Բռնցքամարտի Եվրոպայի երիտասարդական առաջնություն․ Եվա Խլղաթյանը հաղթել է մրցակցին

56 կգ քաշային Եվա Խլղաթյանը հաղթանակով է սկսել ելույթը Սերբիայի Լոզնիցա քաղաքում ընթացող բռնցքամարտի Եվրոպայի երիտասարդների առաջնությունում։

Հենց առաջին մենամարտում նա հաղթել է բելառուս Սոֆյա Օրլովային։

Առաջնությունում Հայաստանն ունի 15 ներկայացուցիչ։

 

«Արարատ-Արմենիա»-ն հաղթանակ է տարել և շարունակում է գլխավորել մրցաշարային աղյուսակը

Ֆուտբոլի Հայաստանի Պրեմիեր լիգայի երրորդ տուրում Հայաստանի գործող չեմպիոն «Արարատ-Արմենիան» Աբովյանի Վահագն Թումասյանի անվան մարզահամալիրում 2։0 հաշվով առավելության հասավ «Վանի» նկատմամբ:

Խաղի հաշիվը երկրորդ խաղակեսի մեկնարկում՝ 47-րդ րոպեին, բացեց Ալիուն Նդուրը։ Իսկ տանտերերի երկրորդ գոլը 89-րդ րոպեին հեղինակեց Արայիկ Էլոյանը՝ ձևակերպելով հանդիպման վերջնահաշիվը։

Այս խաղից հետո «Արարատ-Արմենիան» վաստակած միավորները հասցրեց 9-ի և շարունակում է գլխավորել մրցաշարային աղյուսակը։ «Վանը», անցկացրած երեք խաղերում կրելով նույնքան պարտություն, 0 միավորով 11-րդն է։

Վիրջինիայի նահանգի համալսարանի կամպուսում հրաձգություն է տեղի ունեցել․ հինգ մարդ վիրավորվել է, մեկը ծայրահեղ վիճակում է

Շաբաթ վաղ առավոտյան Վիրջինիայի նահանգի համալսարանի ուսանողական հանրակացարանների մոտ տեղի ունեցած հրաձգության հետևանքով հինգ մարդ հրազենային վնասվածքներ է ստացել։ Տուժածներից մեկը գտնվում է ծայրահեղ վիճակում, հայտնել է Associated Press-ը՝ հղում կատարելով համալսարանի աղբյուրին։

Հրաձգությունը տեղի է ունեցել գիշերը ժամը մոտ 1:28-ին՝ Իթրիկի կամպուսի տարածքում գտնվող Quad Annexes հատվածում։ Համալսարանի տվյալներով՝ բոլոր հինգ տուժածները տեղափոխվել են տեղի հիվանդանոցներ։ Մյուս չորսի վիճակը գնահատվում է կայուն, նրանց վնասվածքները կյանքի համար վտանգ չեն ներկայացնում։

Դեպքից հետո համալսարանի տարածքում հայտարարվել է կամպուսի փակման ռեժիմ։ Առավոտյան ժամը մոտ 8:20-ին սահմանափակումները հանվել են, սակայն ուսումնական հաստատության տարածքում շարունակում է պահպանվել ոստիկանության ուժեղացված ներկայությունը։

Վիրջինիայի նահանգի համալսարանի ոստիկանության տվյալներով՝ հրաձգությանը կարող էին մասնակցած լինել մի քանի կասկածյալներ։ Այս պահին ձերբակալությունների մասին չի հաղորդվում։

Հետաքննությունը վարում է Չեսթերֆիլդ օկրուգի ոստիկանությունը՝ Ալկոհոլի, ծխախոտի, հրազենի և պայթուցիկ նյութերի դաշնային բյուրոյի (ATF), ինչպես նաև Հանովեր օկրուգի շերիֆի գրասենյակի աջակցությամբ։

