julbaz.mediamonitoring.am

Սպիտակ տան աշխատակազմի ղեկավարի տեղակալ Ռիչարդ Ուոլթերսը հեռանում է ԱՄՆ նախագահ Դոնալդ Թրամփի վարչակազմից։ Նա կդառնա առաջին բարձրաստիճան պաշտոնյան, որը կհեռանա Սպիտակ տան աշխատակազմի նոր ղեկավարի պաշտոնում Սթիվեն Միլերի նշանակումից հետո սպասվող լայնածավալ կադրային վերադասավորումների ֆոնին, հայտնում է Axios-ը։

Ուոլթերսը պաշտոնից հեռացող աշխատակազմի ղեկավար Սյուզի Ուայլսի ամենամերձավոր քաղաքական դաշնակիցներից էր։ Նրանց համագործակցությունը տևել է ավելի քան տասը տարի։ Պարբերականի տվյալներով, Ուոլթերսը հրաժարականի դիմում է ներկայացրել ուրբաթ օրը, և նրա հեռացումը տեղի է ունենում փոխադարձ համաձայնությամբ։

«Նախագահ Թրամփի համար աշխատելը կյանքիս մեծագույն պատիվն էր, և ես միշտ երախտապարտ կլինեմ Սյուզի Ուայլսին՝ ընձեռած հնարավորության համար», — Axios-ին ասել է Ուոլթերսը։ Նա նաև աջակցություն է հայտնել Միլերին՝ նշելով, որ վերջինս նախագահի օրակարգն իրականացնելու համար ձևավորում է «անհավանական և բանիմաց թիմ»։

«Անհամբեր սպասում եմ նրան արդեն Սպիտակ տան սահմաններից դուրս օգնելու հնարավորությանը», — հավելել է Ուոլթերսը։

Միլերն իր հերթին բարձր է գնահատել հեռացող պաշտոնյայի աշխատանքը և հայտարարել, որ նա կշարունակի աջակցել վարչակազմին դրսից։

«Ռիչարդը Սպիտակ տան թիմի անգնահատելի անդամ էր և օգնել է հասնել վարչակազմի խոշորագույն հաղթանակներից մի քանիսին։ Թեև նա հեռանում է մեզանից, Ռիչարդը կշարունակի օգնել դրսից, մինչ մենք ամենայն վճռականությամբ աշխատում ենք նախագահ Թրամփի ծրագրի իրականացման և Ամերիկան փրկելու նրա համարձակ պայքարն առաջ մղելու ուղղությամբ», — ասել է Միլերը։

Ուոլթերսը փորձառու հանրապետական քաղաքական ռազմավար է։ Նա Հանրապետական կուսակցության ազգային կոմիտեի գործադիր տնօրենի պաշտոնը զբաղեցրել է կազմակերպության պատմության մեջ ամենաերկար ժամանակահատվածով և կարևոր դեր է խաղացել Թրամփի բոլոր երեք նախագահական քարոզարշավներում։ 2025 թվականին նա նաև ղեկավարել է նախագահի երդմնակալության նախապատրաստման կոմիտեի գործադիր աշխատանքները։

Կադրային փոփոխությունների մասին հայտնի է դարձել այն բանից հետո, երբ Թրամփը Միլերին նշանակել է Ուայլսի փոխարեն։ Վերադասավորումները տեղի են ունենում հանրապետականների համար անհաջող՝ Կոնգրեսի միջանկյալ ընտրություններից հետո։ Ուոլթերսի հեռացումը կարող է վկայել Սպիտակ տան ներսում ազդեցության վերաբաշխման մասին՝ հօգուտ աշխատակազմի նոր ղեկավարի թիմի։

«Թրամփի ուղին» (TRIPP) կարող է փոխել Հարավային Կովկասի տրանսպորտային աշխարհագրությունը՝ Հայաստանի համար երկաթուղային ելք բացելով դեպի Իրան, Թուրքիա և այնուհետև Եվրոպա, ինչպես նաև ընդլայնելով Կենտրոնական Ասիայի, Հնդկաստանի և Չինաստանի հետ առևտրի հնարավորությունները։ Սակայն նախագծի տնտեսական ներուժը դեռ չի նշանակում, որ լիարժեք շահագործումը շուտով կսկսվի․ հիմնական խոչընդոտներից են հայ-ադրբեջանական խաղաղության փխրունությունը, Իրանի դիրքորոշումը և Հայաստանի երկաթուղային ենթակառուցվածքի կառավարմանը Ռուսաստանի մասնակցության հարցը, կարծում է «Коммерсантъ» պարբերականը։

«Այս երկաթուղային ճյուղը Հայաստանի համար ուղիղ հաղորդակցություն է բացում Կենտրոնական Ասիայի և ավելի հեռու գտնվող երկրների հետ։ Խոսքը Հնդկաստանի, Չինաստանի և Մետաքսի մեծ ճանապարհի ճյուղերից մեկի մասին է։ Սա Հայաստանի համար կարճ ճանապարհ է դեպի Իրան։ Ինչպիսի քաղաքական և աշխարհաքաղաքական վայրիվերումներ էլ տեղի ունենան Իրանի շուրջ, Երևանը լավ հարաբերություններ ունի այդ երկրի հետ», — պարզաբանել է հայ լրագրող Մարկ Գրիգորյանը։

