Վանաձոր համայնքի ավագանու անդամ, «Հայաստան» դաշինքից պատգամավորի թեկնածու Արթուր Օհանյանի կալանավորման գործով Oragir.News -ը զրուցել է ԱԺ «Ուժեղ Հայաստան» խմբակցության պատգամավոր, «Մամիկոն Ասլանյան» դաշինքի առաջնորդ Մամիկոն Ասլանյանի հետ։
Պատգամավորը հայտնեց, որ անձամբ է հետևել դատական գործընթացին և ներկա է եղել դատարանում մինչև ուշ գիշեր, երբ դատավորը կայացրել է մեկ ամսով կալանավորելու որոշումը։ Ասլանյանը մանրամասներ ներկայացրեց նաև քրեական վարույթի հիմքում ընկած ենթադրյալ ապացույցի վերաբերյալ։
«Արթուր Օհանյանը երկար տարիներ ավագանու անդամ է եղել, իմ գլխավորած դաշինքի անդամ, խմբակցության ղեկավար։ Դասախոս, գիտնական, երբևէ չարատավորված, շատ օրինապաշտ, նորմալ կյանքով ապրող անձնավորություն է, ով ներգրավված է եղել նաև ընտրություններում՝ «Հայաստան» դաշինքի ցուցակում որպես պատգամավորի թեկնածու։ Դա 5-6 ամիս առաջվա մի ձայնագրություն է շրջանառվում։ Ըստ իմ ունեցած տեղեկությունների՝ երկու հոգի զրուցում են, ու հայտնում են, թե իբր Արթուր Օհանյանն ասել է՝ եթե լավ անցնեն ընտրությունները, ձեզ (թե քեզ) չգիտեմ ինչ գործ կտան, թե ինչ կտանք։ Ու դա դիտվել է որպես ընտրակաշառքի խոստում։ Արթուրին էդ հիմքով են կալանավորել»,- նշեց Մամիկոն Ասլանյանը։
Պատգամավորի պնդմամբ՝ տեղի ունեցածը զուրկ է իրավական որևէ հիմնավորումից և հետապնդում է բացառապես քաղաքական նպատակներ։ Անդրադառնալով այն հարցին, թե որն է այս ամենի իրական շարժառիթը, Ասլանյանը հայտարարեց, որ այն ուղղակիորեն կապված է Վանաձորում սպասվող քաղաքական զարգացումների հետ։
«Հերթական շինծու մեղադրանքն է, քաղաքական հետապնդման ենթարկելու դրություն, ուրիշ ոչինչ։ Իրական նպատակն այն է, որ, կարծում եմ, Վանաձորում առաջիկայում ընտրություններ են, և բոլոր ակտիվ մարդկանց նկատմամբ, ովքեր ունեն հեղինակություն և չեն գտնվում իշխանության հովանավորության կամ նրանց բարեհաճության տիրույթում, կիրառվում են տարբեր պարտադրանքի միջոցներ»։
Հիշեցնենք, որ Արթուր Օհանյանը ձերբակալվել էր հոկտեմբերի 2-ին, իսկ հոկտեմբերի 3-ին դատարանը բավարարել է նրան մեկ ամսով կալանավորելու միջնորդությունը։
