Ավելի քան 25 հազար մարդ է մահացել Եվրոպայում 2026 թվականին ծայրահեղ շոգի պատճառով՝ ըստ Bloomberg գործակալության հավաքած վերջին հասանելի տվյալների:
Մահվան դեպքերի ամենամեծ թիվը գրանցվել է Գերմանիայում. Ռոբերտ Կոխի ինստիտուտի գնահատմամբ՝ ապրիլից սկսած շոգը կարող էր հանգեցնել մոտ 11,9 հազար լրացուցիչ մահվան:
Իսպանիայի, Ֆրանսիայի, Մեծ Բրիտանիայի, Շվեյցարիայի և Նիդեռլանդների պետական գերատեսչությունների և հետազոտական կազմակերպությունների տվյալները ցույց են տալիս, որ տարածաշրջանում շոգի հետ կապված մահերի ընդհանուր թիվը գերազանցել է 25 հազարը:
Գիտնականները նշում են, որ անոմալ բարձր ջերմաստիճանի ժամանակահատվածները դառնում են գնալով ավելի լուրջ սպառնալիք Եվրոպայի բնակչության, հատկապես՝ տարեցների և խրոնիկական հիվանդություններ ունեցող մարդկանց առողջության համար:
ԱՄՆ նախագահ Դոնալդ Թրամփը, հավանաբար, հակված է 2028 թվականի ընտրություններում որպես իր իրավահաջորդ աջակցել փոխնախագահ Ջեյ Դի Վենսին, հաղորդում է The Washington Post-ը՝ հղում անելով աղբյուրներին։
Պարբերականի տվյալներով՝ մոտ երկու շաբաթ առաջ Օվալաձև աշխատասենյակում դոնորների հետ հանդիպման ժամանակ Թրամփն ասել է. «Վերջիվերջո, մեզ պետք է ընտրել Ջեյ Դիին»։ Միաժամանակ աղբյուրը նշել է, որ նախագահը դեռ պաշտոնապես ընտրություն չի կատարել Վենսի և պետքարտուղար Մարկո Ռուբիոյի միջև։
Ներկայում Վենսը համարվում է Հանրապետական կուսակցության կողմից առաջադրման գլխավոր հավանական թեկնածուն, սակայն Ռուբիոն ևս ամրապնդել է իր դիրքերը համազգային հարցումներում, առանցքային նահանգներում վարկանիշներում և ներհուսակցական քվեարկություններում։
Ավելի վաղ Թրամփը բազմիցս դրական էր արտահայտվել Վենսի մասին՝ նրան անվանելով ամենահավանական իրավահաջորդը, սակայն նաև ակտիվորեն աջակցել էր Ռուբիոյին, որը վարչակազմում միաժամանակ մի քանի առանցքային պաշտոններ է զբաղեցնում։
«Փոխնախագահ Վենսը Հանրապետական կուսակցության ապագան է, իսկ Մարկո Ռուբիոն նրա ամենամոտ ընկերներից մեկն է վարչակազմում»,- հայտարարել է Թրամփի քաղաքական շրջապատի ներկայացուցիչներից մեկը։
Աղբյուրների տվյալներով՝ թեկնածուին աջակցելու վերջնական որոշումը կարող է հետաձգվել։ Նախագահի խորհրդականների կարծիքով՝ Թրամփը շահագրգռված է պահպանել ազդեցությունը կուսակցության վրա և չի ցանկանում չափազանց շուտ քաղաքական ուշադրությունը փոխանցել հնարավոր իրավահաջորդին։
2028 թվականի ընտրություններում հանրապետականներին գլխավորելու իրավունքի համար պայքարը դեռ վաղ փուլում է, սակայն Վենսի և Ռուբիոյի միջև դիմակայությունն արդեն դառնում է կուսակցության ներսում գլխավոր ինտրիգներից մեկը։
Associated Press-ը հայտնում է, որ Պուերտո Ռիկոյի իշխանությունները խիստ ծայրահեղ շոգի հետևանքով սրվող երաշտի պատճառով ջրի մատակարարման վրա սահմանափակումներ են մտցնում Սան Խուանում և այլ խոշոր քաղաքներում։
Ուրբաթ օրվանից ավելի քան 180 հազար սպառողներ 48 ժամով կմնան առանց ջրամատակարարման՝ ջրի մատակարարման հերթափոխային գրաֆիկի շրջանակում։
ԱՄՆ-ից կախում ունեցող «չներառված կազմակերպված տարածքի» կարգավիճակով (Commonwealth of Puerto Rico) Պուերտո Ռիկոյի իշխանությունները փորձում են լուծում գտնել իրավիճակի վատթարացման ֆոնին։
«Այս իրավիճակը մեր վերահսկողությունից դուրս է։ Ոչինչ չի կանխում դրա վատթարացումը»,- հայտարարել է Փուերտո Ռիկոյի նահանգապետ Ջենիֆեր Գոնսալեսը։
Հուլիսը Սան Խուանի համար դարձել է ամենաչոր ամիսը ավելի քան 120 տարվա դիտարկումների ընթացքում և քաղաքի պատմության մեջ երկրորդ ամենաշոգ ամիսը։ Ամերիկյան երաշտի մոնիտորինգի տվյալներով՝ Պուերտո Ռիկոյի տարածքի գրեթե մեկ քառորդը գտնվում է խիստ երաշտի պայմաններում, ևս 36%-ը՝ չափավոր երաշտի պայմաններում։
Սան Խուանի Ազգային օդերևութաբանական ծառայության օդերևութաբան Մարիա Նովոա Գարսիան հայտարարել է, որ առաջիկա երկու-երեք շաբաթներին տեղումների քանակը կարող է լինել նորմայից առնվազն 50%-ով ցածր։
«Մենք տեսնում ենք, որ Էլ Նինյոն շարունակում է ուժեղանալ»,- ասել է նա՝ նշելով տաքացման բնական կլիմայական ցիկլի ազդեցությունը։
Սահմանափակումները կվերաբերեն ոչ միայն Սան Խուանին, այլև Կարոլինա, Խունկոս, Գուրաբո, Տրուխիլիոն Ալտո, Կանովանաս և Լոիսա քաղաքների առանձին շրջաններին։
Նահանգապետը չի հստակեցրել, թե որքան ժամանակ կգործեն միջոցառումները։ Պուերտո Ռիկոյի ջրամատակարարման և կոյուղու վարչության ղեկավար Լուիս Գոնսալես Դելգադոն հայտնել է, որ խմելու ջուրը կմատակարարվի բեռնատարներով, առաջնահերթություն կտրվի հիվանդանոցներին և տարեց բնակիչների տներին։
Միաժամանակ, բնակիչների մի մասն արդեն ամիսներ շարունակ բախվում է ջրամատակարարման խափանումների, որոնք ուղղակիորեն կապված չեն երաշտի հետ։ Տեղական իշխանությունները խնդիրը բացատրում են ենթակառուցվածքների մեջ ներդրումների և դրանց սպասարկման բազմամյա պակասով։
Իշխանությունների տվյալներով՝ ավելի վաղ Պուերտո Ռիկոն ջրի մատակարարման սահմանափակումներ էր մտցրել 2015 և 2020 թվականներին, երբ շուրջ 400 հազար սպառողներ ջուր էին ստանում միայն երեք օրը մեկ։
Բելառուսի տեղեկատվության նախարարությունը Euronews-ը ներառել է հանրապետական ծայրահեղական նյութերի ցանկում, հայտնում է «Вясна»-ն։
Բացի այդ, թարմացված ցանկում հայտնվել են նաև մի շարք անկախ մեդիա ռեսուրսներ, սոցիալական ցանցերի էջեր, թելեգրամյան ալիքներ և բոտեր։
Ցանկում ներառվել են նաև Instagram-ի «ВОЛЬНЫ ХОР | VOLNY CHOR», «Честная газета. Самиздат», «svetlana_shatilina», «neiserika», «look.at.grodno» և «Рэзка» էջերը, ինչպես նաև Threads-ում «Рэзка» հաշիվը։
