Category: Hraparak

Խորհրդարանական ընտրություններում, մեծ հաշվով, կրած ֆիասկոյից հետո Նիկոլ Փաշինյանը որոշել է ՏԻՄ ընտրությունները թեժ ճակատամարտի վերածել եւ ամեն գնով հաղթանակ գրանցել համայնքներում: Իսկ դրա համար առաջին հերթին հարկավոր է, որ համայնքներում ամենալավ թեկնածուներն իրենցով անեն, որ մոտակա ընտրություններին նման տխուր փաստի առջեւ չկանգնեն։ Այս նպատակով, ըստ որոշ տեղեկությունների, կառավարությունում մարզպետների հավաք է տեղի ունեցել։ Տարածքային իշխանիկների առջեւ գրեթե ուլտիմատում է դրվել, որ հիմիկվանից պատրաստվեն աշնանը սպասվող ընտրություններին` ամեն գնով լավ թեկնածուների ընտրեն: Ասվել է, որ պարտվողները չեն ներվելու, ու մարզպետներն են ընտրությունների թիվ մեկ պատասխանատուն` ուրիշների վրա չգցեն պարտության մեղքը։ Նշենք, որ աշնանը 4 տասնյակից ավելի խոշոր համայնքներում ընտրություններ են նշանակված, որոշ մարզպետների ճակատագիրը, ըստ էության, դրանց արդյունքներից է կախված։

Արմեն Գրիգորյանի պաշտոնաթողությունը խիստ անակնկալ է եղել նրա համար, սրանով է պայմանավորված, որ նա խիստ հուզված ձայնով էր կառավարության նիստում հրաժեշտ տալիս գործընկերներին: Նա մտերիմների մոտ անկեղծացել է, որ ազատման որոշումը Փաշինյանն իր հետ չի քննարկել, ընդամենը փոխանցել է, որ պետք է ազատվի, որովհետեւ այդ պաշտոնին նշանակելու է Ալեն Սիմոնյանին։ Արմեն Գրիգորյանը մերձավորներին ասել է, որ մինչեւ հոգու խորքը վիրավորված է Փաշինյանից, քանի որ իրեն համարում է հեղափոխության մասնակից, որը 6 տարի շարունակ հավատարմորեն ծառայել է ընդհանուր գործին, եւ չէր կարելի իր հետ այդկերպ վարվել: Էլ ավելի մեծ անարգանք է համարել այն, որ Անվտանգության խորհրդի քարտուղարի պաշտոնից հետո Փաշինյանն իրեն առաջարկել է խորհրդականի պաշտոն, եւ մերժել է՝ հույս ունենալով, որ Փաշինյանը կհասկանա, թե ինչ խորն է վիրավորել իրեն: Թերեւս նաեւ հույսով, որ այլ՝ ավելի ազդեցիկ պաշտոն կառաջարկի իրեն, ինչպես եղավ Ալեն Սիմոնյանի պարագայում, որը մերժել էր որպես շարքային պատգամավոր ԱԺ գնալը եւ հասավ նրան, որ մի քիչ ավելի նշանակալի պաշտոն իրեն առաջարկեցին՝ այդ պաշտոնը խլելով Արմեն Գրիգորյանից։

Շվեդիայի ռազմաօդային ուժերի ռադիոէլեկտրոնային հետախուզության Gulfstream IV ինքնաթիռը թռչում է Ֆինլանդիայի տարածքով՝ ՌԴ սահմանների մոտ։ Այս մասին հայտնում են թռիչքային տվյալները, որոնք վերլուծել է ՌԻԱ Նովոստին:

Ինքնաթիռը օդ է բարձրացել Լինչյոպինգում գտնվող շվեդական օդուժի ավիաբազայից Մոսկվայի ժամանակով ժամը 9:00-ին, մտել է Ֆինլանդիայի օդային տարածք և սկսել է պտտվել Ռուսաստանի սահմանի երկայնքով՝ Կարելիայի Հանրապետության և Մուրմանսկի մարզի մոտակայքում:

Շվեդական Gulfstream-ը պարբերաբար հետախուզական թռիչքներ է իրականացնում Ռուսաստանի սահմանների մոտ: Ինքնաթիռը հետախուզություն է իրականացնում Ռուսաստանի Դաշնության ոչ միայն արևմտյան սահմանների մոտ, այլև երբեմն թռչում է Սև ծովի վրայով՝ Ղրիմի ափերից ոչ հեռու:

Պաշտպանության նախարար Սուրեն Պապիկյանը հայ նորագույն պատմության վատագույն նախարարներից է: Միայն պաշտոնական հաղորդագրությունները` խաղաղ պայմաններում զինվորների մահերի վերաբերյալ, վկայում են այն մասին, որ սա սուբյեկտիվ գնահատական չէ: Այսքան մահերը` ոչ ռազմական պայմաններում, մեկ բանի մասին են վկայում, որ բանակը մատնված է անտերության, եւ բանակում մարդ դանակահարելու համար դատապարտված պատմության ուսուցիչն այս տարիներին այդպես էլ չի կարողացել ընկալել իրեն վստահված պաշտոնի լրջությունն ու պատասխանատվությունը:

Երեկ տեղեկացանք, որ պաշտոններից ազատվել են պաշտպանության նախարարի խորհրդականներ Մելիքսեթ Պողոսյանը, Ռազմիկ Պետրոսյանը եւ Կամո Վարդանյանը։ Օրեր առաջ էլ պաշտոնից հեռացվել էր ռազմական ոստիկանության պետը, որին փոխարինել են նախկին ոստիկանապետ Արամ Հովհաննիսյանով («Չիխուախուա» մականունով):

ՊՆ-ի մեր աղբյուրի խոսքով` Պապիկյանը քավության նոխազներ է փնտրում, որ ինքնասպանությունների եւ բանակում տիրող բարձիթողի վիճակի մեղքը բարդի նրանց վրա եւ շարունակի պաշտոնավարել: Նա վերջին օրերին տարբեր կադրերի է աշխատանքից ազատում, որպեսզի ցույց տա, որ մեղավորները պատժվում են: Եթե զինվորներին սպանելու կամ ինքնասպանության հասցնելու համար Պապիկյանը մեղադրում է, օրինակ, ռազմական ոստիկանության պետին, հետաքրքիր է` ո՞ւմ է մեղադրում այն բանի համար, որ նախորդ ձմռանը զինվորը դիրքերից իջնելիս մնաց ձնահյուսի տակ եւ մահացավ, իսկ վերջում պարզվեց, որ բանակում զինվորին դիրքերից իջեցնելու համար անգամ մի սովորական «Վիլիս» չունի բանակը, սակայն նախարարն ու փոխնախարարները թանկարժեք, յուղը վրան մեքենաներով են շրջում:

Մեր տեղեկություններով` այժմ Պապիկյանը որոշել է դիրքեր ուղարկել բարձրաստիճան զինվորականներին, որպեսզի նրանք վերահսկեն իրավիճակը, որ զինվորներն իրար չսպանեն, դիրքերում քնելու համար իրար վրա «քֆուր չդնեն» եւ այլն: Մենք տեղեկացանք, որ արդեն իսկ որոշ բարձրաստիճան զինվորականների գործուղել են դիրքեր` մեկ-երկու ամսով: Տեսնենք, թե այս մեկանգամյա ակցիաներն ինչով կավարտվեն:

ՀԳ. Պաշտպանության նախարար Սուրեն Պապիկյանի խոսքով՝ բանակում քրեական ենթամշակույթի դեմ համակարգային պայքար է ընթանում:

«ՊՆ և ԶՈՒ ԳՇ կառուցվածքային ստորաբաժանումներից ձևավորված սպաների խմբերն իմ հրամանով կգործուղվեն հերթապահություն իրականացնող զորամասեր՝ տեղում ծառայող սպաներին, ինչպես նաև զորքերում ծառայության կազմակերպմանն աջակցելու նպատակով»,- գրել է նա։

Իրանում ցուցադրել են ամերիկյան խոցված սպառազինությունները։ Մասնավորապես՝ F-15E Strike Eagle ռմնակոծիչ ինքնաթիռը եւ MQ-9 Reaper եւ MQ-1C Gray Eagle դրոնները Yabhon H դրոնը, որը ԱՄԷ արտադրության է, ինչպես նաեւ՝ իրանական ՀՕՊ կողմից խոցված AGM-158 JASSM թեւավոր հրթիռը։ Իրանական մամուլում տեղ գտած հրապարակումների համաձայն, ցուցադրվել է նաեւ Hermes 900 դրոնը, որը եղել է բոլորովին անվնաս։ Այն ունի 923 սերիական համարը եւ գրավվել է մարտի չորսին։ Ցուցանմուշների մեջ կան նաեւ Starlink տերմինալներ, որոնք տեղակայված են եղել LUCAS կամիկաձե դրոնների վրա։

