կմտնի՞ Ազգային ժողով, թե՝ ոչ, որից հետո հանդես կգան հայտարարությամբ: «Վերահաշվարկի արդյունքում կիմանանք՝ «Բարգավաճ Հայաստան» կուսակցությունն Ազգային ժողով մտնո՞ւմ է, թե՞ չէ: Կհասկանանք՝ Ազգային ժողովում հնարավորություն կունենա՞ գլխավոր դատախազ եւ այլ պաշտոնյաներ ընտրելու ժամանակ ընդդիմությունն իր խոսքն ասի, որից հետո պարզ կլինի՝ ԱԺ-ն կունենա գործիքակազմ` դեմ կանգնելու ապօրինություններին, քանի որ այս անգամ իշխանությունը շատ մանդատներ է կորցրել: ԲՀԿ-ի տարբերակին ենք սպասում, որից հետո հանդես կգանք հայտարարությամբ»,- ասաց Կարապետյանը եւ հավելեց. «Եթե կարողացանք այնպես անենք, որ դատարանների նախագահներ նշանակվելուց ընդդիմության ձայնը հաշվի առնվի, հավասարակշռելու է, եւ քաղբանտարկյալների հարցը փորձելու ենք այդպես լուծել: Եթե տեսնենք, որ արդյունք չի լինելու, հանդես կգանք հայտարարությամբ»: Խոսելով իշխանափոխության հնարավոր ուղիների մասին՝ Կարապետյանը նշել է 2 տարբերակ․ ընտրություններ եւ սահմանադրական ճանապարհով փողոցային պայքար։

«Փողոցային պայքարի արդյունքում պետք է ԱԺ պատգամավորների մեծամասնությունը քվեարկի փոփոխության օգտին: Այսօր պատմականորեն ընդամենը 8 պատգամավոր «Քաղաքացիական պայմանագիր» կուսակցությունից եթե փոխի իր դիրքորոշումը, Փաշինյանը կորցնում է աթոռը: Իհարկե, ընտրություններից հետո դա բարդ է, բայց Հայաստանի 5 տարվա ընթացքում մենք մեծ հնարավորություն կարող ենք տեսնել այդտեղ»,- նշեց Նարեկ Կարապետյանը:

Փաստաբան Հովհաննես Խուդոյանի կարծիքով, նոր ձեւավորվող խորհրդարանն էականորեն տարբերվելու է նախորդներից, հատկապես՝ եթե ԲՀԿ-ի մուտքն էլ ապահովվի այնտեղ, ուստի, իր խոսքով, ճիշտը մանդատները վերցնելն է․ «Քաղաքական նպատակահարմարության առումով գնահատական տալ չեմ կարող, բայց մասնագիտական կարծիքս այն է, որ իմաստ ունի մանդատները վերցնել, մանավանդ՝ երբ ԲՀԿ-ն անցնում է։ Քանի որ այդ պարագայում այս իշխանությունը զրկվում է բազում գործիքներից՝ սահմանադրական օրենքներ ընդունելու, մարմիններ ձեւավորելու տեսանկյունից։ Իհարկե, կարելի է քննարկել, որ հետագայում կարող են մարդ գողանալ, փորձել իրավիճակ փոխել, բայց որ իրավիճակն այն է, որ իրենք չեն կարողանալու առանցքային պաշտոններում մարդ նշանակել, սահմանադրական օրենքներ փոփոխել, փոխում է իրավիճակը։ Եթե այս պատկերն ունենայինք 2021 թվականից հետո, ապա այս իրավիճակը չէինք ունենա․ ե՛ւ դատական համակարգի ողնաշարը ջարդելը, ե՛ւ ՍԴ-ի դեմ գործընթացը, ե՛ւ ընտրական հանձնաժողովների ձեւավորումը չէին կարող անել։ Հիմա եթե գործիքը ստեղծվում է եւ հնարավորություն է տալիս գոնե մյուս համապետական ընտրությունների համար կիրառել, ապա պետք է օգտվել դրանից՝ անկախ նրանից, թե ԱԺ-ում քաղաքական բովանդակությունը ողջունելի կլինի, թե խնդրահարույց»։

Հովհաննես Խուդոյանը, պատասխանելով այն պնդումներին, որ Փաշինյանին ոչինչ չի խանգարի գլխավոր դատախազի տեղապահ կամ Վերաքննիչ դատարանի նախագահի պարտականությունները կատարող նշանակել, որոնք մինչեւ իր իշխանության վերջը կարող են ԺՊ-ի կարգավիճակում աշխատել, ասաց, որ ժամանակավոր պաշտոնակատար կարելի է նշանակել միայն գլխավոր դատախազի դեպքում, մյուս պաշտոնների պարագայում ներկայիս օրենսդրությունը չի տալիս նման հնարավորություն։ «Կոլեգիալ մարմինների պարագայում կլինի ՍԴ, ԿԸՀ եւ այլն, այդ տարբերակը՝ ԺՊ-ի ինստիտուտը չի աշխատելու։ Երկրորդ կարեւոր հանգամանքը, որ մանդատները վերցնելն անհրաժեշտ է նաեւ այն պատճառով, որ ԸԸՀ-ներում ներկայություն ապահովեն։ Եթե պատկերացնենք, որ հաջորդ ընտրություններում ընտրատեղամասերը բացառապես իշխանականներից են կազմված, ապա կարելի է հավերժ մոռանալ իշխանափոխության մասին»,- ասաց Խուդոյանը` հավելելով, որ, ի վերջո, Վրաստանի օրինակը մեզ ցույց տվեց, թե որքան անօգուտ է այդ ճանապարհով գնալը․ «Սահմանադրական, օրենսդրական առումով մանդատներից հրաժարվելը որեւէ խոչընդոտ չի առաջացնելու ՔՊ-ի համար։ Եվ, ի վերջո, ինչպես Արամ Օրբելյանն է իր այս թեմայով հարցազրույցում նշել` եթե ընդդիմությունը չգնա պառլամենտ, ոչինչ չի խանգարի Նիկոլ Փաշինյանին հայտարարելու, որ մենք հարյուր տոկոսանոց մեծամասնություն ունենք»։

Քարոզարշավի ընթացքում Փաշինյանի համար Լեռնանիստից բերած գառի խաշլամով սեղան բացած Սասուն Միքայելյանին ու իր քաղաքապետ որդուն հաջողվե՞ց Հրազդանում ընտրություններին իրենց ուզած թվերը ստանալ, իսկ նրանք ՔՊ-ին 70% ձայն էին խոստացել:

Մինչ ԿՀԸ-ն վերահաշվարկ է իրականացնում, փորձեցինք ԿԸՀ-ի հրապարակած տվյալներից հասկանալ, թե Հրազդանի և հարակից գյուղերի 41 ընտրատեղամասերում ինչ արդյունքներ են գրանցվել:

Այդ ընտրատեղամասերում ընտրելու իրավունք են ունեցել 54 հազար 187 ընտրող: Ըստ ԿՀԸ արդյունքների՝ «Քաղաքացիական պայմանագիր» կուսակցությունը 41 ընտրատեղամասերից ստացել է՝ 15 հազար 209 ձայն, «Ուժեղ Հայաստանը»՝ 8158, «Բարգավաճ Հայաստանը»՝ 1327, «Հայաստան» դաշինքը՝ 4009: Թե ինչ փոփոխություն կլինի վերահաշվարկից հետո, դժվար է ասել:

Այն, որ Սասուն Միքայելյանը բոլոր ընտրություններում իր կայուն 13-ից 15 հազար ձայնն ունի Հրազդանում, դա փաստ է, չնայած իր դիրքին ու իր քաղաքապետ որդու ներդրած մեծ ջանքերին, այս ընտրություններում Միքայելյանները չեն կարողացել մի քիչ ավելի ձայն հավաքել: Նաև պարզ չէ, թե Կոտայքում տեր ու տնօրինություն անող այս ընտանեկան կլանը, եթե չլիներ, արդյո՞ք ՔՊ-ն ու Նիկոլ Փաշինյանն ինքնուրույն այդ 15 հազար ձայնը չէին ստանա Հրազդանից:

Չնայած ՔՊ-ականները հունիսի 7-ի արդյունքները որպես մեծ հաղթանակ են ներկայացնում եւ պարծենում, թե իբր ջախջախել են «եռագլուխ հրեշին», սակայն ՔՊ-ի ներսում, մեղմ ասած, անկումային տրամադրություններ են․ ՔՊ-ականները հասկանում են, որ գործադրված ջանքերի ու այսքան խախտումների պարագայում մեծամասնություն չստանալը համազոր է պարտության:

Իսկ եթե ընդդիմությունը չվերցնի մանդատները, ապա լեգիտիմության խնդիրներ են ունենալու, եւ եթե ոչ այսօր, ապա վաղը՝ աշխարհաքաղաքական թեթեւ մակընթացությունների պարագայում իրենց մատնացույց են անելու միամանդատ խորհրդարանի ու ժողովրդավարությունից նահանջի փաստը։

Ի դեպ, ՔՊ-ում վստահ են, որ իրենց ցուցակի մինչեւ 90-րդ համարը կմտնի խորհրդարան, քանի որ առնվազն 25-30-ը կգնան գործադիր։ Այնպես որ, ԱԺ ՔՊ ֆրակցիայում նոր դեմքեր կհայտնվեն:

Ասենք, ՔՊ աշխատակազմի որոշ աշխատակիցներ են պատգամավոր դարձել՝ Լեւոն Լեւոնյան, Արաքսյա Վարդանյան, Գյումրու ավագանուց` Քնարիկ Հարությունյան, Արագածոտնի փոխմարզպետ Միլադա Հովհաննիսյան, նրա եղբայրը՝ վարչապետի աշխատակազմի աշխատակից Սուրեն Հովհաննիսյանը։ Ֆեյքերի ՊՈԱԿ-ի ղեկավար Տարոն Չախոյանն է ԱԺ գնում, Հայկ Կոնջորյանի օգնական, Երեւանի ավագանու անդամ Նատալյա Սինորյանը, Գյումրու չկայացած քաղաքապետ Սարիկ Մինասյանը, Կոջոյանի անվան դպրոցի տնօրեն Ռուզաննա Երեմյանը, եթե տնօրենի պաշտոնը չնախընտրի, ԶՊՄԿ-ում կառավարության ներկայացուցիչ Նարեկ Բաբայանը եւ այլք։ Եթե ԲՀԿ-ն անցնի խորհրդարան, ապա ՔՊ-ն կունենա 61 պատգամավոր։

Գորիսի քաղաքապետ Առուշ Առուշանյանը շարունակում է հաշվեհարդարն այն ենթակաների հետ, որոնք «իր պատիվը գետնով են տվել»` Գորիսում ՔՊ-ի ջախջախիչ հաղթանակ չեն ապահովել։ Նա պատասխանատուներ էր նշանակել տեղամասերում, որոնք վստահեցրել էին, որ ամեն ինչ կարգին է` ՔՊ-ն «կրում է, ընդդիմությանը սատկացնելու են»։

Ընտրության գիշերը մեծ անակնկալ են եղել ՔՊ-ի ցածր տոկոսները, եւ Առուշն աշխատանքից ազատել է իր տեղակալ Արտյոմ Աղաջանյանին, խորհրդական Կարեն Ջավահիրյանին, օգնական Գրիգորին, Խնձորեսկի վարչական ղեկավարին:

Մեր աղբյուրն ասում է, որ սրանով նա չի բավարարվելու` մյուսներին ազատելու է, երբ հետընտրական կրքերը հանդարտվեն: Ասել է, որ պատժելու է իրեն խաբողներին։ Իսկ որ ինքը խաբել է հանրության, ընդդիմության սպասելիքները, ճամբարափոխ է եղել, դա չի հիշում:

Գորիսի քաղաքապետ Առուշ Առուշանյանը շարունակում է հաշվեհարդարն այն ենթակաների հետ, որոնք «իր պատիվը գետնով են տվել»` Գորիսում ՔՊ-ի ջախջախիչ հաղթանակ չեն ապահովել։ Նա պատասխանատուներ էր նշանակել տեղամասերում, որոնք վստահեցրել էին, որ ամեն ինչ կարգին է` ՔՊ-ն «կրում է, ընդդիմությանը սատկացնելու են»։

