Category: News.am

ԱՄՆ-ի և Իրանի միջև փոխըմբռնման հուշագրի շուրջ բանակցություններում չլուծված առանցքային հարցերից մեկը 2023 թվականին բանտարկյալների փոխանակումից հետո Կատարում տեղակայված իրանական շուրջ 6 մլրդ դոլարի հնարավոր ապասառեցումն է, գրել է The New York Post-ը։

Պարբերականի վկայակոչած ամերիկացի պաշտոնյան հայտնել է, որ այդ միջոցները կարող են ապաշրջափակվել փուլ առ փուլ և ուղղվել սննդամթերքի ու դեղորայքի գնմանը։ Միևնույն ժամանակ, նրա խոսքով՝ դրանց օգտագործումը կախված կլինի Իրանի կողմից մի շարք պայմանների կատարումից, այդ թվում՝ Հորմուզի նեղուցի բացումից և ականազերծումից։

Չի հստակեցվում՝ արդյո՞ք այս պայմաններն արտացոլում են ԱՄՆ պաշտոնական դիրքորոշումը, թե՞ քննարկվող համաձայնագրի նախագծի տարրեր են։

Սկզբնապես այդ միջոցները 2023 թվականին ապասառեցվել էին Ջո Բայդենի վարչակազմի կողմից՝ ԱՄՆ-ի և Իրանի միջև բանտարկյալների փոխանակման գործարքի շրջանակում, և Հարավային Կորեայից փոխանցվել էին Կատարի հաշիվներ։ Սակայն 2023 թվականի հոկտեմբերին Իսրայելի դեմ ՀԱՄԱՍ խմբավորման հարձակումից և Գազայում պատերազմի սկսվելուց հետո այդ միջոցների հասանելիությունը սառեցվեց։

Աղբյուրների տվյալներով՝ բանակցությունները մնում են չավարտված։ ԱՄՆ նախագահ Դոնալդ Թրամփը հայտարարել է, որ վերջին քննարկումն անցկացնում է Սպիտակ տան Իրավիճակային սենյակում։

Ավելի ուշ վարչակազմի ներկայացուցիչը հայտնել է, որ հանդիպումն ավարտվել է առանց վերջնական որոշման, ընդ որում՝ համաձայնագիրը մոտ է ավարտմանը, սակայն պահանջում է հետագա համաձայնեցում, այդ թվում՝ իրանական միջոցների հարցում։

Հայաստանի համար գլխավոր խնդիրը շարունակում է մնալ երաշխավորված խաղաղության հասնելը, որը կբացառի նոր պատերազմի հնարավորությունը։ Այս մասին այսօր ընտրողների հետ հանդիպման ժամանակ հայտարարել է «Բարգավաճ Հայաստան» կուսակցության առաջնորդ Գագիկ Ծառուկյանը։

Ծառուկյանը ընդգծել է, որ Հայաստանը պետք է ոչ թե պարզապես խաղաղության համաձայնագիր ստորագրի Ադրբեջանի հետ, այլ հասնի դրա պահպանման միջազգային երաշխիքներին։

«Պետք է մեկընդմիշտ փակել պատերազմի դռները։ Դա հնարավոր կդառնա միայն այն ժամանակ, երբ խաղաղությունը լինի երաշխավորված, իսկ մեր կողքին գտնվեն մեր հիմնական դաշնակիցները, որոնք իրենց ստորագրությունները կդնեն ձեռք բերված պայմանավորվածությունների տակ՝ այդպիսով երաշխավորելով դրանց կատարումը», – հայտարարել է նա։

Քաղաքական գործիչը ուշադրություն է հրավիրել այն հանգամանքի վրա, որ, չնայած ձեռք բերված խաղաղության մասին իշխանությունների հայտարարություններին, անվտանգության առանցքային հարցերը մնում են չլուծված․ ադրբեջանական զինված ուժերը շարունակում են օկուպացնել Հայաստանի ինքնիշխան տարածքները, իսկ հայ ռազմագերիները մինչ օրս հայրենիք չեն վերադարձվել։

«Եթե այսօր իսկապես խաղաղություն է, ապա ինչո՞ւ մեր գերիները չեն վերադառնում։ Ինչո՞ւ են շարունակվում նոր պահանջներ առաջադրվել»։ — հարց է բարձրացրել Ծառուկյանը։

«Բարգավաճ Հայաստանի» առաջնորդը կարծում է, որ առկա խնդիրները պետք է լուծել բանակցությունների և կշռադատված դիվանագիտության միջոցով։

Նրա կարծիքով՝ արդյունքի հասնելու համար երկրին անհրաժեշտ են ամուր միջազգային կապեր, գրագետ բանակցային թիմ և ազգային շահերի շուրջ հասարակության համախմբում։