Ամերիկացի նախկին սենատոր Քրիստեն Սինեմայի դեմ 25 հազար դոլարի փոխհատուցման հայց է ներկայացվել։ Հայցվորը Խիզեր Ամելն է։ Հայցում նշված է, որ կին սենատորը սիրային կապ է ունեցել իր ամուսնու՝ Մեթյուի հետ, որի հետ ինքը ամուսնացած է եղել 14 տարի։ Եւ ինքը, ըստ էության, փոխհատուցում է պահանջում՝ ամուսնական դավաճանության համար՝ ամուսնու սիրուհուց։ Դատական հայցը քննվելու է Հյուսիսային Կարոլինայի նահանգի շրջանային դատարանի կողմից։

Հիշեցնենք, որ Հյուսիսային Կարոլինայում գործում է դեռ 1849 թվականին ընդունված օրենքը, որի համաձայն ամուսնալուծությունից հետո ամուսիններից մեկը կարող է ընտանիքի քայքայման համար փոխհատուցում պահանջել։ Հուլիսի վերջին տեղի է ունեցել սենատոր Սինեմայի հարցաքննությունը։ Վերջինս խոստովանել է Մեթյուի հետ իր սիրավեպի մասին, մանրամասնորեն ներկայացրել սիրավեպի սկսվելն ու ինտիմ մանրամասները։ Ուշագրավ է այն, որ սենատորը հայտարարել է, որ իրենց սեքսուալ հանդիպումները տեղի են ունեցել նահանգի տարածքից դուրս՝ Արիզոնայում եւ Կոլորադոյում ունեցած իր տներում։ Ինքը երբեք սեքսուալ կապ չի ունեցել Մեթյուի հետ Հյուսիսային Կարոլինայի տարածքում։ Հետեւաբար՝ պահանջել է, որ հայցը մերժվի։ Դատական նիստը շարունակվելու է օգոստոսի 19-ին։

Թուրքիայի առողջապահության նախարար Քեմալ Մեմիշօղլուն Ստամբուլում հանդիպել է առողջապահության ոլորտի լրագրողների հետ։ Նա խոսել է Թուրքիայում տարածված հիվանդությունների ու մահերի պատճառների մասին ու ընդգծել, որ ծխելը Թուրքիայում հիվանդությունների և մահերի հիմնական պատճառներից մեկն է:

«Մեր երկրում տղամարդկանց 46%-ը ծխում է: Մենք աշխարհում երկրորդն ենք ծխողների թվով՝ Ինդոնեզիայից հետո։ Մահերի ավելի քան 50%-ը կազմող հիվանդությունների հիմնական պատճառը ծխելն է, անգործությունը և ավելորդ քաշը»,- նշել է նախարարը, նրա խոսքերը մեջբերում է Ermenihaber-ը։

Պրոդյուսեր Ջերի Բրուկխայմերը հայտարարել է, որ դերասան Ջոնի Դեփի հետ բանակցություններ են ընթանում «Կարիբյան ծովի ծովահենների» շարունակությունը նկարահանելու համար։ «Մենք բանակցություններ ենք վարում Ջոնիի (Դեփի) հետ եւ աշխատում ենք սցենարի վրա։ Հույս ունենք, որ կկարողանանք ունեցած պլանները կյանքի կոչել»,- Բրուկխայմերի խոսքերն է մեջբերում Deadline-ը։ Հայտնի է դարձել նաեւ, որ շարունակության մեջ Ջոնի Դեփի կողմից մարմնավորված հերոսի կերպարը կլինի երկրորդական։

Օգոստոսի 17-ի հայաստանյան մեդիա-օրակարգի առանցքում խորհրդարանի նիստերում ազգային, հոգևոր և կրթական արժեքների շուրջ բորբոքված սուր բախումներն են, ՊՆ-ում զինծառայողի մահվան ֆոնին իրականացված խոշոր պաշտոնանկությունները, Արմավիրում գյուղացիների բողոքի ակցիաները և Մերձավոր Արևելքում ԱՄՆ-Իրան ռազմաքաղաքական նոր սպառնալիքները։ Օրվա լրահոսից ընդհանուր առմամբ ուսումնասիրվել է 2,679 հոդված։ Դրանց հիման վրա և մեդիա մոնիտորինգ համակարգի վերլուծական գործիքակազմի կիրառմամբ էլ կազմվել է օրվա թոփը։