Վիրջինիայի նահանգի համալսարանը պատմականորեն համարվում է սևամորթների համալսարան, որը գտնվում է նահանգի մայրաքաղաք Ռիչմոնդից մոտ 39 կիլոմետր հարավ։ Այստեղ սովորում է շուրջ 5,7 հազար ուսանող։ Հրաձգությունը տեղի է ունեցել ուսումնական տարվա մեկնարկից անմիջապես առաջ․ դասերը պետք է սկսվեն երկուշաբթի, իսկ հանրակացարանները բացվել էին մեկ շաբաթ առաջ։

Վանաձորում խնջույքից հետո 6 մարդ հոսպիտալացվել է՝ աղիքային վարակի ախտորոշմամբ

2026 թվականի օգոստոսի 15-ին Վանաձորի բժշկական կենտրոնից տեղեկություն է ստացվել «աղիքային վարակ» ախտորոշմամբ 6 հոսպիտալացված անձի վերաբերյալ․ հայտնում է ՀՀ ԱՆ Հիվանդությունների վերահսկման և կանխարգելման ազգային կենտրոնը։

«Մասնագետների իրականացրած համաճարակաբանական հետազոտությամբ պարզվել է, որ բոլոր հիվանդները օգոստոսի 12-ին մասնակցել են նույն խնջույքին:

Հիվանդների մոտ արձանագրվել են սրտխառնոց, փսխում, էպիգաստրալ շրջանի ցավ, ընդհանուր թուլություն, առանձին դեպքերում՝ նաև լուծ։ Բոլոր 6 անձինք հոսպիտալացված են։

Համաճարակաբանական հետազոտության ընթացքում պարզվել է նաև, որ միջոցառումից հետո սննդի մի մասը տարվել է տուն և կրկին օգտագործվել, որից հետո ի հայտ են եկել գանգատներ։

Դեպքի վերաբերյալ սահմանված կարգով տեղեկացվել է Սննդամթերքի անվտանգության տեսչական մարմնի Լոռու մարզային կենտրոնը։

Համաճարակաբանական հետազոտությունը շարունակվում է։
ՀՀ ԱՆ Հիվանդությունների վերահսկման և կանխարգելման ազգային կենտրոնը հետևում է իրավիճակին։

Լրացուցիչ տեղեկատվություն կտրամադրվի անհրաժեշտության դեպքում»,- ասված է հաղորդագրությունում:

 

Վարդենիսի ոստիկանները թմրանյութ և զենք-զինամթերք են հայտնաբերել․ 52-ամյա տղամարդը ձերբակալվել է

Համայնքային ոստիկանության Վարդենիսի բաժնի ծառայողները օպերատիվ տեղեկությունն իրացրին օգոստոսի 4-ին։ Ժամը 12․45-ին, Մեծ Մասրիկ գյուղի գազալցակայանի մոտ, թմրամիջոց ապօրինի պահելու և օգտագործելու կասկածանքով իրավապահները ձերբակալեցին ու բաժին տեղափոխեցին Դարանակ գյուղի բնակիչ 52-ամյա մի տղամարդու։ Հիմնավորվեցին նաև ոստիկանների մյուս կասկածները։ 

Բաժնում տղամարդն ընդունեց, որ խուզարկությամբ իր մոտ հայտնաբերված կաթուցիչում մարիխուանա է, տանն էլ ունի զնեք-զինամթերք և աճեցնում է կանեփ։Տղամարդն ու կազմված փաստաթղթերը ներկայացվեցին Վարդենիսի քննչական բաժին, որտեղ նախաձեռնվեց քրեական վարույթ։ 

Նույն օրը Դարանակ գյուղի 52-ամյա տղամարդու տան խուզարկությամբ հայտնաբերվեց մարիխուանա, կանեփի սերմ, առանց փաստաթղթերի երկու հրացան, ինքնաձիգի 124 փամփուշտ, դանակներ, կանեփի 21 թուփ։ 

