Category: TopNews.am

Իտալիայի ԱԳ նախարար Անտոնիո Տայանին այդ երկում Ռուսաստանի դեսպան Ալեքսեյ Պարամոնովին կանչել է ԱԳՆ։ Պատճառը ռուսական հեռուստատեսությամբ կրեմլի քարոզիչ համարվող Վլադիմիր Սոլովյովի կողմից Իտալիայի վարչապետ Ջորջիա Մելոնիի հասցեին հնչեցրած վիրավորական հայտարարություններն են եղել։

Սոլովյովը, օգտագործելով իտալերեն հայհոյանքներ, Մելոնիին անվանել է «ֆաշիստ», «հիմար» և «անբարոյական»։ Նա Իտալիայի վարչապետին մեղադրել է ԱՄՆ նախագահ Դոնալդ Թրամփին «դավաճանելու» մեջ՝ հայտարարելով, որ «դավաճանությունը Մելոնիի երկրորդ անունն է»։

ՌԴ դեսպանը, ըստ իտալական լրատվամիջոցների, հայտարարել, որ Սոլովյովի խոսքերը կառավարության պաշտոնական դիրքորոշումը չեն, և ռուսական ղեկավարությունից ոչ ոք երբեք «վիրավորական գնահատականներ չի հնչեցրել Մելոնիի և Իտալիայի հասցեին»

«Մելոնին,- գրել է դեսպանը,- պետական օրինական պաշտոնյա է, և ռուսական իշխանությունների ոչ մի ներկայացուցիչ երբևէ վիրավորական դիտողություններ չի արել նրա կամ Իտալիայի հասցեին։ Ոչ մի ողջամիտ մարդ երբեք որևէ մեկի անձնական գնահատականները չէր դիտարկի որպես օտարերկրյա պետության կառավարության պաշտոնական հայտարարություններ»։

Meta ընկերությունը ԱՄՆ-ում աշխատող իր անձնակազմի համակարգիչներում տեղադրում է նոր հետագծող ծրագրային ապահովում, որը արձանագրում է մկնիկի շարժումները, սեղմումները և ստեղնաշարի հարվածները։ Հավաքագրված տվյալները նախատեսվում է օգտագործել արհեստական բանականության մոդելների ուսուցման համար՝ որպես ինքնավար առաջադրանքներ իրականացնող ԱԲ գործակալների ստեղծման լայնածավալ ծրագրի մաս։ Ընկերությունը այդ մասին տեղեկացրել է աշխատակիցներին ներքին հուշագրերով, հաղորդում է Reuters գործակալությունը։

Ծրագիրը, որը կրում է Model Capability Initiative (MCI) անվանումը, գործելու է աշխատանքային հավելվածներում և կայքերում՝ պարբերաբար իրականացնելով նաև էկրանի լուսապատճենում (snapshot)։ Հուշագրերից մեկում նշվում է, որ նախաձեռնության նպատակը ԱԲ մոդելների կատարելագործումն է հատկապես այն ոլորտներում, որտեղ դրանք դժվարությամբ են վերարտադրում մարդու և համակարգչի փոխազդեցությունը, օրինակ՝ բացվող ընտրացանկերի օգտագործումը կամ ստեղնաշարի «թեժ» համադրությունների կիրառումը։

«Սա այն դեպքն է, երբ Meta-ի բոլոր աշխատակիցները կարող են նպաստել մեր մոդելների զարգացմանը՝ պարզապես կատարելով իրենց առօրյա աշխատանքը»,- ասված է հուշագրում։

Facebook և Instagram հարթակների սեփականատեր Meta-ն ակտիվորեն ընդլայնում է արհեստական բանականության կիրառումը իր աշխատանքային գործընթացներում՝ միաժամանակ վերակազմավորելով անձնակազմը այդ տեխնոլոգիայի շուրջ։ Ընկերության համոզմամբ՝ այս քայլերը կբարձրացնեն գործունեության արդյունավետությունը։

Meta-ի տեխնիկական տնօրեն Էնդրյու Բոսվորթը երկուշաբթի տարածված մեկ այլ հուշագրում նշել է, որ ընկերությունը կուժեղացնի տվյալների ներքին հավաքագրումը «AI for Work» նախաձեռնության շրջանակում, որը ներկայումս վերանվանվել է Agent Transformation Accelerator (ATA)։

Իսրայելում ԱՄՆ դեսպան Մայք Հաքաբին կլինի ԱՄՆ պատվիրակության կազմում Իսրայելի և Լիբանանի միջև առաջիկա ուղիղ բանակցություններին, հաղորդում է CNN-ը՝ հղում անելով Պետդեպարտամենտի խոսնակին։

Հեռուստաալիքի փոխանցմամբ՝ ԱՄՆ պետքարտուղար Մարկո Ռուբիոն, Լիբանանում ԱՄՆ դեսպան Միշել Իսան և Պետդեպարտամենտի խորհրդական Մայքլ Նիդհեմը նույնպես կմասնակցեն ապրիլի 23-ին, հինգշաբթի, Վաշինգտոնում, Պետդեպարտամենտում նախատեսված բանակցություններին։

Ինչպես նախորդ փուլում, Իսրայելը և Լիբանանը կներկայացվեն ԱՄՆ-ում իրենց դեսպանների կողմից։ Սա դեսպանների միջև բանակցությունների երկրորդ փուլը կլինի վերջին երկու շաբաթվա ընթացքում։

Գերմանիայի գլխավոր ավիափոխադրող Lufthansa ընկերությունն ամառային սեզոնի ընթացքում 20 000 հազար ոչ շահավետ չվերթ կչեղարկի ավիավառելիքի խնայողության համար, որը թանկացել է Իրանում ամերիկա-իսրայելական ռազմական գործողությունների մեկնարկից ի վեր: Այս մասին հաղորդում է Deutsche Welle-ն՝ վկայակոչելով ավիաընկերության հաղորդագրությունը։ 

Թռիչքների կրճատումը կվերաբերի Ֆրանկֆուրտի և Մյունխենի օդանավակայաններին և կգործի մինչև հոկտեմբերի վերջը։ Միևնույն ժամանակ ընկերությունը նոր չվերթեր կգործարկի Ցյուրիխից, Վիեննայից ու Բրյուսելից և դեպի այդ քաղաքներ։

Lufthansa-ի ներկայացուցիչները կարծում են, որ այս չվերթերի չեղարկման միջոցով հնարավոր կլինի խնայել ավելի քան 40 000 տոննա ավիավառելիք։ Ընդ որում, ավիաընկերության արդյունավետությունը, որը չափվում է հասանելի ուղևորային կիլոմետրերով (այս ցուցանիշը հավասար է հասանելի նստատեղերի քանակի և տրանսպորտային միջոցի անցած կիլոմետրերի բազմապատկմանը), կնվազի մեկ տոկոսային կետից էլ պակաս ցուցանիշով։

Ընկերությունն արդեն չեղարկում է մինչև մայիսի 31-ը նախատեսված չվերթերը։ Օրինակ՝ ապրիլի 20-ին Lufthansa-ն չեղարկել է առաջին 120 ամենօրյա չվերթերը։ Մասնավորապես, ժամանակավորապես դադարեցվել են Ֆրանկֆուրտից դեպի լեհական Բիդգոշչ և Ժեշով քաղաքներ, ինչպես նաև դեպի նորվեգական Ստավանգեր թռիչքները։ Այլ փոփոխությունների մասին ընկերությունը կտեղեկացնի ապրիլի վերջին։

Փոխվարչապետ Մհեր Գրիգորյանն ընդունել է Հայաստանում ԵՄ Պատվիրակության ղեկավար, դեսպան  Վասիլիս Մարագոսին:

ԵՄ դեսպանի հետ կայացած հանդիպմանը փոխվարչապետը հույս է հայտնել, որ Եվրոպական քաղաքական համայնքի և ՀՀ-ԵՄ առաջիկա գագաթնաժողովները կարտացոլեն կողմերի մտադրությունը շարունակելու համագործակցային և փոխադարձ շահեկան գործընկերությունը, որը միտված կլինի Հայաստանի ինտեգրմանը եվրոպական տրանսպորտային, էներգետիկ և թվայնացման ցանցերին՝ դրանով իսկ նպաստելով տարածաշրջանային խաղաղությանը և կայուն զարգացմանը։

