Տեղական ընտրություններից առաջ մարզերում քաղաքական ուժերը սկսել են վերանայել-թարմացնել հաշվարկները, իսկ Սյունիքում՝ նաև նախկին քաղաքական հակադրությունների տրամաբանությունը։ Գորիսում իշխանությունն ընտրության է գնում գործող համայնքապետ Առուշ Առուշանյանի հետ՝ երբեմնի ընդդիմախոսին դիտարկելով որպես ՔՊ-ի թեկնածու։
Մեղրիում իշխանության թեկնածուի շուրջ ստեղծված իրավիճակը խառնել է համայնքի «նախընտրական քարտեզը», իսկ Կապանում նոյեմբերի 29-ի ընտրություններին արդեն ուրվագծվում է այլ քաղաքական մրցակցություն։ Վարչապետ Փաշինյանը Գորիսի օրինակը ներկայացրել է որպես «համերաշխության դաշինքների» տրամաբանության առաջին դրսևորում։ Ո՞ւմ խաղաթղթերն են խառնվել Սյունիքում, և ի՞նչ հաշվարկով է իշխանությունը մտնում ՏԻՄ ընտրությունների նոր փուլ:
Հոկտեմբերի 25-ին Գորիսում և Մեղրիում ավագանու համամասնական ընտրություններ են։ Առաջադրումները սկսվել են, վերջնաժամկետը սեպտեմբերի 20-ն է, բայց Սյունիքում նախընտրական հիմնական խաղադրույքներն արդեն ուրվագծվում են։
Գորիսում իշխող «Քաղաքացիական պայմանագիրը» ընտրության է գնում դաշինքով, որը գլխավորելու է գործող համայնքապետ, անկուսակցական Առուշ Առուշանյանը։ Այս որոշումն ուշագրավ է նրա քաղաքական անցյալի պատճառով։ 44-օրյա պատերազմից հետո Առուշանյանը Փաշինյանի իշխանության կոշտ քննադատներից էր, իսկ 2021-ի խորհրդարանական ընտրություններին մասնակցում էր իշխանությանը հակադիր «Հայաստան» դաշինքի ցուցակով։ Առուշանյանը հաստատել է, որ իր «Բիզնես» կուսակցությունը ՔՊ-ի հետ դաշինքով է գնալու ընտրության։
Վարչապետ Փաշինյանը Գորիսի հարցում իրենց մոտեցումը բացատրում է ոչ թե նախկին քաղաքական հակադրությունների, այլ համերաշխության նոր տրամաբանությամբ։
«2021 թվականի ընտրություններում Գորիսը քվեարկել է «Քաղաքացիական պայմանագիր» կուսակցության օգտին, դրանից հետո ՏԻՄ ընտրություններում Գորիսը քվեարկել է այնպես, որ ընտրությունների արդյունքում Առուշ Առուշանյանն ընտրվել է համայնքի ղեկավար։ Թվում է, որ քաղաքական առումով անհամատեղելիություն կա։ Ինչպե՞ս կարող է և՛ քվեարկել «Քաղաքացիական պայմանագիր» կուսակցության օգտին, և՛, ըստ էության, 180 աստիճան հակառակ ուղղությամբ։ Այս ընտրությունում էլ Գորիսը քվեարկել է «Քաղաքացիական պայմանագիր» կուսակցության օգտին։ Եվ մենք այդ ազդակները նաև Գորիսից ենք ստանում, որ ինչո՞ւ եք անընդհատ բախման տրամաբանությամբ պրոցեսներ գեներացնում Գորիսում»։
Գորիսի օրինակը կարող է միակը չլինել։ Իշխանությունը պատրաստվում է նման դաշինքներ ձևավորել նաև այլ համայնքներում։
«Նաև հաշվի առնելով այն հանգամանքը, որ մեզ շատ մեղադրում են, թե մենք սևերի ու սպիտակների ենք բաժանում և այլն, մի շարք համայնքներում գնալու ենք այդպիսի որոշման։ Համերաշխության դաշինքներ ենք ձևավորելու այնտեղ, որտեղ այդ հնարավորությունները կան։ Մենք լսել ենք գորիսեցիների ձայնը»։
Առուշ Առուշանյանի շուրջ դատաիրավական նախկին գործընթացները վարչապետը քաղաքական որոշումից առանձին է դիտարկում։ Նաև բարձր է գնահատում կառավարության և Գորիսի համայնքապետարանի գործակցությունը։
«Գորիսն այսօր կառավարություն-համայնք համագործակցության հաջողության պատմություններից մեկն է Հայաստանի Հանրապետությունում»։
Գորիս համայնքը նորից խոշորացվում է, և քաղաքին վերամիանալու են Տաթև ու Տեղ համայնքները։ Բացի Գորիսից՝ հոկտեմբերի 25-ին Մեղրի համայնքում ևս ավագանու ընտրություններ են։ «Քաղաքացիական պայմանագրի» ցուցակը գլխավորող, գործող համայնքապետ Խաչատուր Անդրեասյանը երկու օր առաջ կալանավորվեց։ Նա մեղադրվում է առանց թույլտվության ընդերքը կամ բնական պաշարներն օգտագործելու, այդ նպատակով կաշառք տալու և ստանալու համար։ Չնայած ընտրական օրենսգիրքը չի արգելում կալանավորված անձանց առաջադրվել, սակայն կառավարող ուժը նման թեկնածուներին չի հանդուրժի, անգամ իրենց թիմակիցներին։
«Եթե կոռուպցիայի դեմ պայքարը սկզբունքային չլիներ, ՏԻՄ ընտրությունների նախօրյակին համայնքի ղեկավար չի ձերբակալվի ու կալանավորվի «Քաղաքացիական պայմանագիր» կուսակցությունից»։
Միաժամանակ Մեղրիում արդեն նոր անուններ են շրջանառվում։ Ըստ տեղեկությունների՝ ՔՊ ցուցակը կարող է գլխավորել գործարար Սերգո Գալստյանը։ «Ռադիոլուրի» հետ զրույցում նա ո՛չ հաստատեց, ո՛չ հերքեց այդ տեղեկությունը՝ առաջարկելով դիմել կուսակցության պատասխանատուներին։ Գալստյանի հնարավոր առաջադրումը, ըստ տեղական քաղաքական գնահատականների, փոխում է նաև մյուս ուժերի հաշվարկները։ «Քրիստոնեա-ժողովրդավարական» կուսակցության թեկնածու Վարդան Հայրապետյանը չցանկացավ ձայնագրվել, սակայն «Ռադիոլուրին» ասաց, որ ՔՊ-ի ցուցակով Գալստյանի առաջադրմամբ իրենց համար պայքարի մեջ մտնելու իմաստը կկորի։ «Մեծ ռեսուրսներ ունի ինքը»,-ասաց Հայրապետյանը՝ խոստանալով թեմային անդրադառնալ առաջադրումների ժամկետից հետո։
«Հանրապետություն» կուսակցության ներկայացուցիչ Բագրատ Զաքարյանը ևս մեր հարցադրումներին չարձագանքեց։ Սակայն, ըստ Մեղրիում շրջանառվող տեղեկությունների, նա հայտարարել է, որ մտափոխվել է և չի առաջադրվելու։
Նոյեմբերի 29-ին էլ ավագանու ընտրություններ են Կապանում։ Այստեղ ուրվագծվում է դասական մրցակցություն՝ գործող համայնքապետ, «Շանթ դաշինքի» ներկայացուցիչ Գևորգ Փարսյանի և ԶՊՄԿ-ում կառավարության ներկայացուցիչ, «Քաղաքացիական պայմանագրի» Կապանի խորհրդի նախագահ Նարեկ Բաբայանի միջև։
Կապանի դեպքում ևս հետաքրքիր է ընտրողների նախկին վարքագիծը․ կապանցիները տարբեր ընտրություններում քվեարկել են թե՛ ՔՊ-ի, թե՛ Գևորգ Փարսյանի օգտին։ Չի բացառվում, որ մարզկենտրոնի համար պայքարին միանան նաև ընդդիմադիր ուժերը։