ԱԺ նիստերը․ դպրոցների փակման սկանդալը, Սիսակ Գաբրիելյանի թեկնածությունն ու բանաստեղծական բախումները – 612 հիշատակում

• Փաստեր.
  Ազգային ժողովի իններորդ գումարման առաջին նստաշրջանում ԿԳՄՍ հարցերի հանձնաժողովի նախագահի պաշտոնում Սիսակ Գաբրիելյանի թեկնածության քննարկման ժամանակ ընդդիմադիր պատգամավոր Լիլիթ Գալստյանը սուր քննադատության է ենթարկել իշխող թիմի կրթական քաղաքականությունը։ Նա հայտարարել է, որ սեպտեմբերից օպտիմալացման անվան տակ փակվելու կամ միավորվելու է 229 փոքր դպրոց, իսկ «300 դպրոց, 500 մանկապարտեզ» ծրագիրը ձախողվել է (մինչև 2025-ի վերջ կառուցվել է միայն 122 դպրոց և 280 մանկապարտեզ)։ Բացի այդ, Լիլիթ Գալստյանը խայտառակություն է որակել նոր Այբբենարանում Մեսրոպ Մաշտոցի նկարը QR կոդով փոխարինելը։ Դահլիճում կրքերն ավելի են բորբոքվել, երբ ՔՊ-ական Գարիկ Սարգսյանն արտասանել է Ռաֆայել Պատկանյանի բանաստեղծությունը՝ ակնարկելով Սամվել Կարապետյանի՝ ՀԷՑ-ի վրա «թքած ունենալու» արտահայտությունը, ինչին ընդդիմադիրներ Վրույր Այվազյանն ու Արամ Վարդևանյանն արձագանքել են Ալեն Սիմոնյանի՝ թքելու սկանդալի և սառնարանում գետնին գցված զոհվածների մասունքների հիշատակմամբ։
• Մեդիայի ուշադրության կենտրոնում․

Լրատվամիջոցները նշում են, որ խորհրդարանի նիստերը քաղաքական բովանդակային քննարկումից վերածվել են «կրկեսի» կամ «Ալֆրեդի սենյակի», որտեղ կողմերը զբաղված են սադրանքներով, անձնական վիրավորանքներով և պառակտմամբ։ Ընդդիմադիր նարատիվները շեշտադրում են, որ իշխանությունն, իր ոչ հեռատես քայլերով, դատարկում է սահմանամերձ գյուղերը, իսկ կրթության ոլորտում զբաղված է «դիլետանտիզմով»։ Իշխանական նարատիվները (Թագուհի Ղազարյան, Ռուզաննա Երեմյան) պնդում են, որ դպրոց փակվելով գյուղ դատարկվելու թեզը կեղծ է, քանի որ մինչև ԽՍՀՄ-ը գյուղերը հազարամյակներ դպրոց չեն ունեցել, և որ իրենց օրոք կառուցվել կամ նորոգվել է 172 դպրոց և 332 մանկապարտեզ։

• Հակասող նարատիվներ․

Իշխող «Քաղաքացիական պայմանագիր» խմբակցությունը (Ռուզաննա Երեմյան, Սիսակ Գաբրիելյան) պնդում է, որ նախկինների տարիներին կրթությունը քայքայվել է, և իրենք իրականացնում են լայնածավալ շինարարություն, իսկ կրթությունը չպետք է լինի անվճար։ Ընդդիմությունը (Աննա Գրիգորյան, Մեսրոպ Մանուկյան, Լիլիթ Գալստյան) հակադարձում է, որ իշխող թիմն անգամ երկրորդ դասարան տեղափոխվելու կարիք ունի, իսկ նախագահ Քոչարյանի տարիներին կառուցվել է 154 նոր դպրոց, այլ ոչ թե պարզապես նորոգվել։

ԱՄՆ-Իրան առճակատումը. Հորմուզի նեղուցի ճգնաժամը, հրադադարի երկարաձգման հերքումն ու Թրամփի սպառնալիքները – 412 հիշատակում

• Փաստեր.
  ԱՄՆ նախագահ Դոնալդ Թրամփը Fox News-ին տված հարցազրույցում սպառնացել է հարվածներ հասցնել և ռմբակոծել Օմանին, եթե վերջինս խոչընդոտի ամերիկյան ռազմածովային ուժերի կողմից Իրանի շրջափակմանը։ Թրամփը նաև հայտարարել է, որ Իրանը պետք է «բարձրացնի կապիտուլյացիայի սպիտակ դրոշը»։ Զուգահեռաբար, Al Arabiya հեռուստաալիքը հայտնել էր, որ ԱՄՆ-ն և Իրանը համաձայնության են եկել երկարաձգել 60-օրյա հրադադարը, որի ժամկետը լրանում էր օգոստոսի 17-ին։ Սակայն Իրանի ԱԳՆ խոսնակ Էսմայիլ Բաղային հերքել է 60-օրյա ժամկետ սահմանող որևէ դրույթի գոյությունը՝ նշելով, որ բանակցություններ չեն սկսվել, քանի որ ԱՄՆ-ն հենց սկզբից խախտել է փոխըմբռնման հուշագիրը։
• Մեդիայի ուշադրության կենտրոնում.

Մեդիան մանրամասնորեն վերլուծում է Հորմուզի նեղուցի շուրջ ստեղծված ճգնաժամը, որը, ըստ վերլուծաբան Վահե Դավթյանի՝ պատմության մեջ նավթի մատակարարումների ամենախոշոր խափանումն է (առաջարկի 10.1 մլն բարել/օրով անկում)։ Իրանական կողմը պնդում է, որ ԱՄՆ-ի և Իսրայելի ջանքերը միայն ժամանակ շահելու և մարտական նոր փուլին նախապատրաստվելուն են ուղղված։

• Հակասող նարատիվներ

Թրամփը պնդում է, որ ԱՄՆ-ն ոչ պաշտոնական ուղիներով կապի մեջ է ԻՀՊԿ-ի ղեկավարության հետ։ Ի պատասխան՝ ԻՀՊԿ խոսնակ Հոսեյն Մոհեբին կտրականապես հերքել է ամերիկյան կողմի հետ որևէ գաղտնի բանակցության կամ երկխոսության առկայությունը։

Զինծառայող Գրիգոր Զաքարյանի մահվան դեպքով կալանավորումն ու ՊՆ-ում կադրային կտրուկ պաշտոնանկությունները – 325 հիշատակում

• Փաստեր.
  Օգոստոսի 13-ին ՊՆ N զորամասի ժամկետային զինծառայող Գրիգոր Զաքարյանի մահվան դեպքով հարուցված քրեական վարույթի (ինքնասպանության հասցնելը) շրջանակներում կալանավորվել է նրա ծառայակիցը։ Ըստ ՔԿ-ի՝ պարզվել է, որ դիրքում քնելու հարցի շուրջ զինվորին հայհոյել են։ Ողբերգական դեպքի ֆոնին, Նախագահի հրամանագրերով պաշտոններից ազատվել են ԶՈւ բարոյահոգեբանական ապահովման վարչության պետ Սերյոժա Ստեփանյանը և Ռազմական ոստիկանության պետ Աշոտ Զաքարյանը։ Վարչապետի որոշմամբ էլ ՌՈ նոր պետ է նշանակվել նախկին ոստիկանապետ, գեներալ-մայոր Արամ Հովհաննիսյանը, ինչպես և նախօրեին գրում էր մամուլը։
• Մեդիայի ուշադրության կենտրոնում.

Մամուլն ու հանրությունը սուր քննադատությամբ են արձագանքել բանակում տեղի ունեցած հերթական ոչ մարտական զոհին։ ՊՆ-ն (Սուրեն Պապիկյան) պնդում է, որ բանակում քրեական ենթամշակույթի դեմ համակարգային պայքար է ընթանում, իսկ սպաների հատուկ խմբեր կգործուղվեն զորամասեր՝ տեղում վերահսկողությունն ուժեղացնելու համար։

• Հակասող նարատիվներ․

Ընդդիմադիր պատգամավոր Տիգրան Աբրահամյանը պնդում է, որ իշխող ուժի խնդիրը ոչ թե կարգապահական խնդիրների կամ մահերի կանխումն է, այլ նախընտրական քարոզարշավին ծառայած սեփական նեղ շրջապատին անգործ չթողնելն ու կադրային ձևական տեղաշարժերը։ ՔՊ պատգամավոր Անդրանիկ Քոչարյանը հակադարձում է, որ Աշոտ Զաքարյանն ինքն է զեկուցագիր գրել, իսկ Արամ Հովհաննիսյանը վճռորոշ պահերին երկիրը ցնցումներից փրկած փորձառու կադր է։