Սույն թվականի մայիսին Երևանում անցկացվելիք բարձր մակարդակի միջոցառումներին ընդառաջ զրուցակիցներն անդրադարձել են ժողովրդավարական ու տնտեսական դիմակայունության ամրապնդման և փոխկապակցվածության օրակարգերին՝ կարևորելով ռազմավարական առաջնայնություն հանդիսացող ծրագրերում հայաստանյան և ԵՄ մասնավոր հատվածների համար ներդրումներ կատարելու հնարավորությունները։

Վրաստանի պաշտպանության նախարարությունում ՀՀ պաշտպանության նախարար Սուրեն Պապիկյանի դիմավորման հանդիսավոր արարողությունից հետո մեկնարկել է Հայաստանի և Վրաստանի պաշտպանության նախարարների առանձնազրույցը, որը շարունակվել է պատվիրակությունների ընդլայնված կազմով։

Հանդիպմանը ներկա է եղել նաև Վրաստանում Հայաստանի արտակարգ և լիազոր դեսպան Աշոտ Սմբատյանը։

Հանդիպման ընթացքում քննարկվել են պաշտպանության բնագավառում երկկողմ համագործակցության ընթացքին և զարգացման հեռանկարներին վերաբերող հարցեր։
Կողմերն անդրադարձել են նաև տարածաշրջանային անվտանգությանն առնչվող մի շարք հարցերի։

Վերջին օրերին Կոտայքի մարզի Բյուրեղավան քաղաքում բազմաթիվ  քաղաքացիներ պոլիկլինիկա են դիմել նույնատիպ գանգատներով՝ սրտխառնոց, փսխում, փորլուծություն, ջերմության բարձրացում։ Անդրանիկ Պետրոսյանի անվան Բյուրեղավանի քաղաքային պոլիկլինիկայի տնօրեն Արմեն Վարդումյանը «Արմենպրես»-ի թղթակցի հետ զրույցում հայտնեց, որ սահմանված կարգի համաձայն՝ նմանատիպ մի քանի դիմումների դեպքում պոլիկլինիկան պարտադիր տեղեկացնում է համապատասխան առողջապահական մարմիններին։

«Մենք օրենքով նախատեսված կարգով հայտնել ենք համապատասխան կառույցներին, և այժմ իրականացվում են ստուգումներ։ Մասնավորապես՝ կատարվում են ջրի և հնարավոր այլ աղբյուրների նմուշառումներ՝ պարզելու պատճառը»,-ասաց տնօրենը։ Նրա խոսքով՝ այս պահին որևէ վերջնական տվյալ դեռ չկա, և հետազոտությունները շարունակվում են։ «Այս պահին «Վեոլիա Ջուր» ընկերության ներկայացուցիչները համայնքում են, իրականացնում են նմուշառումներ և ստուգումներ։ Դեռևս որևէ բան չի հայտնաբերվել»,-հավելեց նա։

Տնօրենի փոխանցմամբ՝ դիմած քաղաքացիների առողջական վիճակը ներկայում գնահատվում է բավարար, իսկ նման գանգատներով նոր կանչեր չեն գրանցվել։ «Հիվանդների վիճակը նորմալ է, կանչերը դադարել են։ Մենք շարունակում ենք սպասել ստուգումների արդյունքներին և գործում ենք սահմանված ընթացակարգով»,– ընդգծել է Վարդումյանը։

Ապրիլի 22-ին Բյուրեղավանի համայնքապետարանն էր հաղորդագրություն տարածել՝ հայտնելով, որ Բյուրեղավան քաղաքում վերջին օրերին բազմաթիվ քաղաքացիներ են դիմել շտապ օգնության ծառայություն հետևյալ գանգատներով’ սրտխառնոց, փորլուծություն, փսխում, ջերմության բարձրացում։ Նշվել էր, որ իրավիճակի մասին տեղյակ են համապատասխան հակահամաճարակային ծառայությունները։ «Խնդրում ենք նման գանգատների առկայության դեպքում անպայման դիմել բժշկի, հնարավորինս զերծ մնալ ջրօգտագործումից կամ օգտագործել եռացրած վիճակում»,- ասված էր համայնքապետարանի տարածած հաղորդագրության մեջ։