Month: April 2026

ՆԳՆ-ն հայտարարություն է տարածել՝ իրազեկելով, որ ապրիլի 19-ի ավտոերթով պայմանավորված՝ երթևեկությունը որոշ հատվածներում ժամանակավորապես կսահմանափակվի «Հարգելի՛ քաղաքացիներ, Ապրիլի 19-ին տեղի ունենալիք ավտոերթով պայմանավորված․  ժամը 08․00-ից երթևեկությունը ժամանակավորապես կսահմանափակվի Մ-1 ճանապարհի՝ Մ-1-Ուջան գյուղ տանող ճանապարհների հատման հատվածից մինչև Գյումրիի «Շիրակ» օդանավակայան հատվածում։ 

Երթևեկությունը կկազմակերպվի հանդիպակաց ուղղությամբ՝ մեկ գծով։ «Շիրակ» օդանավակայանից ավտոերթի մասնակից տրանսպորտային միջոցների հոսքը կուղղորդվի դեպի «Մայր Հայաստան» հուշարձանի հարակից ավտոկայանատեղի։ Ժամը 17․00-ից երթևեկությունը կսահմանափակվի Գյումրի քաղաքի Վարդանանց հրապարակում։ 

Ավտոերթի մասնակիցներին խնդրում ենք պահպանել անվտանգության և ճանապարհային երթևեկության կանոնները, տրանսպորտային միջոցների միջև պահպանել անվտանգ միջտարածություն, հետևել Ոստիկանության ծառայողների ցուցումներին և ճանապարհային նշաններին։ 

Հարգելի՛ քաղաքացիներ, խնդրում ենք ապրիլի 19-ին՝ ժամը 8:00-ից 14:00-ն նշված ճանապարհահատվածով երթևեկել միայն խիստ անհրաժեշտության դեպքում:

 Պատճառված անհարմարությունների համար հայցում ենք ձեր ներողամտությունն ու շնորհակալություն հայտնում ըմբռնման համար»,- ասվում է հաղորդագրությունում։ 

Հիշեցնենք՝ ապրիլի 19-ին մեծ ավտոերթ է լինելու դեպի Գյումրի՝ նշելու Հյուսիս–հարավ ավտոճանապարհի Աշտարակ–Գյումրի հատվածի բացումը։

ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը մասնակցել է Ֆրանսիայի զինված ուժերի «Օրիոն 26» զորավարժության ամփոփիչ փուլի բարձրաստիճան հյուրերի օրվա միջոցառումներին։ 

ԶՈՒ ԳՇ պետ Էդվարդ Ասրյանը հանդիպել է Ֆրանսիայի զինված ուժերի պաշտպանության շտաբի պետ, գեներալ Ֆաբիեն Մանդոնի հետ։ Քննարկվել են երկկողմ համագործակցությանը և զարգացման հեռանկարներին առնչվող հարցեր։

Միջոցառման ընթացքում գեներալ-լեյտենանտ Էդվարդ Ասրյանը ոչ պաշտոնական հանդիպումներ է ունեցել ՆԱՏՕ-ի դաշնակցային միացյալ ուժերի հրամանատար, գեներալ Ինգո Գերհարցի և Ֆրանսիայի ԶՈՒ ցամաքային զորքերի հրամանատար, գեներալ Պիեռ Շիլլի հետ։

Այսօր Հակակոռուպցիոն դատարանի դիմաց «Ուժեղ Հայաստան» կուսակցության համակիրների մասնակցությամբ տեղի ունեցած միջադեպի առթիվ նախաձեռնվել է քրեական վարույթ՝ մի խումբ անձանց կողմից խուլիգանություն կատարելու և պաշտոնատար անձի օրինական ծառայողական գործունեությանը միջամտելու հոդվածների հատկանիշներով: Այս մասին տեղեկացնում են ՀՀ քննչական կոմիտեից։

Քրեական վարույթի նախաքննության ընթացքում 17 անձ ձերբակալվել է:

Կատարվում են քննչական և վարութային անհրաժեշտ գործողություններ:

Նախարար Գևորգ Պապոյանը ծանոթացել է 250 մլն դոլարի ներդրումային ծրագրին. նախատեսվում է 2500 նոր աշխատատեղի հիմնում, օրական շուրջ 100 տոննա թռչնամսի և 15–20 տոննա խոզի մսի արտադրություն: Այս մասին տեղեկացնում են ՀՀ էկոնոմիկայի նախարարությունից։

ՀՀ էկոնոմիկայի նախարար Գևորգ Պապոյանն ապրիլի 17-ին այցելել է «Շիրակ» թռչնաբուծարան։ Այցին մասնակցել է նաև նախարարի տեղակալ Արման Խոջոյանը։

Ընկերության կողմից նախատեսվող ներդրումները հասնում են 250 մլն դոլարի, որից ավելի քան 60 մլն դոլարն արդեն իսկ կատարվել է։

Ծրագիրն իրականացվելու է 420 հա մակերեսի վրա հանրապետության տարբեր մարզերում։ Նախատեսվում է 2500 աշխատատեղի ստեղծում է ամբողջ նախագծի կյանքի կոչման դեպքում, որից 750-ը՝ Շիրակում։ 300 աշխատատեղ արդեն իսկ ստեղծվել է։

Ծրագրի իրագործման արդյունքում նախատեսվում է ավելացնել արտադրական ծավալները՝ ապահովելով օրական շուրջ 100 տոննա թռչնամսի և 15–20 տոննա խոզի մսի արտադրություն։

Արտադրված թռչնամիսը բավարարելու է Հայաստանի բոլոր պաշարները, արտադրանքի մի մասն էլ կարտահանվի։

Ընկերությունում արդեն իսկ օրական արտադրվում է 400 հազար ձու։

Ընկերության սեփականատեր Նարեկ Նալբանդյանի և տնօրեն Հայկ Մաթևոսյանի ուղեկցությամբ նախարարը շրջել է թռչնաֆաբրիկայում, ծանոթացել պայմաններին, ներդրված սարքավորումներին և արտադրական գործընթացին։ Շրջայցի ընթացքում ներկայացվել են թռչնաբուծարանի զարգացման ծրագրերն ու առաջիկա անելիքները։

Ընկերությունը նաև 25 մլն դոլարի ներդրում է իրականացրել համակցված կերերի գործարանի կառուցման համար, որն տարածաշրջանի ամենամեծ գործարաններից մեկն է։

Եվրոպացի պաշտոնյաները դժգոհում են, որ ամերիկյան սպառազինության մատակարարման ուշացումներն իրենց դնում են բարդ դրության մեջ, հայտնում է Reuters գործակալությունը:

Հինգշաբթի Reuters-ը, հղում անելով իր աղբյուրներին, հայտնել էր, որ ԱՄՆ-ը տեղեկացրել է եվրոպական երկրներին սպառազինության մատակարարման հնարավոր ուշացումների մասին՝ Իրանի հետ հակամարտության պայմաններում սեփական ռազմական կարիքների առաջնահերթ ապահովման անհրաժեշտության պատճառով: Նշվում էր, որ մատակարարման ուշացումները, ըստ կանխատեսումների, կազդեն մի շարք եվրոպական երկրների, այդ թվում՝ Բալթյան և սկանդինավյան պետությունների վրա:

Ինչպես հայտնել էր ERR հեռուստառադիոընկերությունը նախորդ ուրբաթ, Էստոնիայի պաշտպանության նախարար Հաննո Պևկուրը կարծում է, որ ամերիկյան զենքի մատակարարման ուշացումները Եվրոպայում կարող են վերաբերել զինամթերքին, HIMARS համակարգերին և Javelin հակատանկային հրթիռային համալիրներին:

ԱՄՆ-ը և Իսրայելը փետրվարի 28-ին սկսել էին հարվածներ հասցնել Իրանի տարածքում գտնվող օբյեկտներին, որոնց հետևանքով զոհվել էր ավելի քան 3 հազար մարդ: Ապրիլի 8-ին Վաշինգտոնն ու Թեհրանը հայտարարեցին երկու շաբաթով հրադադարի մասին: Դրանից հետո Իսլամաբադումկայացած բանակցություններն ավարտվեցին առանց արդյունքի: 

Ընդ որում, մարտական գործողությունների վերսկսման մասին չի հաղորդվել, սակայն ԱՄՆ-ը սկսել է իրանական նավահանգիստների շրջափակումը: Միջնորդները փորձում են կազմակերպել բանակցությունների նոր փուլ:

«Շուն-շանգյալ, բոշա, զոմբի,
ժեխ․․․». ահա այսօրինակ էպիտետներով են ընդդիմադիրները շփվում քաղաքացիների,
այդ թվում՝ սեփական համակիրների հետ, եթե իհարկե փողով համակրին կարելի է համակիր անվանել։
Չէ՞ որ համակիրը նյութական ու անձնական շահագրգռվածություն չի ունենում։ Եթե նրա համակրանքը
շահելու համար պետք է նրան նյութապես շահագրգռել, ապա դա արդեն համակիր չէ։

Մի խոսքով, դատարանի բակում այսօր
Նարեկ Կարապետյանին հարցրին՝ հա՞շտ է այն խոսույթի հետ, որ «ուժեղ հայաստանցիները»
կիրառում են սեփական համակիրների մասին։ Նկատենք, «Ուժեղ Հայաստանի» առաջին համարը
չհերքեց, որ Հակակոռուպցիոն կոմիտեի հրապարակած ձայնագրության մեջ այդ խոսույթը կիրառողները
իրենց թիմից էին։ Չնայած որ մտահոգիչ համարեց այդ խոսույթը, բայց սեփական թիմակիցների
նողկալի բառապաշարը փորձեց վերագրել ՔՊ-ականներին։ «Այդ ՔՊ-ական խոսույթը պետք է վերանա»,-
ասաց Նարեկ Կարապետյանը։  

6 տարի շարունակ այս մարդիկ ու
իրենց համակիրները քաղաքացիներին անվանեցին «ժեխ, զոմբի, թուրքի  եթիմ, անհայրենիք, շուն-շանգյալ, բոշա», ուղիղ հայհոյանքներ
հնչեցրին, թիրախավորեցին մարդկանց՝ անուններով, դեմքերով (ախուրյանցի Անո), բայց պարզվում
է՝ այդ խոսույթը ՔՊ-ական խոսույթ է։ Իսկ ձայնագրություններով լսվող՝ բաց կապով չխոսելու
հորդորները Նարեկ Կարապետյանը որակեց որպես տեղեկատվական հիգիենա։ Հավանաբար այդ նույն
հիգիենայի շրջանակներում էլ փակ համաժողով արեցին, այդ նույն հիգիենայի շրջանակներում
էլ ռուսաստանցի օլիգարխը ելույթներ է ունենում արհեստական բանականության գործիքների
կիրառմամբ։

Իսկ ձայնագրության մեջ երիտասարդներին
շալվար առած Ալիկը, պարզվեց, Ալիկ Ալեքսանյանը չէ, բայց իրենց ընկեր, թիմակից Ալիկն
է, որը հիմա, ինչպես տեղեկացրեց Ալիկ Ալեքսանյանը, գտնվում է տնային կալանքի մեջ։

«Էս փոքրիկ խմբակի բերած օրերում
է, որ նորմալ չի, որ մարդը մարդու հանդեպ կարա օգտակար լինի։ Էդ իրանց համար ա, որ
նորմալ չի, որ մարդ կարա ինչ-որ մեկի հանդեպ հոգ տանի, խնդիրները լուծի, որ մարդը լավ
ապրի»,- ասում է ՌԴ քաղաքացի Ալիկ Ալեքսանյանը։

Իսկ հիմա եկեք տեսնենք, թե ինչպես
են «Ուժեղ Հայաստանում» հոգ տանում մարդկանց մասին։

«Ասիմ համ կանչում եք, համ էլ
երեխեքի վրա գոռում եք, ասում եք՝ սպարտիվկեքով եք։ Փող չունեն, սպարտիվկեքով պիտի
գան։ Ուզում եք մաքուր շորերով գան, հանեք փող տվեք։ Խաբա՞ր էիր, որ 20 հազար փող են
տվել։ Էսօրվա իրենց հագի շլվարները, որ վաղը պիտի հագնեն, Ալիկն ա առել»։

Ահա այսպես են հոգ տանում այն
քաղաքացիների օգտին, որոնց բերել են իրենց հանրահավաքին՝ վրաները գոռգոռալով, նվաստացնելով,
նյութապես շահագրգռելով ու հանրահավաքի քարշ տալով։ Ահա այսպես են «Ուժեղ Հայաստանում»
պատկերացնում հոգ տանելը։ Ու պարզվում է՝ դժգոհ են, որ «փոքրիկ խմբակը» ընտրությունների
ընթացքում բարեգործության արգելք է սահմանել։ Դե, մի տեսակ դժվարանում է ընտրություններ
կեղծելը ու, ասենք, 1,5 կգ շաքարավազ բաժանելը ընտրություններից առաջ՝ ինչպես, օրինակ,
2012-ին Կարեն Կարապետյանն էր անում։

Ի դեպ՝ դատարանի բակում այսօր
կալուգացի օլիգարխին աջակցելու էին եկել նաև ՀՀԿ-ականներ ու բազմաթիվ «նախկիններ»։
Նրանցից Ալբերտ Բազեյանը, որն, ի դեպ, մեղադրյալ է իշխանությունը յուրացնելու նախապատրաստություն
կատարելու հոդվածով, հայտարարեց, որ պետք է ազգային իշխանություն ձևավորվի, հարաբերությունները
կարգավորվեն արտաքին գործընկերների հետ, որից տարիներ անց, նրանց ռազմաքաղաքական աջակցությամբ
հզորացնելով մեր բանակը, պատերազմի միջոցով ազատագրելու ենք Արցախը։

Բազեյանների չափ խելք Ադրբեջանում,
իհարկե, չունեն։ Կողքից նայելու են, թե ինչպես է կալուգացին գալիս, Մոսկվայի միջոցով
բանակը հզորացնում ու հարձակվում Ադրբեջանի վրա՝ Արցախն ազատագրում։ Նաև հարց է՝ իսկ
Մոսկվայում գիտե՞ն իրենց միսիայի մասին։ Իսկ հետո այս պատերազմի քառագլուխ ուժերը կպնդեն,
որ իրենք էլ են խաղաղություն ուզում, իրենք որ եկան՝ իրական խաղաղություն են բերելու։
Փառահեղ կոնցեպտ է, ինչ խոսք։

Ի դեպ՝ Սամվել Կարապետյանը ոչ
միայն հրաժարվեց լրագրողների հարցերին պատասխանել՝ պատճառաբանելով, թե սահմանափակումների
տակ է, այլև նրա պաշտպանները հերթական անգամ միջնորդեցին դատական նիստն անցկացնել դռնփակ
ռեժիմով։

Վոլոդյա Հակոբյան

Ուժերը, որ ՀՀ քաղաքացուն «շուն ու շանգյալ», «բոշա» են անվանում, չպետք է հաղթահարեն ԱԺ մտնելու անցողիկ շեմը