Բացի դրանից, ծայրահեղական նյութեր են ճանաչվել TikTok-ի «Look at Grodno» հաշիվը, Telegram-ալիքներն ու խմբերը՝ «Познавательно однако», «СП», «Telegraf SP», «sp_telegraf», «Ве1», «Nasch DRUG», «МЫ НЕ ХОЛОПЫ non-extremist», ինչպես նաև «Стоп Пропаганда» ալիքի լոգոն։
Ցանկում ներառվել են նաև Telegram-բոտերը՝ «Беларусы Замежжа – бот», «Вернём Награбленное!», «Чат-бот “Беларусов Зарубежья”», «FreeZhlobinContactBot», «БелаМедиа бот», «Беларусь_за_перемены. Бот для приема сообщений», «НАУ», ինչպես նաև «Бот Стоп Пропаганды» լոգոն։
Միաժամանակ, ցանկում ներառվել են Telegram-ի «Николай Масловский» հաշիվը, YouTube-ի «Горячая новость» և «1467» ալիքները, X (Twitter)-ում «Горячая новость» հաշիվը, «ВКонтакте»-ում «Плохие новости» խումբը, ինչպես նաև «EUvsDisinfo» և «euro news» ռեսուրսները։
Ըստ Բելառուսի օրենսդրության՝ ծայրահեղական ճանաչված նյութերի տարածումը, ինչպես նաև դրանց ստեղծումը կամ պահպանումը տարածելու նպատակով, կարող է պատասխանատվության հանգեցնել։
NEWS.am-ը ներկայացնում է ռուսերեն լրատվական թողարկում՝ «Итоги дня» («Օրվա ամփոփում»)։ Այս ժամին Հայաստանում և նրա շուրջ տեղի ունեցող իրադարձությունների մասին բոլոր կարևոր տեղեկությունները` արագ, հակիրճ և օբյեկտիվ:
Եվրամիությունն աջակցում է Խաղաղության խորհրդի՝ Գազայի հատվածում ՀԱՄԱՍ-ի զինաթափման ճանապարհային քարտեզին, հայտարարել է ԵՄ դիվանագիտության ղեկավար Կայա Կալլասը։
Նրա կարծիքով՝ այդ քայլը «կարևոր է՝ ապահովելու ՀԱՄԱՍ-ի զինաթափումը և բացառելու այն հնարավորությունը, որ կազմակերպությունը կրկին կսպառնա Իսրայելի անվտանգությանը»։
Կալլասը հայտարարության մեջ նշել է, որ ԵՄ-ն ողջունում է «ՀԱՄԱՍ-ի և այլ ոչ պետական զինված խմբավորումների մոտ զենքի շրջանառության մշտական դադարեցման», Գազայից իսրայելական ուժերի լիակատար դուրսբերման և հատվածում քաղաքացիական կառավարման անցնելու վերաբերյալ համաձայնության ձեռքբերումը։
Նա միաժամանակ շնորհակալություն է հայտնել միջնորդներին նրանց ջանքերի համար և «բոլոր կողմերին կոչ արել անհապաղ հաստատել և իրականացնել համաձայնագիրը»։
Բացի դրանից, ԵՄ դիվանագիտության ղեկավարն ասել է, որ Եվրամիությունը կշարունակի աջակցել Պաղեստինի վարչակազմին, որպեսզի այն կարողանա «անվտանգ վերականգնել Գազայի նկատմամբ արդյունավետ վերահսկողությունը»։
Դամասկոսի արվարձանում գտնվող Ջարամանա քաղաքում միկրոավտոբուսի պայթյունի հետևանքով երկու մարդ զոհվել է, 13 մարդ էլ մարմնական վնասվածքներ է ստացել, հայտնել է սիրիական պետական SANA գործակալությունը։
Անվտանգության կառույցների աղբյուրի տվյալներով՝ միկրոավտոբուսի ներսում պայթուցիկ սարք է գործի դրվել։
Սիրիայի առողջապահության նախարարությունից հայտնել են, որ պայթյունի վայրում հայտնաբերվել են մարդկային մասունքներ, որոնց հետ դատաբժշկական փորձագետներն աշխատում են սահմանված ընթացակարգերին համապատասխան։
Գերատեսչությունը հայտարարել է նաև, որ ուշադիր հետևում է պայթյունից հետո իրավիճակի զարգացմանը և մոտակա հիվանդանոցները, ինչպես նաև շտապօգնության ու արտակարգ արձագանքման ծառայությունները տեղափոխել է բարձր պատրաստվածության ռեժիմի։
Ուկրաինայի նախագահ Վլադիմիր Զելենսկին հինգշաբթի՝ օգոստոսի 6-ին, ստորագրել է հրամանագրեր Խորվաթիայում, Ալբանիայում և Չեռնոգորիայում Ուկրաինայի դեսպաններին պաշտոնից ազատելու մասին, հայտնում է «Европейская правда»-ն։
Ըստ №709/2026 հրամանագրի՝ Խորվաթիայում Ուկրաինայի արտակարգ և լիազոր դեսպանի պաշտոնը լքել է Վասիլի Կիրիլիչը։
Մեկ այլ՝ №710/2026 հրամանագրով Զելենսկին դադարեցրել է Վլադիմիր Շկուրովի լիազորությունները Ալբանիայում Ուկրաինայի դեսպանի պաշտոնում։ Նա այդ պաշտոնը զբաղեցնում էր 2020 թվականի ապրիլից։
Բացի դրանից, №711/2026 հրամանագրով պաշտոնից ազատվել է Չեռնոգորիայում Ուկրաինայի դեսպան Օլեգ Գերասիմենկոն։
Ավելի վաղ՝ օգոստոսի 3-ին, Զելենսկին պաշտոնանկ էր արել ԱՄՆ-ում Ուկրաինայի դեսպան Օլգա Ստեֆանիշինային։ Մի քանի օր անց Բարձր հակակոռուպցիոն դատարանը նրա նկատմամբ որպես խափանման միջոց ընտրել էր 6 միլիոն գրիվնա չափով գրավ՝ հնարավոր ապօրինի հարստացման և ոչ հավաստի հայտարարագրման գործով։
Ստեֆանիշինան հայտարարել է, որ գրավը մուծելու համար դատարանի սահմանած անհրաժեշտ միջոցների չի տիրապետում։
Մեր հոգեւոր եղբորը` Ն.Ս.Օ.Տ.Տ. Գարեգին Բ Վեփահառին դատարան կանչելն անընդունելի է եւ դատապարտելի։ Այս մասին հայտարարել է Մեծի Տանն Կիլիկիո կաթողիկոս Արամ Առաջինը։
«Երկու Վեհափառներս մնայուն կապի մեջ ենք իրար հետ եւ խորհրդակցում ենք մեր Հայրենիքին ու ազգին հուզող խնդիրների շուրջ։ Մեր խորը ընդվզումն ենք հայտնել Գարեգին Վեհափառին եւ նույնիսկ առաջարկել ենք դատարան չներկայանալ եւ իր ներկայացուցչին ուղարկել։
Կոչ ենք անում պետական պատասխանատուներին հարգալից վեաբերմունք ցուցաբերել մեր եկեղեցու եւ Վեհափառի նկատմամբ եւ հարցերը քննարկել փոխադարձ հասկացողության եւ պատշաճության սահմաններում` հարգելով պետության օրենքներն ու եկեղեցու ներքին կարգն ու կանոնը»։
Ռումինիան հինգշաբթի Դանուբում քարերով բեռնված չորս բեռնանավերի խորտակման արտակարգ գործողություն է սկսել, որպեսզի փոխի ջրի հոսքի ուղղությունը դեպի «Չեռնավոդա» ատոմային էլեկտրակայան և հետաձգի երկրորդ ռեակտորի կանգառը՝ ջրի մակարդակի ռեկորդային նվազման պատճառով, հայտնում է Associated Press-ը։