Արմավիրի մարզի գյուղացիների բողոքի ակցիաները և դեղձի իրացման ու ցածր գների ճգնաժամը – 248 հիշատակում

• Փաստեր.
  Արմավիր խոշորացված համայնքի Խանջյան և Հացիկ գյուղերի բնակիչները փակել են Արմավիր-Գյումրի ճանապարհը՝ բողոքելով դեղձի իրացման խնդիրներից, քանի որ արտահանողներն առաջարկում են բերքը գնել կիլոգրամը չնչին՝ 100 դրամով, ինչը չի ծածկում ինքնարժեքը։ Գյուղացիները նշում են, որ հարյուրավոր տոննաներով դեղձը հասունացել է և թափվում է ծառերի տակ, իսկ պետական սուբսիդիաներից իրենք օգնություն չեն ստանում։
• Մեդիայի ուշադրության կենտրոնում.

Մամուլը լայնորեն լուսաբանում է գյուղատնտեսական խորացող ճգնաժամը։ Ընդդիմադիր և անկախ վերլուծաբանները (Տիգրան Աբրահամյան, Ոսկան Սարգսյան) շեշտում են, որ Հայաստանի արտահանելի հատվածը հայտնվել է կոլապսի առաջ, քանի որ իշխանությունները ձախողել են ռուսական շուկայի սահմանափակումների չեղարկումն ու չեն կարողացել նոր այլընտրանքային շուկաներ բացել։

• Հակասող նարատիվներ․

Արմավիրի համայնքապետ Վարշամ Սարգսյանը հայտարարել է, որ այս ամենի հետևում քաղաքական ենթատեքստ կա, և փորձում են գյուղացիներին օգտագործել քաղաքական խաղերում։ Գյուղացիները կտրուկ հերքում են սա՝ պնդելով, որ սա զուտ իրենց ապրուստի և օրվա հացի խնդիրն է։

Հայաստան-Ադրբեջան առևտրաշրջանառության ցուցանիշներն ու հանրային քննարկումները – 185 հիշատակում

• Փաստեր.
  Ադրբեջանի պետական մաքսային կոմիտեի տվյալներով՝ 2026 թվականի հունվար-հուլիս ամիսներին Ադրբեջանից Հայաստան է արտահանվել 17 միլիոն 372,1 հազար դոլարի ապրանք, որը կազմում է Ադրբեջանի ընդհանուր արտահանման ծավալի 0,09%-ը։ Միևնույն ժամանակ, ընթացիկ տարվա մարտին Ադրբեջանը առաջին անգամ Հայաստանից ներմուծել է ընդամենը 960 դոլարի ապրանք, իսկ հաջորդող ամիսներին ներմուծում չի եղել։
• Մեդիայի ուշադրության կենտրոնում.

Այս վիճակագրական տվյալները մեդիա դաշտում սուր վերլուծությունների տեղիք են տվել։ Ընդդիմադիր մեկնաբաններն ու իրանագետ Վարդան Ոսկանյանը սա գնահատում են՝ որպես Հայաստանի տնտեսական և պետական արժանապատվության անկում և բացահայտ կախվածության խորացում։ Նրանք շեշտում են, որ նորմալ չէ, երբ Բաքվի մասնագետները Հայաստանի տարածքի ներսում (Մեղրիում) որոշում են էլեկտրասյուների տեղադրման վայրերը։ Իշխանական նարատիվներում սա ներկայացվում է՝ որպես տնտեսության դիվերսիֆիկացման և տարածաշրջանային կապերի ապաշրջափակման դրական գործընթաց։

ՕՐՎԱ ԹՈՓ ՆՅՈՒԶՄԵՅՔԵՐՆԵՐԸ (ՄԵԴԻԱ-ԴԵՄՔԵՐԸ)

1. Սիսակ Գաբրիելյան – ԱԺ ԿԳՄՍ հանձնաժողովի նախագահի թեկնածու, որը նիստերին թեժ բանավեճեր ունեցավ ընդդիմադիրների հետ «300 դպրոց» ծրագրի ձախողման, Ակադեմիական քաղաքի ստեղծման և կրթության վճարովի լինելու թեմաներով։
2. Լիլիթ Գալստյան – ԱԺ մարդու իրավունքների պաշտպանության հանձնաժողովի նախագահի ընդդիմադիր թեկնածու, որը ԱԺ ամբիոնից սուր քննադատեց 229 դպրոցների փակման ծրագիրն ու Այբբենարանում Մեսրոպ Մաշտոցի նկարը QR կոդով փոխարինելը։
3. Արամ Հովհաննիսյան – Գեներալ-մայոր, որը բանակում ոչ մարտական պայմաններում տեղի ունեցած հերթական մահից հետո նշանակվեց ՊՆ Ռազմական ոստիկանության նոր պետ։
4. Դոնալդ Թրամփ – ԱՄՆ նախագահ, որի սպառնալիքները Օմանին ռմբակոծելու և Իրանի դեմ կոշտ գործողությունների շուրջ դարձան միջազգային լրահոսի կենտրոնական թեման։
5. Մարտուն Գրիգորյան – ԲՀԿ-ական նախկին պատգամավոր, որը «Արմավիր» ՔԿՀ-ից հղած իր առաջին ուղերձով իր նկատմամբ հարուցված գործը որակեց որպես բացահայտ քաղաքական հետապնդում։

ԿԱՐԵՎՈՐ ՆՈՐՈՒԹՅՈՒՆՆԵՐ, ՈՐՈՆՔ ԹՈՓՈՒՄ ՉԵՆ

• Արմեն Աշոտյանի գործի նախաքննության ավարտը. Բրյուսովի համալսարանի շենքի օտարման և փողերի լվացմանն օժանդակելու գործով Արմեն Աշոտյանի և ևս երկու անձի մասով նախաքննությունն ավարտվել է։
• «Արտ լանչ»-ի կասեցումները. ՍԱՏՄ-ն ստուգումներ է իրականացնում ցանցի բոլոր մասնաճյուղերում, և երկուսում հայտնաբերված խախտումների պատճառով գործունեությունը կասեցվել է։
• Թավրիզ-Երևան չվերթերի վերականգնումը. Երկու տարվա դադարից հետո Pouya Airlines-ը շաբաթական երկու անգամ կվերականգնի թռիչքները՝ սկսած օգոստոսի 20-ից։
• Անվտանգության խորհրդի գրասենյակի կադրային փոփոխությունը. SC գրասենյակի ղեկավարի ժամանակավոր պաշտոնակատար Անահիտ Շիրինյանն ազատվել է պաշտոնից։
• Վանաձորի Հրանտ Մաթևոսյանի այգու հողատարածքի վերադարձը. Վանաձոր համայնքին է վերադարձվել Հրանտ Մաթևոսյանի անվան այգում գտնվող 1,346 քմ մակերեսով հողամասը։

ԵՐԵԿՈՅԱՆ ՆՈՐՈՒԹՅՈՒՆՆԵՐ

• Toyota, Tesla և Alfa Romeo ավտոմեքենաների հետկանչը. Ծրագրային և տեխնիկական անսարքությունների պատճառով աշխարհում հետ է կանչվում ավելի քան 600 հազար Camry Hybrid, Tesla Model 3/Y և Alfa Romeo Tonale մեքենաներ։
• Մալիշկա գյուղի «ուրվականը». Վայոց ձորի Մալիշկա գյուղում արդեն 10 օր հայտնվող դիմակավորված անձը քարեր է նետում տների վրա և ահաբեկում բնակիչներին, իսկ գյուղի տղամարդիկ գիշերային հերթապահություններ են սահմանել։
• Ըմբիշ Սամվել Տերտերյանի չեմպիոնությունը. 77 կգ քաշային Սամվել Տերտերյանը հաղթել է ադրբեջանցի ըմբիշին և դարձել հունահռոմեական ոճի ըմբշամարտի Մ20 տարեկանների աշխարհի չեմպիոն։
• Լիխտենշտեյնի գահը ժառանգելու կանոնների փոփոխությունը. Լիխտենշտեյնում փոխվել են գահը ժառանգելու կանոնները, և կանայք այսուհետ կկարողանան գահ բարձրանալ։
• Մենչի դստեր ամուսնալուծությունը. Պրոդյուսեր Արմեն Պետրոսյանի դուստր Էլինա Պետրոսյանը հաստատել է իր ամուսնալուծության լուրը Լոս Անջելեսում տեղի ունեցած հարսանիքից մեկ տարի անց։