Ընտրության գիշերը մեծ անակնկալ են եղել ՔՊ-ի ցածր տոկոսները, եւ Առուշն աշխատանքից ազատել է իր տեղակալ Արտյոմ Աղաջանյանին, խորհրդական Կարեն Ջավահիրյանին, օգնական Գրիգորին, Խնձորեսկի վարչական ղեկավարին:

Մեր աղբյուրն ասում է, որ սրանով նա չի բավարարվելու` մյուսներին ազատելու է, երբ հետընտրական կրքերը հանդարտվեն: Ասել է, որ պատժելու է իրեն խաբողներին։ Իսկ որ ինքը խաբել է հանրության, ընդդիմության սպասելիքները, ճամբարափոխ է եղել, դա չի հիշում:

Իշխանությունը հետընտրական «չիստկա» է անում պետական գերատեսչություններում։ ՔՊ-ի հունիսի 5-ի ամփոփիչ հանրահավաքին մոբիլիզացրել էին վարչական ռեսուրսը, հրահանգ իջեցրել պետական աշխատողներին, որ բոլորն առանց բացառության մասնակցեն Հանրապետության հրապարակի հանրահավաքին: Ընդ որում՝ զգուշացրել էին, որ շուտ չծլկեն, մնան մինչեւ վերջ, քանի որ վերակացուներ են նշանակված, որոնք ստուգելու են` ներկա-բացակա են անելու։

Մեզ ասացին, որ վերակացուներն արդեն քանի օր է՝ պարզաբանումներ են պահանջում այն աշխատակիցներից, որոնք հանդգնել են հանրահավաքին չգնալ կամ գնացել են եւ շուտ հեռացել: Ասում են՝ յուրայինների եւ ընդդիմադիրների ցանկեր են կազմում, որ հետագայում ինչ-որ քայլեր արվեն: Որտեղ անգրագետ ու իր իրավունքները չիմացող աշխատող լինի, ստիպեն դիմում գրել գնալ, այլ տեղերում պարգեւավճարներ չտալով պատժել եւ այլն։ Բայց եթե մարդիկ մի փոքր դիմադրություն դրսեւորեն, ոչ մի բան չի հաջողվի անել:

Ռուսաստանի՝ հայ տնտեսվարողների նկատմամբ կիրառված սանկցիաներից հետո Փաշինյանը հայտարարեց, թե արտահանման այլընտրանքային շուկաներ են փնտրում, տարբեր երկրների հետ բանակցում ու ՌԴ-ից մերժված ապրանքների առաջին խմբաքանակներն արտահանել են։

Հայտնի է, որ մեկ ամսից ավելի է՝ Ռուսաստանը սահմանափակումներ է մտցրել Հայաստանից մի շարք գյուղմթերքների եւ այլ ապրանքների ներմուծման նկատմամբ։ Քարոզարշավի վերջին օրերին Փաշինյանը հայտարարեց, որ հայկական վարդերի եւ բանջարեղենի առաջին խմբաքանակներն արդեն արտահանվել են դեպի նոր, այլընտրանքային շուկաներ եւ նոր ուղղություններ, հատկապես` Եվրամիության անդամ կամ ԵՄ ձգտող երկրներ։ Փաշինյանը վստահեցրեց, որ տեղական արտադրանքի իրացման ճգնաժամ չի լինի, եւ ոչ մի ապրանք չվաճառված չի մնա։ Ասաց, որ երկրների անունները՝ ավելի ստույգ, կհրապարակվեն ապրանքի տեղ հասնելուց հետո։ Սակայն իշխանական շրջանակներից տեղեկացանք, որ արտահանված ապրանքները փոքրիկ, եթե չասենք՝ սիմվոլիկ քանակի են, չեն կարող որպես այլընտրանքային շուկա փոխարինել ԵԱՏՄ-ին:

Հենց այս հանգամանքով է պայմանավորված, որ այլեւս այդ մասին չեն խոսում եւ անգամ արտահանված ապրանքների ցանկ ու քանակ չեն հրապարակում: Իշխանական շրջանակներում անհանգիստ են, որ առաջիկայում գյուղմթերքի իրացման լուրջ խնդրի առաջ են կանգնելու, եւ հասկացել են, որ պոռոտախոսությունը, թե ռուսական սանկցիաներն ավարտվելու են հունիսի 8-ին, շատ հեռու է իրականությունից:

Այսօր Պաղպաղակի համաշխարհային օրն է և առաջարկում ենք, այդ համեղ քաղցրավենիքը գնելուց առաջ, ծանոթանալ մի քանի սկզբունքների: Այս մասին հայտնում են ՍԱՏՄ-ից։

«Եվ այսպես. ինչպե՞ս ընտրել անվտանգ և որակյալ պաղպաղակ։
Նախ պետք է իմանալ, որ գոյություն ունեն պաղպաղակի մի քանի տեսակներ, որոնք տարբերվում են օգտագործվող կաթնայուղի զանգվածային մասի տոկոսային հարաբերակցությամբ։

Առանձնացվում են պաղպաղակի հետևյալ տեսակները՝

-կաթնային պաղպաղակ – մինչև 7.5% կաթնայուղ,
-սերուցքային պաղպաղակ – 8–11.5% կաթնայուղ,
-պլոմբիր – առնվազն 12% կաթնայուղ,
-թթվակաթնային պաղպաղակ – մինչև 7.5% կաթնայուղ,
-կաթնայուղի փոխարինիչով պաղպաղակ (կաթնային և բուսական ճարպերի խառնուրդ) – մինչև 12% կաթնայուղ։

Կարևոր է ուշադրություն դարձնել բաղադրությանը։ Իրական դասական պաղպաղակը պետք է պարունակի միայն կաթ, սերուցք, շաքար, կարագ և բնական հավելումներ։ Եթե արտադրանքի անվանման մեջ նշված է միայն «կաթնային», «սերուցքային», «պլոմբիր» կամ «թթվակաթնային», ապա այն չպետք է պարունակի բուսական ճարպեր։

Իսկ ինչպե՞ս որոշել պաղպաղակի որակը խանութում:

Ուշադրություն դարձրեք ձևին ու կառուցվածքին. պաղպաղակը չպետք է լինի ձևափոխված։ Եթե այն կորցրել է իր ձևը, նշանակում է՝ պահպանման ջերմաստիճանային ռեժիմը խախտվել է։

Սառցե բյուրեղների առկայությունը ազդանշան է. եթե մակերեսին կամ ներսում կան սառցե բյուրեղներ, դա վկայում է կրկնակի սառեցման մասին։

Գույնը կարևոր է. որակյալ պաղպաղակը պետք է ունենա միատեսակ գույն։ Գույնի երանգը կախված է ճարպայնությունից և հավելումներից։

Չափազանց վառ գույները կարող են վկայել արհեստական ներկանյութերի օգտագործման մասին։

Եվ, իհարկե, ուշադրություն դարձրեք պիտանիության ժամկետին. թույլ մի տվեք ձեզ վաճառեն ժամկետանց պաղպաղակ»,-նշում են տեսչական մարմնից:

ՀՀ ՆԳՆ Կիբեռոստիկանությունը զգուշացնում է․

Եթե դուք ունեք Instagram-ում անհատական հաշիվ և օգտագործում եք նաև WhatsApp հավելված, ապա Instagram-ում Ձեր հաշվի գաղտնաբառի փոփոխելու ցանկության դեպքում Meta ընկերությունը համապատասխան հղումը կարող է ուղարկել նաև Ձեր WhatsApp հաշվին՝ կախված Ձեր կարգավորումներից։

Սակայն պետք է հաշվի առնել, որ խարդախները կարող են կեղծ հաղորդագրությունների միջոցով փորձել մոլորեցնել Ձեզ և արդյունքում ստանալ հասանելիություն անհատական հաշվին:

Եթե WhatsApp հավելվածի միջոցով Instagram անվամբ հաշվից ստացել եք գաղտնաբառի փոփոխության վերաբերյալ հղում, բայց դուք նման գործողություն չեք նախաձեռնել՝

• մի՛ մուտք գործեք այդ հղումով
• մի՛ տրամադրեք ձեր գաղտնաբառը կամ մուտքի տվյալները այդ հղման միջոցով

Համացանցում Ձեր անհատական հաշիվների անվտանգությունը առաջին հերթին սկսվում է Ձեր զգոնությունից: