Երկարատև և աղմկահարույց գործընթացից հետո Գյումրիի 2025 թվականի հոկտեմբերի 20-ի դեպքերի շրջանակում մեղադրվող 4 անձ արդարացվել է հենց նախաքննության փուլում։
Խոսքը Կարեն և Կարուշ Հովեյան եղբայրների, փաստաբան Ռուբեն Մխիթարյանի և Գյումրիի քաղաքապետ Վարդան Ղուկասյանի եղբոր թոռան՝ Գևորգ Ղուկասյանի մասին է։
Հովեյան եղբայրների պաշտպանական կողմը հայտարարում է, որ ամիսներ շարունակ պնդել են՝ նրանց նկատմամբ առաջադրված մեղադրանքներն անհիմն են եղել, և վերջապես Շիրակի մարզի դատախազությունը ընդունել է, որ վերջիններս որևէ հանցանք չեն կատարել։
«Երկար ու ձիգ պայքարից հետո վերջապես Կարեն և Կարուշ Հովեյաններն արդարացվեցին հենց նախաքննության փուլում։ Թեև եղբայրները երկու ամիս բանտում անցկացրեցին, սակայն վերջապես Շիրակի մարզի դատախազությունը ընդունեց առաջին օրվանից մեր պնդումը, որ նրանք որևէ հանցանք չեն կատարել»,- նշվում է հայտարարության մեջ։
Հիշեցնենք, որ գյումրեցի եղբայրները ձերբակալվել էին Գյումրիի քաղաքապետ Վարդան Ղուկասյանի ձերբակալության օրը՝ քաղաքապետարանի բակից։ Նրանց մեղադրում էին զանգվածային անկարգություններին մասնակցելու և քրեական գործի քննությանը միջամտելու մեջ։
Այսպիսով, ըստ վարույթն իրականացնող մարմնի որոշման, հաստատվել է, որ Կարեն և Կարուշ Հովեյանները որևէ հանցավոր արարք չեն կատարել։ Նույն գործի շրջանակում արդարացվել են նաև փաստաբան Ռուբեն Մխիթարյանն ու Գևորգ Ղուկասյանը։
Հիշեցնենք նաև, որ 2025 թվականի հոկտեմբերի 20-ին՝ Վարդան Ղուկասյանին ձերբակալելու ընթացքում, Գյումրիի Վարդանանց հրապարակում տեղի ունեցած դեպքերի առթիվ նախաձեռնվել էր քրեական վարույթ՝ զանգվածային անկարգությունների և արդարադատության իրականացմանը միջամտելու հատկանիշներով։
Այդ գործով մեղադրյալ էր անցնում նաև Նարեկ Կոլյայի Ղուկասյանը, որը դեպքերի պահին նոր էր դարձել չափահաս և սովորում էր հանրակրթական դպրոցի 12-րդ դասարանում։
Շիրակի մարզի առաջին ատյանի ընդհանուր իրավասության դատարանը 2025 թվականի հոկտեմբերի 23-ի որոշմամբ նրա նկատմամբ որպես խափանման միջոց էր ընտրել կալանքը։