Նախաքննությունը շարունակվում է։

Ամուսնությունից առաջ ամուսնական պայմանագիր են կնքել

Պորտուգալիայի հավաքականի եւ սաուդական «Ալ-Նասեր» ակումբի հարձակվող Քրիշտիանու Ռոնալդուն եւ նրա հարսնացու Ջորջինա Ռոդրիգեսը, ինչպես հայտնի է, անցյալ շաբաթ ամուսնացել են։ Jornal de Notícias պորտուգալական պարբերականը հայտնում է, որ զույգը կնքել է ամուսնական պայմանագիր՝ իրենց հարաբերություններն օրինականացնելու պրոցեսում։

Համաձայն պայմանագրի՝ Ռոնալդուի եւ Ռոդրիգեսի ունեցվածքները կլինեն առանձին։ Նրանցից յուրաքանչյուրը կպահպանի այն ունեցվածքի հանդեպ միանձնյա տիրապետման իրավունքը, որին տիրապետել է նախքան ամուսնությունը։ Ամուսնությունից հետո ցանկացած գույք, որը ձեռք կբերվի, կպատկանի նրան, ում անունով գրանցվել է։ Եթե զույգը որոշի համատեղ ինչ որ բան ձեռք բերել, եւ ըստ այդմ՝ գրանցել երկուսի անունով, ապա այն կպատկանի երկուսին՝ հավասարաչափ։ Ամուսնության վկայականից պարզ է դառնում, որ զույգը բնակվելու է Էր-Ռիյադում։ Ամուսնությունից հետո՝ երկուսն էլ շարունակելու են կրել իրենց ազգանունները։

Մոսկվան ԱՄՆ-ից և Թուրքիայից պարզաբանումներ է խնդրել Ուկրաինային ամերիկյան զենքի հնարավոր փոխանցման վերաբերյալ

Ռուսաստանի ԱԳՆ-ն ԱՄՆ-ից և Թուրքիայից պարզաբանումներ է խնդրել՝ Ուկրաինային ամերիկյան սպառազինության հնարավոր փոխանցման մասին ԱՄՆ Կոնգրեսի հրապարակած տեղեկությունների առիթով։ Այս մասին հայտարարել է Ռուսաստանի արտաքին քաղաքական գերատեսչության պաշտոնական ներկայացուցիչ Մարիա Զախարովան, տեղեկացնում է «Коммерсантъ»-ը։

Ըստ Զախարովայի, հրապարակված փաստաթղթերում խոսվում է Կիևին M270 MLRS համազարկային կրակի ռեակտիվ համակարգերի 12 արձակման կայան, ավելի քան 2,5 հազար չկառավարվող կասետային զինամթերք, 203 մմ տրամաչափի 47 հազար կասետային հրետանային արկ և 70 ATACMS օպերատիվ-մարտավարական հրթիռ փոխանցելու ծրագրերի մասին։

Զախարովան նշել է, որ Մոսկվան առայժմ հստակ տեղեկություն չունի սպառազինության հնարավոր փոխանցման հանգամանքների և պայմանների մասին։ Մասնավորապես, դեռ անհայտ է մնում, թե ով է նախաձեռնել մատակարարումները, ինչ ժամկետներում և ինչ եղանակով կարող է զենքը հասցվել ուկրաինական կողմին։

ԱԳՆ ներկայացուցիչը նշել է, որ փոխանցման մեխանիզմների վերաբերյալ հստակ տեղեկատվության բացակայությունը հիմք է ստեղծում շահարկումների համար և անհանգստություն է առաջացնում ռուսաստանյան կողմում։

Զախարովան նաև հայտարարել է, որ այնպիսի գործողությունները պետությունների կողմից, որոնք հռչակում են հակամարտության քաղաքական-դիվանագիտական կարգավորմանը իրենց հանձնառությունը, չեն նպաստում փոխադարձ վստահության ամրապնդմանը։ Նա հիշեցրել է, որ ավելի վաղ Թուրքիան հայտարարել էր Ուկրաինային մահաբեր սպառազինություն մատակարարելուց հրաժարվելու մասին։