Տարածաշրջանում անոմալ շոգն ու տեղումների պակասը հանգեցրել են նրան, որ վերջին շաբաթվա ընթացքում Դանուբի մակարդակն իջել է պատմականորեն նվազագույն ցուցանիշների։ Դա արդեն ստիպել է Ռումինիայի իշխանություններին կանգնեցնել «Չեռնավոդա» ԱԷԿ-ի ռեակտորներից մեկը, որը լիարժեք հզորությամբ ապահովում է երկրի էլեկտրաէներգիայի արտադրության շուրջ 20%-ը և ռեակտորային կայանքների հովացման համար օգտագործում է գետի ջուրը։
Լաստանավերը բեռնված էին քարերով, որոնք ռումինացի զինվորականները ձեռք էին բերել Բալա ջրանցքի մոտ գտնվող գետի հատվածում պայթեցման աշխատանքներ իրականացնելուց հետո։ Խորտակումից հետո դրանք պետք է ստեղծեն ստորջրյա պատնեշ, որը ջրի հոսքը կվերաուղղի դեպի Դանուբի հիմնական հունը և կմեծացնի ատոմակայան հասնող ջրի հոսքը։
«Չեռնավոդա» ԱԷԿ-ի տնօրեն Ռոմեո Ուրջանը Digi24 հեռուստաալիքին հայտնել է, որ չորեքշաբթիից հինգշաբթի գետում ջրի մակարդակը նվազել է ևս մոտ 2 սանտիմետրով։ Նրա համոզմամբ՝ առանց այդ գործողության, հավանաբար, հինգ-վեց օրից ստիպված կլինեն կանգնեցնել նաև երկրորդ ռեակտորը։
«Եթե տեղադրված լաստանավերը ջրի լրացուցիչ ներհոսք ապահովեն, ապա հինգ-վեց օրվա փոխարեն այսօրվանից խոսքը կլինի ինը-տասը օրվա աշխատանքի մասին»,- ասել է Ուրջանը։
Նա հավելել է, որ լաստանավերի խորտակումից ստացվող ազդեցությունն ԱԷԿ կհասնի մոտ մեկ օր անց, քանի որ կայանը հոսանքով ներքև է ընկած՝ մոտ 60 կիլոմետր հեռավորության վրա։
Առաջին ռեակտորի կանգառումից հետո Ռումինիայի իշխանությունները մի շարք արտակարգ միջոցառումներ, դրանց թվում՝ գետի հունի խորացում են ձեռնակել։ Երկրում Դանուբի ջրի ծախսը նվազել է շուրջ վայրկյանում 1400 խորանարդ մետր՝ կազմելով տարվա այս եղանակի սովորական ցուցանիշի մեկ երրորդից պակասը։
Ռումինիայի վարչապետի պաշտոնակատար Իլիե Բոլոժանը հուլիսի 31-ին էներգետիկ ոլորտում բարձր պատրաստվածության ռեժիմ է հայտարարել և կրկին բնակիչներին ու տեղական իշխանություններին կոչ է արել երեկոյան պիկ ժամերին կամավոր սահմանափակել էլեկտրաէներգիայի սպառումը։
Բոլոժանը նշել է, որ իրականացվող աշխատանքներն ուղղված են անհրաժեշտ ջրի հոսքի պահպանմանը, որպեսզի երկրորդ ռեակտորը կարողանա շարունակել աշխատանքը «առավելագույն հզորությամբ»։ Նա նախազգուշացրել է, որ ԱԷԿ-ի ամբողջական կանգառը կարող է հանգեցնել էլեկտրաէներգիայի դեֆիցիտի, հատկապես եթե հարևան երկրները չկարողանան ավելացնել մատակարարումները երաշտով պայմանավորված իրենց խնդիրների պատճառով։
Դանուբի մակարդակի նվազումը խնդիրներ է ստեղծել նաև տարածաշրջանի այլ երկրների համար։ Հունգարիայում գետի մակարդակի ռեկորդային անկումը երկրի միակ «Պակշ» ԱԷԿ-ը հասցրել է ամբողջական կանգառի եզրին՝ մի քանի տասնամյակի ընթացքում առաջին անգամ։ Մոլդովայում, որը զգալիորեն կախված է էլեկտրաէներգիայի ներմուծումից, իշխանությունները քաղաքացիներին կոչ են արել պիկ ժամերին կամավոր կրճատել սպառումը։