Ծառուկյանը նաև հայտարարել է, որ իր թիմի իշխանության գալու դեպքում կադրային քաղաքականությունը չի կառուցվելու կուսակցական սկզբունքով։ Նրա խոսքով՝ առանցքային պաշտոնները պետք է զբաղեցնեն մասնագետները՝ անկախ կուսակցական պատկանելությունից։

«Մարդը կարող է լինել անկուսակցական կամ ներկայացնել մեկ այլ քաղաքական ուժ։ Կարևորը, որ նա ապացուցած լինի իր արդյունավետությունը և կարողանա օգտակար լինել պետությանը», – նշել է նա։

Քաղաքական գործիչը կոչ է արել տարբեր հասարակական և քաղաքական ուժերի միավորմանը՝ հայտարարելով, որ այսօր երկրին անհրաժեշտ են մարդիկ, որոնք ունակ են ապահովել անվտանգությունը, զարգացնել տնտեսությունը և լուծել քաղաքացիների սոցիալական խնդիրները։

«Հայաստան» դաշինքը վաղը հրավիրում է Ազատության հրապարակ՝ հանրահավաքի։

«Մեր երկիրը կանգնած է կարևոր ընտրության առաջ։

Այսօր, առավել քան երբևէ, կարևոր է յուրաքանչյուրի մասնակցությունը։

Մայիսի 31-ին մենք պետք է ցույց տանք, որ Հայաստանում կա միավորված, արժանապատիվ ու չլռող հասարակություն։

Մենք

Ո’Չ ենք ասում բռնաճնշումներին, ատելությանն ու պառակտմանը։

ԱՅՈ’ ենք ասում միասնությանն ու ինքնության պահպանմանը։

Մայիսի 31-ին, ժամը 17:00-ին հանդիպում ենք Ազատության հրապարակում՝ Հայաստան դաշինք-ի հանրահավաքին։

Միացի՛ր։

Միասին տեր կանգնենք մեր երկրին։

Ազատության հրապարակ

Մայիսի 31, 17:00»,– ասվում է դաշինքի տարածած հայտարարության մեջ։

Մոլդովայի՝ ՆԱՏՕ-ին անդամակցությունը ներկայում քիչ հավանական է, քանի որ քաղաքացիների մեծամասնությունը չի աջակցում այդ գաղափարին՝ չնայած տարածաշրջանում անվտանգության իրավիճակին։ Այս մասին մայիսի 30-ին Vocea Basarabiei-ի եթերում հեռարձակվող Eurosecuritate ծրագրում հայտարարել է արտաքին գործերի նախարար Միխայ Պոպշոյը, հաղորդում է Newsmaker-ը։

Նա ափսոսանք է հայտնել, որ մոլդովացի քաղաքական գործիչները խուսափում են այս թեմայի բաց քննարկումից՝ դրա ոչ ժողովրդական լինելու պատճառով։

Պատասխանելով Ռուսաստանի՝ Ուկրաինայի դեմ ագրեսիայի և տարածաշրջանում անկայունության ֆոնին Մոլդովայի՝ ՆԱՏՕ-ի հետ մերձեցման հեռանկարների մասին հարցին՝ ԱԳ նախարարը ընդգծել է, որ առանցքային գործոնը շարունակում է մնալ քաղաքացիների կամքը։

«ՆԱՏՕ-ին անդամակցությունը, ինչպես ցանկացած միջազգային կազմակերպության, կախված է մեր քաղաքացիների կամքից։ Լայն աջակցություն լինելու դեպքում դա կարող է դառնալ լուրջ հեռանկար և մտնել օրակարգ։ Մեր դեպքում, ինչպես հայտնի է, այդպիսի աջակցություն չի եղել», — հայտարարել է Պոպշոյը։

Նախարարը նաև նշել է, որ անձամբ աջակցում է ՆԱՏՕ-ի հետ համագործակցության գաղափարին և կարծում է, որ այս թեման պետք է ավելի բաց քննարկվի հասարակությունում և ԶԼՄ-ներում։ Նրա խոսքով՝ մոլդովացի քաղաքական գործիչները հաճախ խուսափում են այս քննարկումից։ Նա հավելել է, որ Հյուսիսատլանտյան դաշինքը համարvում է անվտանգության երաշխավոր և ընդգծել է ՆԱՏՕ-ի՝ Քիշնևի կենտրոնում աշխատանքային հեռանկարները։

iData սոցիոլոգիական ընկերության մայիսին հրապարակված վերջին հարցման համաձայն՝ Մոլդովայի քաղաքացիների 54,5%-ը չի աջակցում երկրի՝ ՆԱՏՕ-ին անդամակցությանը։ Ինտեգրմանը կողմ է արտահայտվել հարցվածների 33,6%-ը։

Լեհաստանի վարչապետ Դոնալդ Տուսկը X սոցցանցում հանդես է եկել հայտարարությամբ, որում ՆԱՏՕ-ին կոչ է արել լրջորեն վերաբերվել Մոսկվայի հայտարարություններին։

«Լեհաստան, Բալթյան երկրներ, հիմա՝ Ռումինիա։ Ռուսաստանի կողմից սադրանքներն ավելի ու ավելի են շատանում։ Երեկ Ռուսաստանի նախկին նախագահ Մեդվեդևը հայտարարել է, որ ԵՄ քաղաքացիների խաղաղ քունն ավարտվել է։ ՆԱՏՕ-ում բոլորը պետք է վերջապես սկսեն լրջորեն վերաբերվել այս փաստերին և խոսքերին»,- նշել է Տուսկը։

Poland, Baltic states, now Romania. More and more Russian provocations. Yesterday the former president @MedvedevRussiaE said that the peaceful sleep of the EU citizens is over. Everyone in NATO should finally start taking these facts and words seriously.

— Donald Tusk (@donaldtusk) May 30, 2026

ԱՄՆ Ազգային պարկերի ծառայության տվյալներով՝ Ալյասկայի Դենալի (Մակ-Քինլի) լեռան վրա լատվիացի երեք լեռնագնացներ են զոհվել՝ երթուղու վտանգավոր հատվածում վայր ընկնելու հետևանքով։ Associated Press-ի հաղորդմամբ՝ արշավախմբի չորրորդ մասնակցին հաջողվել է փրկել։

Միջադեպը տեղի է ունեցել չորեքշաբթի օրը՝ West Buttress արևմտյան երթուղու վրա՝ Դենալի լեռնանցքի մոտակայքում՝ մոտ 5550 մետր բարձրության վրա։ Պարկի տվյալներով՝ յոթ հոգուց բաղկացած խումբը շարժվում էր մի հատվածով, որը հայտնի է իր բարդ սառցային պայմաններով և հաճախակի պատահարներով։

Վայր ընկնելուց հետո ողջ մնացած մասնակիցներից երեքը փորձել են օգնություն ցուցաբերել, սակայն ավելի ուշ նրանց վիճակը վատացել է, և նրանց տարհանել են։

Փրկարարական գործողությունն իրականացվել է ծայրահեղ պայմաններում. ողջ մնացածներից մեկին տարհանել են ուղղաթիռային ճոպանի օգնությամբ, քանի որ վայրէջք կատարելն անհնար էր, այնուհետև նրան տեղափոխել են հիվանդանոց։ Խմբի մնացած անդամներին ևս ավելի ուշ իջեցրել են լեռից։

Մոտ 6190 մետր բարձրություն ունեցող Դենալին համարվում է Հյուսիսային Ամերիկայի ամենաբարձր գագաթը։ West Buttress երթուղին ամենատարածվածն է, սակայն ներառում է ճեղքերով, սառցե պատերով և ձնահյուսի վտանգով հատվածներ։

Պարկի տվյալներով՝ ամեն տարի լեռ են բարձրանում մոտ 1000–1200 լեռնագնաց, և կեսից պակասն է հասնում գագաթին։ Վերելքների ողջ պատմության ընթացքում այստեղ ավելի քան 130 մարդ է զոհվել այդ լեռան վրա։

Մեր տնտեսությունը Ռուսաստանի հետ շատ փոխկապակցված է, ներմուծումների ու արտահանումների մոտավորապես 39-40 %-ը Ռուսաստանի հետ է։ Կապակցված ենք նաև էներգետիկայի, տուրիզմի առումով։ Այդ կախվածությունն ամենաշատը խորացել է վերջին 6-7 տարիների ընթացքում։

Այս մասին Սյունիքում ընթացող քարոզարշավի ժամանակ ասել է «Միասնության թևերի» պատգամավորի թեկնածու, տնտեսագետ Դավիթ Անանյանը։

«Կարող ես հարցեր առաջ քաշել Ռուսաստանի առաջ, բայց թշնամանալ, միանգամից խռովկան հարսի նման թողնես-գնաս, չի կարելի։ Մենք պետք է խորացնենք հարաբերությունները Եվրոպայի առանձին երկրների հետ, հատկապես դաշնակից ու բարեկամ երկրների հետ, օրինակ՝ Ֆրանսիա, Հունաստան»,- ասել է Անանյանը։

Պատգամավորի թեկնածուն նշել է, որ նոր շուկաներ գրավելու համար անհրաժեշտ է տնտեսական ապրանքները հարմարեցնել եվրոպական չափանիշներին։ Դավիթ Անանյանը համոզմունք է հայտնել, որ այդ ծրագիրը լիովին իրատեսական է, պարզապես անհրաժեշտ են բանիմաց մարդիկ։