Նիդեռլանդների Նեյմեգեն քաղաքի «Ռադբաուդ» բուժկենտրոնի տասներկու աշխատակիցների վեցշաբաթյա կարանտին են ուղարկել հանտավիրուսով վարակված հիվանդի հետ աշխատելիս կանոնակարգերը խախտելու համար:
«Արմենպրես»-ի փոխանցմամբ՝ այս մասին հաղորդում են նիդեռլանդական լրատվամիջոցները։
Հիվանդանոցի տվյալներով՝ հիվանդը, որն ընդունվել էր մայիսի 7-ին և MV Hondius զբոսանավի ուղևոր էր, որտեղ ավելի վաղ գրանցվել է վիրուսի բռնկում, անցել է արյուն վերցնելու և մշակելու ստանդարտ ընթացակարգ, թեև հանտավիրուսի առանձնահատկությունները պահանջում էին կենսաբանական անվտանգության ուժեղացված ռեժիմ։
«Չնայած վարակվելու չափազանց ցածր հավանականությանը, 12 աշխատակիցներ կանխարգելիչ նպատակով վեց շաբաթով կարանտին են ուղարկվել», – բուժկենտրոնի հայտարարությունից հատված է մեջբերում Dutch News-ը։
Ապրիլին Նիդեռլանդների դրոշի ներքո նավարկող MV Hondius նավը դուրս է եկել Արգենտինայի Ուշուայա քաղաքից՝ ուղևորվելով դեպի Կանարյան կղզիներ: Նավում գտնվում էր շուրջ 150 մարդ, այդ թվում՝ Մեծ Բրիտանիայի, Իսպանիայի, Նիդեռլանդների և ԱՄՆ-ի քաղաքացիներ: Վիրուսի հետևանքով մահացել է նիդեռլանդցի մեկ զույգ և Գերմանիայի մեկ կին քաղաքացի։
Մայիսի 10-ին Տեներիֆեում սկսվել է MV Hondius նավից ուղևորների տարհանումը: Ափ դուրս եկած բոլոր զբոսաշրջիկներն անցել են վիրուսի առկայության հետազոտություն: ԱՀԿ-ի տվյալներով՝ շուրջ տասը մարդ հանձնել է հանտավիրուսի դրական թեստ: Նշվել է, որ մահացած կնոջ և ՀԱՀ-ի ինտենսիվ թերապիայի բաժանմունքում գտնվող բրիտանացու մոտ հայտնաբերվել է հանտավիրուսի շտամ՝ Անդես վիրուս:
Միայն այս տեսակի հանտավիրուսն է փոխանցվում մարդուց մարդուն: Արևմտյան ԶԼՄ-ները հաղորդել են, որ այս շտամը տարածված է Լատինական Ամերիկայում, այդ թվում՝ Արգենտինայում, որտեղից էլ սկսվել է ծովային ճամփորդոությունը։