Նրա կարծիքով, երթուղին նաև հնարավորություն կտա հաղորդակցություն հաստատել Ադրբեջանի հիմնական տարածքի և Նախիջևանի միջև, իսկ գործող Գյումրի–Կարս երկաթուղու շնորհիվ՝ տարածաշրջանը կապել Թուրքիայի հետ։ Հայաստանի համար սա նշանակում է հնարավոր ելք դեպի Թուրքիայի տրանսպորտային ցանց և այնուհետև՝ Եվրոպա։

«Տնտեսական առումով երկաթուղու այս փոքր հատվածը շատ կարևոր և, ընդհանուր առմամբ, բոլոր կողմերի համար շատ շահավետ է դառնում», — նշել է Գրիգորյանը։

Միաժամանակ լրագրողը կասկածում է, որ նախագիծը կհաջողվի իրականացնել առաջիկա տարիներին։ Բացի Ռուսաստանի մասնակցության շուրջ անորոշությունից, որին կոնցեսիոն կառավարման է հանձնված Հայաստանի երկաթուղային ենթակառուցվածքը, լուրջ խոչընդոտ է մնում Երևանի և Բաքվի միջև խաղաղության անկայունությունը։ Լրացուցիչ գործոն է Իրանի դիրքորոշումը, որը նախկինում հայտարարել էր նախագծի իրականացման որոշ տարբերակների անընդունելիության մասին։

«Սա արագ իրականացվող նախագիծ չէ․ կարծում եմ՝ այն չի իրականացվի 2027-ին կամ նույնիսկ 2028 թվականին», — կարծում է Գրիգորյանը։

«Թրամփի ուղու» ստեղծման մասին ԱՄՆ-ի, Հայաստանի և Ադրբեջանի առաջնորդները պայմանավորվել են 2025 թվականի օգոստոսին՝ Վաշինգտոնում կայացած հանդիպմանը։ Նախագիծը նախատեսում է ավտոմոբիլային և երկաթուղային ենթակառուցվածքների, ինչպես նաև նավթագազային հաղորդակցությունների զարգացում։ Հայաստանի տարածքով անցնող երթուղու հատվածը պետք է կազմի մոտ 42 կմ։

Հետագա աշխատանքների շրջանակում կողմերը պայմանավորվել են ստեղծել եռակողմ խումբ՝ դիվանագետների և տեխնիկական մասնագետների մասնակցությամբ։

Նախատեսվում է նաև տրանսպորտային ենթակառուցվածքի և էլեկտրաէներգետիկայի հարցերով առանձին խմբերի ձևավորում։ Նրանց խնդիրն է պայմաններ նախապատրաստել նախագծի գործնական իրականացման համար։

Ադրբեջանի նախագահ Իլհամ Ալիևն անձամբ Ֆիզուլիի օդանավակայանում դիմավորել է Թուրքիայի նախագահ Ռեջեփ Թայիփ Էրդողանին, որը երկիր է ժամանել «Հաղթանակի օրվա» տոնակատարությանը մասնակցելու համար, հայտնում են ադրբեջանական լրատվամիջոցները։

Էրդողանն Ադրբեջան է այցելել Ալիևի հրավերով։ Նա ժամանել է տիկնոջ հետ։

Թուրքիայի նախագահի գլխավորած պատվիրակության կազմում են նաև երկրի արտաքին գործերի նախարար Հաքան Ֆիդանը, գյուղատնտեսության և անտառային տնտեսության նախարար Իբրահիմ Յումաքլըն, Ազգային հետախուզական կազմակերպության ղեկավար Իբրահիմ Քալընը, հաղորդակցության հարցերով տնօրեն Բուրհանեթթին Դուրանը, արտաքին քաղաքականության և անվտանգության հարցերով նախագահի գլխավոր խորհրդական Աքիֆ Չաղաթայ Քըլըչը, իշխող «Արդարություն և զարգացում» կուսակցության փոխնախագահ և թյուրքական պետությունների հետ կապերի բաժնի ղեկավար Քյուրշադ Զորլուն, ինչպես նաև Թյուրքական պետությունների կազմակերպության ավագների խորհրդի նախագահ Բինալի Յըլդըրըմը։

Այցի գլխավոր իրադարձությունը կլինեն նոյեմբերի 8-ին կայանալիք միջոցառումները՝ նվիրված Ադրբեջանի կողմից Արցախի օկուպացմանը։

Ակնկալվում է, որ երկու երկրների ղեկավարները կքննարկեն նաև երկկողմ հարաբերություններն ու տարածաշրջանային արդիական հարցերը։

Ադրբեջանական լրատվամիջոցները հայտնում են, որ այցի ընթացքում Էրդողանը կայցելի նաև օկուպացված Արցախ։