Category: Oragir.news

Հիբրիդային սպառնալիքների դեմն առելու առաքելությամբ Եվրամիության 2-րդ դեսանտն առաջիկայում կիջնի Հայաստան։ ԵՄ երկրների դեսպաններն ապրիլի 15-ին Բրյուսելում ընդունել են Հայաստան նոր առաքելություն գործուղելու որոշումը, որի հաստատումը կլինի եկող շաբաթ ԵՄ արտգործնախարարների նիստում։ ԵՄ-ում կարծում են, թե այս առաքելությունը լուրջ բան է անելու Հայաստանի ներքին կայունության ու տարածաշրջանային խաղաղության համար։

«Ազատության» փոխացմամբ՝ առաքելությունը պետք է ամրապնդի Հայաստանի դիմակայունությունը հիբրիդային սպառնալիքներից՝ ռազմավարական, գործնական խորհրդատվություն ու աջակցություն տրամադրելով նախարարություններին ու անվտանգային ոլորտի գործակալություններին։ Այդ խորհրդատվությունները կենտրոնանալու են քաղաքականությունների մշակման, արտաքին տեղեկատվական մանիպուլյացիաների հայտնաբերման ու արձագանքման, կիբերհարձակումների, ինչպես նաև ապօրինի ֆինանսական հոսքերի վրա։

Փաստացի՝ ո՞ւմ է պաշտպանելու ԵՄ 2-րդ դեսանտը։

1995-ի մարտի 16-ի ապօրինի պայմանագրից հետո սկսվել են կեղծվել ընտրությունները, ռուսական ազդեցությունը ՀՀ-ում շարունակաբար մեծացել է և բարձրակետին հասել 2018-ի իշխանափոխության արդյունքում։ Մոսկվան ազդել է քաղաքականության որոշման, ընտրությունների ընթացքի վրա։ ՌԴ դեսպանն է հաստատել ռուսամետ որոշ ուժերի ցուցակներ։ ԱԺ անցնող որոշ ուժեր բացահայտ ռուսական շահեր են սպասարկել և այլն։

Իրավիճակն առերևույթ փոխվել է 2022-ի սեպտեմբերին, երբ Հայաստանն ագրեսիայի ենթարկվեց, իսկ Մոսկվան պաշտպանեց ագրեսորին։ Հիշենք, որ չբարեկամները ձգտում էին զավթել Սյունիքի մի հատվածն ու այն դարձել միջանցք։ Հիշենք նաև, որ նրանց համատեղ կազմակերպած ագրեսիայի արդյունքում ադրբեջանական զինվոր կանգնեց ՀՀ ինքնիշխան տարածքի որոշ հատվածներում, ռազմավարական կարևոր նշանակության դիրքերում։ Այս ամենից հետո Հայաստանը չբարեկամների հետագա հարձակումներից ու սպառնալիքներից պաշտպանելու համար դիմեց ԵՄ-ի և ԱՄՆ-ի օգնությանը։ Եվ ՀՀ-ում տեղակայվեց ԵՄ առաքելությունը։ Իսկ առաջիկայում 2-րդ դեսանտն է իջնելու։

2021-ի ընտրություններով ձևավորված ԱԺ-ն մաքուր ռուսական էր։ Ե՛վ ՔՊ-ն էր վառ ռուսամետ դիրքերում, և՛ ընդդիմադիր ուժերը։ Վերջին հարցումների արդյուքնում ևս ռուսամետ ուժերն են ֆավորիտ։ Ե՛վ ՔՊ-ն է հանդես գալիս հայ-ռուսական օրակարգն անխախտ պահելու դիրքերում, և՛ ընդդիմադիր առաջատար ուժերն են վառ ռուսամետ ձևանում։

Այս իրավիճակում ի՞նչ է անելու ԵՄ դեսանտը Հայաստանում, ո՞ւմ է պաշտպանելու։

ԵՄ առաքելությունն անելիք կունենար, եթե իշխանության ռեալ հավակնորդներից գոնե մեկը ԵՄ անդամակցելու, ՆԱՏՕ-ին միանալու, քաղաքակրթական ընտրություն կատարելու նպատակ հռչակեր։ Օրինակ՝ Մոլդովայում իշխանությունը ԵՄ-ին միանալու հայտ էր ներկայացրել, ու ԵՄ առաքելությունն օգնեց, որ ռուսամետներն այդ երկրում չհաղթեն, իշխանափոխություն չլինի։

Հայաստանը ԵՄ-ին միանալու հայտ չի ներկայացրել։ Եվրոպական չափանիշներով՝ ՔՊ-ն եվրասկեպտիկ է, քանի որ նախապատվություն է տալիս ՌԴ-ի հետ քաղաքական, տնտեսական գործընկերությանը, նույնիսկ ՀԱՊԿ-ից դուրս գալու որոշում չունի։ Բայց քանի որ ընդդիմադիր մեծ ուժերը ՔՊ-ից ավելի եվրասկեպտիկ են, ապա ԵՄ-ն պաշտպանության տակ է առնելու ՔՊ-ն։

Պարզ ասած՝ առանց ԵՄ աջակցության՝ ՔՊ-ն պարտվելու է հունիսի 7-ին։ Ինչպես Մոլդովայում կամ Հունգարիայում հաղթեց ԵՄ աջակցությունը վայելող ուժն, այնպես էլ, ենթադրաբար, ՀՀ-ում է հաղթելու։ Ողջամիտ կասկած կա, սակայն, որ ԵՄ աջակցությունն անվճար չի լինելու։ Դրա դիմաց պահանջելու են, որ ՔՊ-ն անկախության ու ժողովրդավարության պաշտպանության ուղղությամբ ռեալ քայլեր կատարի՝ ընդունելով ռուսական զորքերի դուրս հրավիրման որոշում, լյուստրացիայի մասին օրենք և այլն։ Այս կարգի քաղաքական որոշումներն են ապահովագրելու, որ հետագայում ՀՀ-ում ընտրությունները չկեղծվեն ու ռուսական գործակալներն իշխանության չգան։ Պարզ չէ, թե ի՞նչ են անելու ռուսամետ ուժերը, ողջամտորեն կփորձե՞ն անկախության ու ժողովրդավարության պաշտպանության դիրքերում կանգնել, վաստակել ԵՄ աջակցությունն ու հաղթել հունիսի 7-ի ընտրություններում, թե՞ բաց կթողնեն իշխանության հասնելու այս շանսը ևս։

Թաթուլ Մկրտչյան

Քիչ առաջ միջադեպ է տեղի ունեցել Արշակունյաց 2 հասցեում։

Oragir.News-ի տեսախցիկը ֆիքսել է, որ Մամուլի շենքի դիմաց է ժամանել ՆԳՆ փրկարար ծառայության 6 մարտական հաշվարկ, տեղում էր նաև պարեկային ծառայությունը։

Պարզվում է, որ ՆԳՆ փրկարար ծառայություն կեղծ ահազանգ է ստացվել, որ նշված հասցեի շենքերից մեկի տանիքում հրդեհ է բռնկվել։

Նշենք, որ օպերատիվորեն են աշխատել Փրկարար ծառայության աշխատակիցները։

Որոշ ժամանակ տարածքում պտտվելուց հետո նրանք հեռացել են տարածքից։

Oragir.News-ը հորդորում է զերծ մնալ նմանատիպ բաներից և գնահատել փրկարարների ջանքերն ու աշխատանքը, չզբաղեցնելով նրանց, քանի որ որևէ տեղում, հնարավոր է, մարդիկ իսկապես ունեն նրանց օգնության կարիքը։

Մանրամասները՝ տեսանյութում:

Oragir.News-ի հետ զրույցում ժամկետային զինծառայողներից մեկի ծնողը նշեց, որ իրենց պահանջը շատ պարզ է՝ բացառել խտրականությունը զինծառայողների միջև։

«Մեր խնդրանքը ընդամենը այն է, որ խտրականություն չլինի մեր երեխաների միջև։ Բոլորն էլ պարտադիր ծառայել են։ Ես ինքս իմ երեխային պարտադրել եմ, որ անպայման ծառայի Հայաստանի Հանրապետությանը։ Դա մեր պարտքն է՝ ինձանից սկսած»,- ասաց նա։

Ծնողի խոսքով՝ իրենք պահանջում են, որպեսզի օրենքը հավասարապես կիրառվի բոլորի նկատմամբ։

«Խնդրում ենք, որ այս օրենքը գործի բոլորի համար։ Եթե 24 ամիսը փոխվել է 18 ամսի, ապա դա պետք է կիրառվի նաև մեր երեխաների վրա։ Չեմ հասկանում՝ ինչու դա հնարավոր չէ։ Եթե ուզում են՝ կարող են դա անել։ Գուցե մենք քաղաքականությունից հեռու ենք, բայց դա չի նշանակում, որ չենք հասկանում՝ հնարավոր է, թե ոչ»,- ընդգծեց նա։

Նա հավելեց, որ իրենց պահանջը քաղաքական չէ, այլ բացառապես վերաբերում է արդարությանը։

«Մենք ուրիշ ոչինչ չենք ուզում։ Պարզապես խնդրում և պահանջում ենք, որ մեր երեխաներն էլ ընդգրկվեն այդ որոշման մեջ։ Մենք այլ քաղաքացիներ չունենք, սա մեր միակ պահանջն է»,- նշեց ծնողը։

Անդրադառնալով Պաշտպանության նախարարությունում տեղի ունեցած հանդիպմանը՝ նա ասաց, որ որևէ հստակ պատասխան չեն ստացել։

«Կարելի է ասել՝ ընդհանրապես ոչ մի դրական պատասխան չի եղել։ Հինգ ծնող էինք ներկա։ Ասացին՝ սպասեք, բայց որևէ կոնկրետ պատասխան չտվեցին։ Եթե լիներ դրական վերաբերմունք, մենք այստեղ չէինք հավաքվի։ Մենք հաճույքի համար չենք գալիս»,- ասաց նա։

Ծնողի խոսքով՝ իրենց խնդրանքը անտեսվում է, և իրենք ակնկալում են հստակ արձագանք։

«Չգիտեմ՝ ինչու են անտեսում ծնողների խնդրանքը։ Պետք է լինի մեկը, ով կլուծի այս հարցը, ոչ թե ձևական ընդունեն ու նորից նույնը կրկնվի։ Մենք պարզապես ուզում ենք, որ այս հարցին գիտակցաբար մոտենան»,- նշեց նա։

Նա կրկին ընդգծեց, որ իրենց հիմնական պահանջը հավասարությունն է։

«Մեր պահանջը մեկն է՝ հավասար իրավունքներ։ Մի քանի օրվա տարբերությամբ ծնված երեխաները տարբեր պայմաններում են ծառայում՝ մեկը 2 տարի, մյուսը՝ 1,5 տարի։ Դա արդար չէ։ Մենք ողջունում ենք, որ ծառայության ժամկետը կրճատվել է մինչև 18 ամիս, բայց դա պետք է վերաբերի բոլորին»,- եզրափակեց նա։

Oragir.News-ի հետ զրույցում ակցիայի մասնակից ծնողներից մեկը նշեց, որ իրենց հետ հանդիպումներ եղել են, սակայն որևէ հստակ լուծում չի ներկայացվել։

«Պաշտպանության նախարարությունից մեզ ընդունել են բարձր պաշտոնյաներ, բայց ոչ նախարարը, ոչ փոխնախարարները։ Ամեն դեպքում, հստակ վերջնական լուծում չեն տվել։ Մենք բազմաթիվ նամակներ ենք գրել թե՛ Պաշտպանության նախարարությանը, թե՛ կառավարությանը, բայց ստանում ենք նույնատիպ պատասխաններ՝ նույն տեքստերով, շտապ-շտապ ուղարկված»,- ասաց նա։

Ծնողի խոսքով՝ իրենց կողմից ներկայացվող առաջարկների ծավալը և ստացվող պատասխանների բովանդակությունը անհամաչափ են։

«Մենք գրում ենք 3-4 էջանոց վերլուծություն, առաջարկներ, խնդրանքներ, տարբեր լուծումների տարբերակներ, իսկ մեզ ընդամենը 2 տող են ուղարկում՝ “չի լինի” և վերջ։ Արդեն այս պրոցեսը, անկեղծ ասած, դառնում է անլուրջ»,- ընդգծեց նա։

Նա առաջարկեց խնդրի լուծման համար ձևավորել աշխատանքային խումբ։

«Մի հարցի համար կառավարությունում, նախարարությունում աշխատանքային խմբեր են ստեղծում, իսկ սա ազգային անվտանգության հարց է, երկրի պաշտպանների հարցն է։ Հնարավո՞ր չէ այս հարցին լուրջ վերաբերվել։ Թող կազմեն աշխատանքային խումբ՝ 2-3 հոգով, մեկ ներկայացուցիչ կառավարությունից, մեկ՝ Պաշտպանության նախարարությունից, և հանդիպեն ծնողների հետ»,- նշեց նա։

Ծնողը շեշտեց, որ խնդիրը միայն իրավական չէ, այլ նաև հոգեբանական։

«Այս ամենը մարդկանց մեջ անարդարության զգացողություն է առաջացնում։ Երեխաների հոգեբանական վիճակը խառնված է, ծնողների բարոյահոգեբանական վիճակը՝ նույնպես։ Սա բարդ հարց չէ, կարելի է 1-2 օրում քննարկել, լուծումներ գտնել»,- ասաց նա։

Նրա խոսքով՝ ծնողները պատրաստ են քննարկել տարբեր տարբերակներ։

«Եթե ասում են՝ 24 ամիսը չենք կարող դարձնել 18, թող առաջարկեն այլընտրանքային լուծումներ։ Մենք ինքներս ունենք բազմաթիվ առաջարկներ՝ հարյուրավոր տարբերակներ, թե ինչպես կարելի է մեղմել այս անարդարությունը։ Բայց ոչ ոք չի լսում, շտապ պատասխաններ են տալիս»,- ընդգծեց ծնողը։

Անդրադառնալով նախորդ հանդիպումներին՝ նա նշեց, որ արդյունքը նույնն է եղել։

«Կառավարությունում հանդիպում եղել է, բայց էլի նույն պատասխանն է՝ “չի լինի, անհնար է”։ Նույն ձևակերպումները, որոնք նամակներով ուղարկում են բոլոր ծնողներին»,- ասաց նա։

Խոսելով պաշտպանության նախարարի արձագանքի մասին՝ ծնողը նշեց, որ անձամբ արձագանք չի եղել։

«Սուրեն Պապիկյանից որևէ արձագանք ընդհանրապես չենք ստացել։ Մենք հետևում ենք միայն նրա հրապարակային ելույթներին և ծրագրերին»,- ասաց նա։

Ծնողը նաև անդրադարձավ «Պաշտպան հայրենյաց» ծրագրին՝ նշելով, որ դրա հիման վրա հնարավոր է որոշակի հաշվարկներ անել։

«Մենք տեսնում ենք, թե ինչ տեմպերով է ավելանում պայմանագրային զինծառայողների թիվը “Պաշտպան հայրենյաց” ծրագրով։ Այդ տվյալները հրապարակային են՝ նախարարի էջում։ Այդ թվերը համադրելով՝ մենք կարող ենք հասկանալ, որ հնարավոր է փոխհատուցել ժամկետային ծառայության կրճատումը»,- նշեց նա։

Նրա խոսքով՝ ծնողները ևս կարողանում են գնահատել իրավիճակը։

«Մենք էլ կարող ենք հաշվել։ Այդ թվերը վերցնում ենք նախարարի, վարչապետի էջերից, համադրում ենք իրար հետ։ Վերջիվերջո, մաթեմատիկայից և արիթմետիկայից վատ չենք հասկանում»,- եզրափակեց ծնողը։

Հակակոռուպցիոն կոմիտեի կողմից իրականացված միջոցառումների արդյունքում փաստական տվյալներ են ստացվել այն մասին, որ «Ուժեղ Հայաստան» կուսակցության անդամների և նրանց հետ համագործակցող հասարակական կազմակերպությունում որպես աշխատակից գրանցված մի խումբ անձանց կողմից Արարատի մարզի Արտաշատ համայնքի մի շարք ընտրողների ընտրակաշառք է բաժանվել:

Այս մասին հայտնում են Հակակոռուպցիոն կոմիտեից։

«Հանցավոր գործունեությունը քողարկելու և չբացահայտվելու նպատակով հանցավոր խմբի անդամները միմյանց հետ կապ են հաստատել ինտերնետ-հավելվածների միջոցով:
Դեպքի առթիվ ՀՀ քրեական օրենսգրքի համապատասխան հոդվածներով նախաձեռնվել է քրեական վարույթ, կատարվել են բազմաթիվ խուզարկություններ, ձերբակալվել են մեկ տասնյակից ավել անձինք»,–ասված է հաղորդագրության մեջ։

Հիշեցնենք, որ այսօր՝ ապրիլի 16–ի վաղ առավոտից իրավապահները խուզարկել են «Ուժեղ Հայաստան» կուսակցության համակիրների տներում, ապա բերման են ենթարկել նրանց։ Տևական ժամանակ փաստաբանները տեղեկացված չէին, թե որտեղ են իրենց վստահորդները, նրանց թույլ չեն տվել մուտք գործել Հակակոռուպցիոն կոմիտեի շենք և միայն հետևողական ահազանգերից հետո փաստաբանները հնարավորություն ունեցան մուտք գործել շենք։

Հակակոռուպցիոն կոմիտեից հայտնել են, որ քննվող քրեական վարույթի շրջանակում ձերբակալվել են 14 անձինք՝ ընտրակաշառք տալու և ստանալու մեղադրանքներով:

ՀՀ ԱԺ-ն այսօր 2-րդ և վերջնական ընթերցմամբ ընդունեց օրենսդրական այն փոփոխությունները, ըստ որոնց` նախատեսվում է արգելել հեռուստատեսությամբ և ռադիոյով պատերազմի քարոզչությունը:

Հիշեցնենք, որ ՀՀ կառավարությունը հավանություն է տվել «Տեսալսողական մեդիայի մասին» ՀՀ օրենքում փոփոխություններին ու լրացումներին, ըստ որոնց` օտարերկրյա հեռուստառադիոծրագրերում ՀՀ ներքաղաքական կյանքին միջամտող բովանդակության տարածումը կարգելվի օրենքով։

Աշխատանքային այցով Ստամբուլում գտնվող ՀՀ ԱԺ նախագահ Ալեն Սիմոնյանի գլխավորած պատվիրակությունը մասնակցում է Միջխորհրդարանական միության (IPU) 152-րդ վեհաժողովի լիագումար նիստի աշխատանքներին:

ԱԺ-ից հայտնում են, որ ՀՀ ԱԺ նախագահը վեհաժողովի շրջանակում կարճ շփումներ է ունեցել նաեւ այլ երկրների գործընկերների հետ:

Լուսանկարներից երևում է, որ Ալեն Սիմոնյանն այնտեղ հանդիպել է Ռուսաստանի Դաշնության Դաշնային ժողովի Դաշնության խորհրդի նախագահ Վալենտինա Մատվիենկոյի, Ադրբեջանի Միլի Մեջլիսի նախագահ Գաֆարովայի հետ։

Հիշեցնենք` Ալեն Սիմոնյանը ապրիլի 14-ին լրագրողների հետ զրույցում ասել էր, որ Վալենտինա Մատվիենկոյի ծննդյան օրը` ապրիլի 7–ին, հեռախոսային զրույցի ընթացքում քաղաքական հարցեր չի քննարկել, նա նշել էր, որ ամենայն հավանականությամբ Մատվիենկոյի հետ շփվելու հնարավորություն կունենա Ստամբուլում։

Տեղեկացնում ենք, որ դեպի Զվարթնոց օդանավակայան տանող Իսակովի պողոտայում ներկայումս իրականացվում են լայնածավալ ճանապարհային աշխատանքներ, որոնք կարող են առաջացնել երթևեկության ժամանակավոր խցանումներ։

Այս մասին հայտնում է «Զվարթնոց» օդանավակայանը:

Խնդրում ենք Ձեր ուղևորությունը նախապես պլանավորել և օդանավակայան ներկայանալ ժամանակին՝ հաշվի առնելով հնարավոր ուշացումները։

Հիշեցնում ենք, որ չվերթի հաշվառումը սկսվում է թռիչքի սահմանված ժամից 3 ժամ առաջ և փակվում է թռիչքից 1 ժամ առաջ։

Մեր ուղևորներին մաղթում ենք բարի թռիչք:

Դերասանուհի Ծովինար Մարտիրոսյանը «Go.sport FM 96.3»-ի եթերում անդրադարձել է իր ընտանիքի շուրջ վերջին շրջանում ծավալված քննարկումներին։

Զրույցի ընթացքում դերասանուհին խոսել է իր և ամուսնու՝ դերասան Նարեկ Հայկազյանի հարաբերությունների մասին՝ պատասխանելով նաև քննադատներին։

Հիշեցնենք, որ Նարեկ Հայկազյանի հայտարարությունը, թե կանայք փիսիկներ են, սոցիալական ցանցերում բուռն դժգոհություն էր առաջացրել։ Շատ օգտատերեր դա համարել էին ոչ պատշաճ ձևակերպում, սակայն Ծովինարը շտապել է պարզաբանել իրավիճակը և պաշտպանել ամուսնուն։

«Փիսիկը վիրավորական բառ չէ, որ ես վիրավորվեմ։ Եթե ես չեմ վիրավորվում, դուք էլ մի նեղվեք»,- նշել է դերասանուհին՝ հորդորելով մարդկանց ավելի թեթև նայել իրենց ընտանեկան ներքին հումորներին։

Ծովինար Մարտիրոսյանի խոսքով՝ այդ բառն իրենց հարաբերություններում ունի բացառապես ջերմ ենթատեքստ։ Նա խոստովանել է, որ ամուսինը հաճախ հենց այդպես՝ սիրով է դիմում իրեն, և իրենք այդտեղ որևէ բացասական կամ նսեմացնող բան չեն տեսնում։

Դերասանուհին ևս մեկ անգամ ընդգծել է, որ յուրաքանչյուր ընտանիք ունի իր «լեզուն», և հանրության կողմից ենթատեքստեր փնտրելն ավելորդ է, քանի դեռ զույգի միջև տիրում է լիակատար փոխըմբռնում ու ներդաշնակություն։

Oragir.News-ը ներկայացնում է ապրիլի 16-ի ամփոփ լուրերը՝ լրագրող Արփինե Նավասարդյանի մեկնաբանությամբ:

Սամվել Կարապետյանի առաջնորդած «Ուժեղ Հայաստան» կուսակցության ձերբակալված 14 անդամներին մեղադրանք է առաջադրվել։ Հակակոռուպցիոն կոմիտեից հայտնել են, որ նրանց մեղադրանք է առաջադրվել ընտրակաշառք տալու և ստանալու հոդվածներով, իսկ ավեի ուշ արդեն կոմիտեն պնդել է, որ կուսակցության անդամների և նրանց հետ համագործակցող հասարակական կազմակերպությունում որպես աշխատակից գրանցված մի խումբ անձանց կողմից Արտաշատի ընտրողներին ընտրակաշառք է բաժանվել: Կոմիտեն կից ձայնագրություն է հրապարակել՝ նշելով, որ խմբի անդամները միմյանց հետ կապ են հաստատել ինտերնետ-հավելվածների միջոցով: Ձայնագրության մեջ ինչ-որ մարդիկ խոսում են գումարների մասին: Փաստաբան Վահան Հովհաննիսյանի խոսքով, սակայն, դեռևս կուսակցության գրանցումից առաջ հասարակական կազմակերպության շրջանակում են այդ գումարները տրվել որպես աշխատավարձ։ Ավելի վաղ «Ուժեղ Հայաստան»-ի անդամ Գոհար Մելոյանը ահազանգել էր իրենց համակիրներին բերման ենթարկելու և խուզարկությունների մասին: Քաղաքական ուժի խոսնակ Մարիաննա Ղահրամանյանի խոսքով՝ 15 մարդ բերման է ենթարկվել, սակայն ըստ նրա՝ նրանց թիվն ավելանում է: Ղահրամյանը գործը «կարված» որակեց, նաև հայտարարեց, որ փաստաբանների մի մասի աշխատանքը խոչընդոտվում է՝ նրանց թույլ չեն տալիս ներս մտնել ու ծառայություններ մատուցել իրենց վստահորդներին, որոշ փաստաբանների ահազանգերից հետո, այդուհանդերձ, հաջողվել է ներս մտնել: Փաստաբան Վահան Հովհաննիսյանը հաստատեց, որ իրենց թույլ չէին տալիս մտնել Հակակոռուպցիոնի շենք և միայն ՄԻՊ դիմելուց հետո են կարողացել ներգրավվել: Կուսակցության ներկայացուցիչ Դավիթ Ղազինյանն էլ լրագրողների հետ զրույցում իրավապահների գործողությունները «բռնաճնշումներ» որակեց իրենց քաղաքական ուժի նկատմամբ ընտրություններին ընդառաջ:

Հայաստանն արդեն 8 տարի ղեկավարող Նիկոլ Փաշինյանն այսօր Ազգային ժողովի ամբիոնից հայտարարել է՝ մեզ պետք է «վիրահատական ճանապարհով լուծել» արդարադատության հարցը։ Նա պնդեց, թե այն ինչ տեղի է ունենում արդարադատության համակարգում, խայտառակություն է։ Նիկոլ Փաշինյանի խոսքով՝ Հայաստանում պետք է լինի այնպիսի համակարգ, որը, ըստ նրա, պետք է բխի ժողովրդից, իսկ դրա համար անհրաժեշտ է նոր Սահմանադրություն։ Նիկոլ Փաշինյանը, ըստ էության, նոր Սահմանադրության անհրաժեշտությունը կապեց երկրում արդարություն ու արդարադատություն հաստատելու հետ՝ դարձյալ ընդգծելով, թե ՀՀ-ում հաստատված իրավակարգի նկատմամբ ալերգիա կա։ Նոր Սահմանադրություն ընդունելու ներքին պահանջ Հայաստանում չկա, դա գալիս է Բաքվից»,- Փաշինյանին հակադարձեց ընդդիմադիր «Հայաստան» խմբակցության պատգամավոր Արմեն Ռուստամյանը։ Ըստ նրա՝ այն «փաթեթավորումը, թե արդարադատության պակասով է պայմանավորված», Ադրբեջանի պահանջը քողարկելու փորձ է։ «Դրանով փորձում են քողարկել, ի՞նչ արդարադատություն, արդարադատություն ՀՀ-ում միակողմանի իրականացվում է Նիկոլ Փաշինյանի կողմից», – ասաց «Հայաստան» խմբակցության անդամը:

Այս տարվա առաջին եռամսյակի ընթացքում Հայաստանն Ադրբեջանից շուրջ 5.8 միլիոն դոլարի ապրանք է ներկրել, արտահանել՝ 960 դոլարի ապրանք: Այս տվյալներն Ադրբեջանի պետական եկամուտների կոմիտեն է հրապարակել: Ադրբեջանի ՊԵԿ-ի փոխանցմամբ՝ Հայաստանը հոլանդական վարդեր է վերաարտահանել Ադրբեջան. «Ընթացիկ տարվա մարտ ամսին Նիդերլանդների Թագավորությունից ներկրվել են վարդեր՝ 960 դոլար ընդհանուր արժողությամբ։ Քանի որ մաքսային վիճակագրության հրապարակման կանոնների համաձայն ներկրող երկիր է համարվում գործընկեր պետությունը, դրանք պաշտոնական փաստաթղթերում նշվել են որպես Հայաստանից ներկրված»,- ասվում է հայտարարության մեջ։ Հայկական կողմն առայժմ Ադրբեջանի հետ առևտրաշրջանառության մասին ամսական պաշտոնական վիճակագրություն չի ներկայացրել: Ըստ հրապարակված տվյալների՝ Հայաստան արտահանված 5.8 միլիոն դոլարի ապրանքն Ադրբեջանի արտահանումների ընդհանուր ծավալի 0.11 տոկոսն է: Ադրբեջանական կողմի համաձայն՝ 960 դոլարի ապրանքը Հայաստանից գնել են անցած ամիս: Ադրբեջանի պետական եկամուտների կոմիտեի տվյալներով՝ Հայաստանի ու Ադրբեջանի առևտրաշրջանառության սալդոն գրեթե 100 տոկոսով Ադրբեջանի օգտին է՝ – 5,7 միլիոն դոլար: Հայաստանի պետական եկամուտների կոմիտեից հայտնում են՝ մաքսային մարմինը Հայաստանից Ադրբեջան արտահանում չի գրանցել: Թե 960 դոլարի ինչ ապրանք է Հայաստանից Ադրբեջան տեղափոխվել, պարզ չէ: Էկոնոմիկայի նախարարությունից էլ հայտնել են, որ 960 դոլարի արտահանման հետ իրենք կապ չունեն:

Մանրամասները՝ տեսանյութում: