Փաշինյանը Դուբլինում մասնակցում է ԵՔՀ գագաթնաժողովին

Նիկոլ Փաշինյանը Դուբլինում մասնակցում է Եվրոպական քաղաքական համայնքի 9-րդ գագաթնաժողովին:

Միջոցառման մասնակից երկրների առաջնորդներին նիստից առաջ դիմավորել է Իռլանդիայի վարչապետ Միխոլ Մարտինը:

Այնուհետև մեկնարկել է գագաթնաժողովի լիագումար նիստը, որին հաջորդել է երկրների ղեկավարների համատեղ տեսալուսանկարահանման արարողությունը:

Վարչապետ Փաշինյանը գագաթնաժողովի շրջանակում մասնակցում է նաև փակ ձևաչափով անցկացվող կլոր-սեղան քննարկումների:

Ալբանիայի վարչապետը Թրամփի փեսայի նախագծի պատճառով վիճաբանել է լրագրողուհու հետ

Ալբանիայի վարչապետ Էդի Ռաման բանավեճի է բռնվել լրագրողուհու հետ, որը նրան հարցրել է ԱՄՆ նախագահ Դոնալդ Թրամփի փեսայի և Affinity Partners ներդրումային ընկերության հիմնադիր Ջարեդ Քուշների հետ կապերի մասին։ Միջադեպը տեղի է ունեցել Դուբլինում՝ Եվրոպական քաղաքական համայնքի գագաթնաժողովի մեկնարկից առաջ, հայտնում է «Европейская правда»-ն։

Զրույցի ընթացքում լրագրողուհին Ռամային անվանել է Քուշների ընկեր։ Վարչապետը մի քանի անգամ հարցրել է, թե որտեղից է նա դա իմանում, ապա նկատել, որ նա «չափազանց շատ է թերթ կարդում»։

Երբ լրագրողուհին հայտարարել է, որ Ալբանիայի կառավարության ղեկավարը Քուշների հետ բիզնեսով է զբաղվում, Ռաման պահանջել է բացատրել, թե կոնկրետ ինչ նկատի ունի։

«Ես նրա հետ բիզնեսո՞վ եմ զբաղվում։ Ի՞նչ է դա նշանակում։ Նա հետաքրքրություն է ցուցաբերել, և սա շատ, շատ գրավիչ նախագիծ է, որի վրա մենք փորձում ենք աշխատել և համաձայնեցնել բոլոր մանրամասները։ Բայց գործընթացը դեռ շարունակվում է։ Այն ամենը, ինչ պատմել են այս մասին, և ինչն ի վերջո դարձել է համընդհանուր ընդունված ճշմարտություն, մեծ սուտ է։ Չէ՞ որ ոչ մի կղզի չի վաճառվել, ոչ մի կղզի կոնցեսիայի չի հանձնվել, ոչ մի կղզի վարձակալության չի տրվել»,- հայտարարել է Ալբանիայի վարչապետը։

Խոսքը Ալբանիայի Ադրիատիկ ծովի ափին շքեղ զբոսաշրջային հանգստավայր կառուցելու՝ 1,4 միլիարդ եվրո արժողությամբ նախագծի մասին է։ Այն իրականացնում է Քուշների Affinity Partners ներդրումային ընկերությանն առնչվող մի ընկերություն։

Հունիսին Ալբանիայում բողոքի ցույցեր են սկսվել ափամերձ տարածքի կառուցապատման դեմ։ Բացի դրանից, նույն ամսվա սկզբին Ալբանիայի հակակոռուպցիոն դատախազները հետաքննություն են սկսել՝ կապված լայնածավալ նախագծի հետ։

Քուշները հանգստավայրի կառուցման ծրագրերի մասին հայտարարել է 2024 թվականին՝ ավելի լայն ներդրումային ծրագրի շրջանակում, որը ներառում էր նաև Բելգրադում նախկին ռազմական համալիրի վերակառուցումը։ 2025 թվականի դեկտեմբերին նա հրաժարվել է սերբական նախագծից՝ փողոցային բողոքի ցույցերի ֆոնին։

Վրաստանի և Թուրքիայի նախագահները քննարկել են Հարավային Կովկասում խաղաղության ամրապնդումն ու Միջին միջանցքը

Վրաստանի նախագահ Միխեիլ Կավելաշվիլին և Թուրքիայի նախագահ Ռեջեփ Թայիփ Էրդողանը քննարկել են Հարավային Կովկասում իրավիճակը և տարածաշրջանում կայուն խաղաղության ամրապնդման կարևորությունը։ Հանդիպումը տեղի է ունեցել Անթալիայում՝ ՄԱԿ-ի կլիմայի փոփոխության 31-րդ համաժողովի (COP31) շրջանակներում, հաղորդում է «Грузия Online»-ը։

Ինչպես հայտնում է Վրաստանի նախագահի աշխատակազմը, կողմերը մտքեր են փոխանակել տարածաշրջանային և միջազգային գործընթացների շուրջ, ինչպես նաև քննարկել Թբիլիսիի և Անկարայի միջև ռազմավարական գործընկերության զարգացումը։

Հատուկ ուշադրություն է դարձվել Հարավային Կովկասում կայուն խաղաղության հաստատման կարևորությանը։ Առաջնորդները քննարկել են նաև առևտրատնտեսական կապերի ընդլայնման, տրանսպորտային և էներգետիկ ենթակառուցվածքների զարգացման, ինչպես նաև Միջին միջանցքի և Բաքու- Թբիլիսի-Կարս երկաթուղու դերի ամրապնդման հեռանկարները։

Կավելաշվիլին վերահաստատել է Թուրքիայի հետ ռազմավարական գործընկերությունը հետագայում ևս զարգացնելու Վրաստանի պատրաստակամությունը և Էրդողանին հրավիրել այցելել երկիր։

Զելենսկին գովերգել է Ադրբեջանի՝ օկուպացված տարածքներում իրականացվող «վերականգնումը»


Ուկրաինայի նախագահ Վլադիմիր Զելենսկին հայտարարել է, որ Կիևը մեծ հետաքրքրությամբ հետևում է Ղարաբաղում և այսպես կոչված «Արևելյան Զանգեզուրում» Ադրբեջանի կողմից…

Ուկրաինան և Ադրբեջանը ԱԹՍ–ների վերաբերյալ համաձայնագիր են կնքել

Ուկրաինայի նախագահ Վոլոդիմիր Զելենսկին Դուբլինում Եվրոպական քաղաքական համայնքի գագաթնաժողովի շրջանակում հանդիպել է Ադրբեջանի նախագահ Իլհամ Ալիևի հետ։ Կողմերը քննարկել են պաշտպանական ոլորտում համագործակցությունը և ռուսական հարձակումների ֆոնին Ուկրաինային հնարավոր աջակցությունը։

Այս մասին պետության ղեկավարը հայտնել է իր տելեգրամյան ալիքում։

Բանակցությունների հիմնական թեմաներից մեկը Drone Deal նախաձեռնության շրջանակում համագործակցությունն է եղել։ Զելենսկու խոսքով՝ երկրների միջև արդեն համապատասխան պայմանագրեր են կնքվել, իսկ այժմ աշխատանքներ են տարվում պատվերների ծավալների ավելացման ուղղությամբ։

Նախագահները քննարկել են նաև ադրբեջանական բիզնեսի ներկայությունն Ուկրաինայում։ Զելենսկին շնորհակալություն է հայտնել այն ընկերություններին, որոնք շարունակում են աշխատել երկրում՝ չնայած ռուսական հարվածներին։

Զելենսկին շնորհակալություն է հայտնել Ադրբեջանին արդեն ցուցաբերած օգնության համար և հույս հայտնել, որ ձմռան նախաշեմին լրացուցիչ աջակցություն կտրամադրվի կրիտիկական ենթակառուցվածքներին և լոգիստիկային։

Չեն կարողացել պայմանավորվել հրադադարի հաստատման հարցում


Ուկրաինան եւ Ռուսաստանը չեն կարողացել պայմանավորվել հրադադարի հաստատման հարցում։ Այս մասին հայտարարել է Ուկրաինայի նախագահ Վլադիմիր Զելենսկին։ Նա նշել է, որ…

Էրդողանը Իրանի նախագահին կոչ է արել շտապ բանակցություններ սկսել ԱՄՆ–ի հետ


Թուրքիայի նախագահ Ռեջեփ Թայիփ Էրդողանը Իրանի նախագահ Մասուդ Փեզեշքիանի հետ հանդիպման ժամանակ կոչ է արել Թեհրանին անհապաղ վերադառնալ Վաշինգտոնի հետ բանակցությ…

ԱՄՆ-ն պատրաստում է Իրանի ցամաքային սահմանների շրջափակում՝ առևտրային շրջանցիկ ուղիները փակելու համար. The Telegraph

ԱՄՆ-ն ընդլայնում է Իրանի վրա տնտեսական ճնշումը՝ փորձելով փակել ապրանքների մատակարարման ոչ միայն ծովային, այլև ցամաքային ուղիները։ Պատժամիջոցների շրջանցումը բացահայտելու և կանխելու համար Վաշինգտոնը ստեղծել է Task Force Iron Gate հատուկ խումբը, որը կաշխատի ամերիկյան հետախուզական գերատեսչությունների և տարածաշրջանային գործընկերների հետ, գրում է բրիտանական The Telegraph-ը։

Հորմուզի նեղուցով նավարկության նկատմամբ ամերիկյան սահմանափակումների ներդրումից հետո Իրանն իր ներմուծման և արտահանման մի մասն ուղղել է դեպի ցամաքային սահմաններ։ Թուրքիայի և Պակիստանի հետ սահմաններին բեռնատարների հերթեր են գոյացել, իսկ Չինաստանից, ըստ հաղորդումների, գնալով ավելի հաճախ են ուղարկվում ասիական մայրցամաքը հատող բեռնատար գնացքներ։

Նոր խումբը, որի կազմում ընդգրկված է 20 մարդ, և որի կենտրոնակայանը Ֆլորիդա նահանգի Տամպա քաղաքում է, պետք է բացահայտի Իրանի ցամաքային սահմաններով և Կասպից ծովով իրականացվող «ապօրինի» մատակարարումները։ Նրա ուշադրության կենտրոնում կլինեն սպառազինության ժամանակակից համակարգերը, երկակի նշանակության տեխնոլոգիաները, պատժամիջոցների տակ գտնվող նյութերը և ապօրինի ֆինանսական հոսքերը։

ԱՄՆ կենտրոնական հրամանատարության (CENTCOM) ղեկավար, ծովակալ Բրեդ Կուպերը հայտարարել է, որ նախաձեռնությունը կամրապնդի ամերիկյան ծովային շրջափակման արդյունքները։ Ըստ նրա՝ Վաշինգտոնի նպատակն է սահմանափակել ահաբեկչությունը ֆինանսավորելու, զենքի արտադրության ձեռնարկությունները վերականգնելու և ռազմական պաշարները համալրելու Թեհրանի հնարավորությունները։

Պարբերականի տվյալներով՝ ցամաքային ուղիները փակելու գաղափարը քննարկվել է Իսրայելի վարչապետ Բենիամին Նեթանյահուի՝ Սպիտակ տուն կատարած այցից հետո։ Հուլիսին Թրամփն ու Նեթանյահուն դիտարկել են «ռազմական և ոչ ռազմական միջոցներով» Իրանի վրա տնտեսական ճնշումն ուժեղացնելու հնարավորությունը։

Ռազմական և դիվանագիտական աղբյուրները կարծում են, որ նոր խումբը, ամենայն հավանականությամբ, հետախուզական տվյալներ կփոխանակի տարածաշրջանում ԱՄՆ դաշնակիցների հետ՝ պատժամիջոցները շրջանցելու փորձերը բացահայտելու համար։ Փորձագետները չեն բացառում նաև տեղեկությունների փոխանցումը տեղական իրավապահ մարմիններին՝ արգելված բաղադրիչներն առգրավելու նպատակով։ Մասնագետների գնահատմամբ՝ առանձին դեպքերում կարող են կիրառվել ուժային մեթոդներ, այդ թվում՝ թիրախային հարվածներ կամ գաղտնի ցամաքային գործողություններ։

Սակայն ցամաքային շրջափակման արդյունավետությունը կախված կլինի Վաշինգտոնի հետ համագործակցելու հարևան երկրների պատրաստակամությունից։ Ուղիները փակելու համար ԱՄՆ-ին անհրաժեշտ կլինի Իրաքի, Թուրքիայի, Պակիստանի, Աֆղանստանի, Թուրքմենստանի, Հայաստանի և Ադրբեջանի աջակցությունը։

Ընդ որում, այս պետություններից շատերը ԱՄՆ-ի մերձավոր դաշնակիցները չեն և կարող են չցանկանալ սահմանափակել Իրանի հետ առևտուրը՝ ի վնաս սեփական տնտեսության։ Հատկապես բարդ հատվածներ են համարվում Աֆղանստանի և Պակիստանի հետ Իրանի սահմանները, որտեղ մաքսանենգությունը լայնորեն տարածված է։

ԱՄՆ-ում Պակիստանի նախկին դեսպան Հուսեյն Հաքքանին նշել է, որ Իսլամաբադը դժվար թե ցանկանա հրաժարվել երկիրը խոշոր առևտրային հանգույցի վերածելու երկարաժամկետ ծրագրերից։ Ըստ նրա՝ Իրանն ու Պակիստանը ցամաքային տրանսպորտային միջանցքների զարգացումը դիտարկում են որպես ռազմավարական նախագիծ, որի նշանակությունը կպահպանվի նաև ներկայիս հակամարտության ավարտից հետո։

Ինչպես հայտնում է The Telegraph-ը, Սպիտակ տանը կարծում են, որ Հորմուզի նեղուցով նավարկության վերականգնմանն ուղղված ճնշման նախկին ռազմավարությունը կարող էր սպառած լինել իր հնարավորությունները։ Վաշինգտոնը դիտարկում է լրացուցիչ միջոցներ, որոնք կարող են ստիպել Թեհրանին վերադառնալ բանակցությունների սեղանի շուրջ։ Միաժամանակ չի բացառվում, որ ցամաքային շրջափակման մասին տեղեկությունը կարող է օգտագործվել նաև որպես ուշադրությունը շեղող հնարք։

Հայկ Հովհաննիսյանը անշնորհք արտահայտություն է հնչեցրել Բագրատ Սրբազանի հասցեին․ փաստաբան

Այսօր դատական նիստի ընթացքում դատախազ Հայկ Հովհաննիսյանը անշնորհք արտահայտություն է հնչեցրել Բագրատ Սրբազանի հասցեին, գրել է փաստաբան Հովհաննես Խուդոյանը։

«Ակնկալում եմ, որ Հայկ Հովհաննիսյանը կվերանայի իր վարքագիծը ու հրապարակային ներողություն կխնդրի Բագրատ Սրբազանից»,– նշել է նա։

Հիշեցնենք՝ այսօր 18 արդարների գործով դատական նիստի ընթացքում հանրային մեղադրող Հայկ Հովհաննիսյանն իր խոսքում «մերկապարանոց» որակեց Բագրատ Սրբազանի խոսքը։ 

«Եթե ինչ-որ մեկը ինչ-որ բան ասում է, չի նշանակում, որ նա ասելիք ունի, այն հիմնավոր է, կամ իմաստ ունի։ Ես կողմ չեմ մերկապարանոց, պրովոկացիոն հայտարարություն անելուն նիստերի դահլիճում»,-ասաց դատախազը։

«Սա վիրավորանք չէ՞։ Մերկապարանոցը ձեր արածն է ամբողջ, ասելիք չունեք։ Գողակա՞ն ես, այ տղա, այ խուժան, դուք կամ գողական եք, կամ խուլիգան եք, կամ խուժան, որոշեք, թե որն եք»,-արձագանքեց Բագրատ Սրբազանը։